9-15 MARÇO, 2026
NYIMBO NA. 45 Vinthu vomwe niganiza
Yahova angakuthandizeni mukakhala kuti ndimwe wokwinyirira
“Munthu wobvesa ntsisi ine!”—ARO. 7:24.
CHOLINGA
Tione vomwe tingachite tikayamba kuganizira vinthu vomwe vitichitisa kukwinyirira.
1-2. Ko Paulo nthawe zinango ambabva tani, ndipo ndawa chani chitsanzo chake chingatithandize? (Aroma 7:21-24)
TIKAMBAGANIZIRA va ntumi Paulo, tiona kuti iye ambalalikira mwakhama ntontholo wabwino m’madziko yazinji. Iye wenze mpfunzisi wabwino ndipo adanemba mabukhu yazinji m’Baibolo. Pamwapa vinkuwonekeratu kuti iye wenze munthu wolimba ntima komasoti wokhulupirika. Koma nthawe zinango iye ambakhalambo wokwinyirira.
2 Werengani Aroma 7:21-24. Mu kalata yake yoyenda kwa Akhrisitu waku Roma, Paulo ambawonesa kuti wenze na maganizo yomwe azinji ise tikhala nayo. Paulo wenze Mkhrisitu wokhulupirika ndipo ambafunisisa kubvera Mulungu. Koma ndawa yakuti wenze wochimwa, venze voshupa kuti nthawe zose ambachite vinthu vokondweresa Yahova. Ndipo nthawe zinango akaganizira vomwe adachita m’mambuyo akalibe kukhala Mkhrisitu, Paulo ambakwinyirira.
3. Ko tikambirane chani munkhani ino? (Onani pomwe mbali yakuti: “Dziwani ivi.”)
3 Olo kuti nthawe zinango Paulo ambakwinyirira, koma iye ambayesesa kuleka kuganizira vinthu vomwe vingamuchitise kukhala wokwinyiriraa. Mu nkhani ino, tikambirane mibvunzo aya: Ndawa chani Paulo nthawe zinango ambadziwona kuti ni wobvesa ntsisi? Ko nchani chomwe chidathandiza Paulo kulimbana na maganizo yokwinyirira? Ko isepano tingachite tani tikakhala okwinyirira?
NDAWA CHANI PAULO NTHAWE ZINANGO AMBAKWINYIRIRA?
4. Ndawa chani ntumi Paulo nthawe zinango ambakwinyirira?
4 Paulo ambaganizira vinthu voipa vomwe ambachita akalibe wakhala Mkhrisitu. Paulo akalibe wakhala Mkhrisitu, wenze Saulo yemwe ambachita vinthu voipa. Mwakulinganiza, iye wenzepo pomwe Sitefano ambaphewa ndipo adachitambo mbali pakuphewa muko. (Mac. 7:58; 8:1) Kuingizira mwapa, Saulo ambadzudza Akhrisitu na kuwachitira vinthu vankhanza.—Mac. 8:3; 26:9-11.
5. Ko Paulo ambabva tani akaganizira vinthu vomwe ambachita akalibe wakhala Mkhrisitu?
5 Pomwe Paulo adakhala Mkhrisitu, ambadziwona kuti ali na mulandu ndawa ya vinthu vomwe adachita kumbuyo. Magole yakambapita, iye ambashupika basi na vophonya vomwe adachita kalekale. Mwakulinganiza, pomwe iye adanemba kalata yoyamba yoyenda kwa Akhrisitu waku Korinto ya mu gole ya 55 EC, iye adati: “Ndinelini woyenerera kuchemerewa ntumi, ndawa nidadzudza mpingo wa Mulungu.” (1 Akor. 15:9) Pafupifupi magole 5, iye adanemba kalata yake yoyenda kwa Akhrisitu wa ku Efeso. Iye adanena kuti: “Inepano munthu mng’ono pakunilinganiza na mng’ono maninge pa ochena wose.” (Aef. 3:8) Ndipo Paulo adauza pomwe Timoteyo kuti: “Kalekale nenze wonyoza Mulungu, wodzudza wanthu wake komasoti wachipiringu.” (1 Tim. 1:13) Pakuzungira mipingu, vinkuchita kuwonekeratu kuti venze voshupa maninge kwa Paulo akagumana abale omwe ambawadzudza na wachibale wawo.
6. Ko nchani chomwe Paulo chimbamuchitisa kukhala na nkhawa? (Onani pomwe mawu ya m’nyantsi.)
6 Paulo wenze na bvuto yomwe imbamushupa maninge. Bvuto mwiyi yenze ninge “minga mthupi.” (2 Akor. 12:7) Paulo alibe kuneneratu kuti bvuto yake yenze iponi ndipo mawu yomwe iye adanena yankuwoneseratu kuti vimwevi vimbamuwawa maninge. Ingakhale bvuto yakuthupi panango vinthu vinango.b
7. Ndawa chani nthawe zinango venze voshupa kwa Paulo kuchita vinthu vabwino nthawe zose? (Aroma 7:18, 19)
7 Vophonya vake. Nthawe zinango Paulo ambakhumudwa ndawa ya vophonya vake. (Werengani Aroma 7:18, 19.) Iye ambafuna kuchita vinthu vabwino, koma ambadzibva kuti angakwaniselini. Paulo adanena kuti nthawe zose ambayesesa kupewa kuchita vinthu voipa. Iye ambayesesa kuti akhale na makhalidwe yabwino. (1 Akor. 9:27) Tingakwanise kuwona momwe iye ambabvera akakhala kuti wachita chinthu chomwe wenze wayesesa kuti achichinje.
KO NCHANI CHOMWE CHIDATHANDIZA PAULO POMWE WENZE WOKWINYIRIRA?
8. Ko ni vinthu viponi vomwe Paulo ambachita kuti akwanise kulimbana na nkhawa zake?
8 Ninge momwe taonera m’makalata yake, Paulo ambaganizira momwe mzimu uchena wa Mulungu ungathandizire Mkhrisitu kusiya vinthu voipa. (Aro. 8:13; Agal. 5:16, 17) Paulo adafotokoza mobveka bwino vomwe Akhrisitu afunika kupewa kuti akondwerese Yahova. (Agal. 5:19-21, 26) Vimwevi vinkuwonesa kuti Paulo akambaganizira vofoka vake, ambafagafaga malangizo ya m’Malemba na kuwona vomwe afunika kuchita kuti alimbane na bvuto yake. Ndipo iye ambatewedza malangizo yomwe ambayapereka kwa anango.
9-10. Nchani chimbamuthandiza Paulo akakhala wokwinyirira? (Aefeso 1:7) (Onani pomwe foto.)
9 Olo kuti Paulo nthawe zinango ambakwinyirira, penze vinthu vizinji vomwe vimbamuthandiza kukhala wokondwa. Mwakulinganiza, adakomedzewa padabva vinthu vabwino vaku mipingu yomwe yenze kutali. (2 Akor. 7:6, 7) Ushamwali womwe wenze nawo na abale na alongo, umbamuchitisa pomwe kukhala wokondwa. (2 Tim. 1:4) Kuingizira mwapa, Paulo ambakhala wokondwa maninge ndawa yakuti wenze pa ushamwali wolimba na Yahova. Ndipo ambatumikira Mulungu “na chikumbuntima chochena.” (2 Tim. 1:3) Pomwe wenze mudjeri ku Roma, Paulo adalimbikisa abale kuti: “Mumbakhale wokondwa nthawe zose ndawa ya Ambuya.” (Afil. 4:4) Vimwevi vinkuwoneseratu kuti Paulo ambandokhaliralini kukumbukira va mabvuto yake na vophonya vake. Nthawe zose akayamba kuganizira vinthu vokwinyiririsa, ambakumbukira vinthu vomwe vimbamuchitisa kukhala wokondwa.
10 Chinthu chinango chomwe chimbamuchitisa Paulo kukhala wokondwa, ni kukumbukira ntsembe ya Yesu. Ndipo iye ambawona ntsembe mweyi kuti ni yofunika maninge. (Agal. 2:20; werengani Aefeso 1:7.) Paulo wenze na chikhulupiriro chakuti Yahova adzamukhululukire machimo yake kupitira mu ntsembe ya Yesu Khrisitu. (Aro. 7:24, 25) Vimwevi vidathandiza Paulo kupitiriza kutumikira Yahova mokondwa.—Aheb. 9:12-14.
Kuganizira va ntsembe kudathandiza Paulo kulimbana na nkhawa ndawa ya vophonya vomwe adachita kumbuyo. (Onani ndime 9-10)
11. Ko chitsanzo cha Paulo chingakuthandizeni tani?
11 Ninge Paulo, isembo tingakhale na bvuto yomwe ingambatikwinyiririse ndipo nthawe zinango tingakwinyirire kuti tinkukondweresalini Yahova. Nthawe zinango tingambaganize kuti: ‘Ndine munthu wobvesa ntsisi maninge!’ Mulongo munango dzina yake Elizac adati: “Nilimbikisiwa maninge na chitsanzo cha Paulo. Nikhala wokondwa maninge pakudziwa kuti nililini nekha yemwe nidzibva teneuyu. Chitsanzo chake chinikumbusa pomwe kuti Yahova abvesa mabvuto yomwe atumiki wake ankugumana nayo.” Ninge Paulo, ko isembo tingachite tani kuti tipitirize kukhala oganiza bwino komasoti okondwa olo kuti ndise wokwinyirira?
KO NCHANI CHOMWE CHINGATILIMBIKISE TIKHAKHALA OKWINYIRIRA?
12. Ko tifunika kuchita tani ntsiku iriyose kuti tikhale okondwa?
12 Tifunika kupitiriza kuchita vinthu vomwe vingalimbise ushamwali wathu na Mulungu. Tingalinganize vochita vomwe vingatithandize kukhala paushamwali wolimba na Yahova na vinthu vomwe vitithandiza kuti tikhale na thanzi yabwino. Nthawe zizinji tinkubva bwino tikadya chakudya chabwino, kuchita masenzeka yolimbisa thupi na kugona mokwanira. Molingana na vimwevi, tikubvambo bwino tikawerenga Mawu ya Mulungu ntsiku iriyose, kukonzekera misonkhano kuti tikadawire na kuyenda kukalalikira. Vinthu vimwevi vitilimbikisa komasoti vitithandiza kulimbana na nkhawa zathu.—Aro. 12:11, 12.
13-14. Ko anango akubva tani akapitiriza kuchita vinthu vomwe viwachitisa kukhala pa ushamwali wolimba na Yahova?
13 Onani chitsanzo cha John, pomwe wenze na magole 39 iye adagumanika na matenda ya nkhasa. Pakuyamba, wenze na mantha komasoti nkhawa. Iye adati: ‘Ni chilungamolini, inepano ndine wachilumbwana kuti ningadwale matenda mwaya.’ Pa nthawe mwiyi mwana wake mwamuna wenze na magole yatatu. Ko nchani chomwe chidamuthandiza? Iye adati: “Olo kuti nimbakhala woneta maninge, nimbawonesesa kuti banja yathu inkugumanika pamisonkhano yose, kulalikira komasoti kuchita pfunziro ya banja sondo iriyose.” Iye adanena pomwe kuti: “Tikakhala kuti tinkugumana na mabvuto, tikhala wokwinyirira maninge komasoti na nkhawa. Koma napfunzira kuti manjemanjepa, tidzawone momwe Yahova adzamalisire mabvuto yathu yose. Yahova adanipasa mphanvu kuti nikwanise kupirira ndipo angachitembo chibodzibodzi na imwepo.”
14 Eliza yemwe tamutomola pakuyamba ule, adati: “Nthawe zose nikayenda kumisonkhano na kuchita pfunziro ya panekha, nikhala wotsimikizira kuti Yahova anikonda. Ndipo vimwevi vinichitisa kukhala wokondwa.” Nolan yemwe ni wonyang’anira dera wa kuno ku África adafotokoza momwe iye na nkazi wake Diane ambabvera. Iye adati: “Tiwonesesa kuti tinkufika pamisonkhano komasoti kulalikira olo kuti ndise okwinyirira. Ndipo nthawe zose Yahova atithandiza kuti timbakhale okondwa. Tikakhala kuti ndise okwinyirira, tiyesesa kukumbukira kuti Yahova adzatithandize na kutidalisa. Ndipo tikhala otsimikiza kuti Iye adzachitedi vimwevi.”
15. Ko ni chinthu chinango chiponi chatingachite tikakhala okwinyirira? Perekani chitsanzo.
15 Tingachite pomwe vinthu vinango kuti tikwanise kulimbana na nkhawa. Tilinganize kuti munkudwala nsana, kuti mupole mufunika kuchita vinthu vizinji osati kundofamba ntsiku iriyose. Panango choyamba mungafunike kudziwa chomwe chikuchitisani kubva kuwawa komasoti kuyankhula na mfulumero. Mukachita teno, mudzakwanise kuzindikira chomwe chinkuyambisa kuti mumbabve kuwawa. Kuti tilimbane na nkhawa zathu, tifunika pomwe kuchita chibodzibodzi. Tingafagefage m’Baibolo, m’mabukhu yathu komasoti kuyankhula na abale omwe ali pa ushamwali wolimba na Yahova. Manje naboni tione mpfundo zinango zomwe zingatithandize.
16. Ko nchani chomwe chingakuthandizeni kuzindikira chinthu chomwe chikuchitisani nkhawa? (Salimo 139:1-4, 23, 24)
16 Mbapempherani kwa Yahova kuti mudziwe vomwe munkufunika. Mpfumu Davide ambadziwa kuti Yahova amudziwa bwino. Ndipomwapa, iye adapemphera kwa Yahova kuti ‘abvese vomwe vinkumuchitisa nkhawa.’ (Werengani Salimo 139:1-4, 23, 24.) Isembo tingapemphere kwa Yahova kuti atithandize kubvesa kuti ndawa chani tikhala na nkhawa komasoti momwe tingakhalire odekha. Tingadzibvunze kuti: ‘Ko nchani chinkunichitisa nkhawa? Ko pali chinthu chinango chomwe chinichitisa kukhala na nkhawa nthawe zose? Ko nikakhala kuti niri na nkhawa, niganizira vinthu vomwe vinichitisa kukhala wokondwa?’
17. Ko ni nkhani ziponi zomwe tingapfunzire kuti zitithandize kuganizira vinthu volimbikisa? (Onani pomwe foto.)
17 Mbapfunzirani nkhani zomwe zingakuthandizeni pa bvuto yanu. Nthawe zinango ni bwino kupfunzira makhalidwe ya Yahova yomwe yangatilimbikise. Mwakulinganiza, kuganizira va kukhululuka kwa Yahova na ntsembe ya Yesu, kwenze kophindulisa maninge kwa ntumi Paulo. Ndipomwapa, tewedzerani chitsanzo chake. Tingapfunzire pomwe nkhani za m’mabukhu yathu pa jw.org pa malo yofagira nkhani ya Mboni za Yahova, zomwe zifotokoza makhalidwe ya Mulungu ninge chifundo chake, kukhululuka kwake na chikondi chake chokhulupirika. Tinganembe nkhani zomwe zatithandiza nkuziikha pamalo yowonekera. Manje tikakhala kuti tiri na nkhawa, tingabwerezere pomwe kuwerenga mpfundo zomwe tidazinemba kale zire. Ndipo yesesani kuphatisa basa vomwe mwawerenga pa moyo wanu.—Afil. 4:8.
Mbapfunzirani pamwekha nkhani zomwe zingakuthandizeni kulimbana na nkhawa zanu. (Onani ndime 17)
18. Ko ni nkhani ziponi zomwe Akhrisitu anango apfunzira?
18 Eliza yemwe tamutomola kale, adawerenga nkhani ya Yobu. Iye adati: “Yobu adagumana na mabvuto yakulu maninge. Koma olo nteno, Yobu alibe kusiya kuthemba thandizo ya Yahova.” (Yobu 42:1-6) Diane yemwe tamutomola kale ule, adati: “Ine na mwamuna wangu tinkupfunzira makhalidwe ya Yahova kuchokera m’mabukhu yathu. Tinkutembeja maninge Yahova ndawa yakutithandiza tikakhala kuti ndise okwinyirira ndawa ya vophonya vomwe tidachita kalekale. M’malo moganizira vophonya vathu, tikumbukira kuti Yahova ankutipfunzisa na kutithandiza kuti tikhale wanthu wabwino. Vimwevi vilimbisa ushamwali wathu na iye.”—Yes. 64:8.
TIMBATSIMIKIZIRE KUTI YAHOVA ADZATITHANDIZE
19. Ko nthawe zinango tingadzibve, ndipo tingakhale otsimikizira va chani?
19 Olo kuti tinkuchita vose vomwe vatomolewa munkhani ino, koma nthawe zinango tikhala na nkhawa basi. Nthawe zinango tingakhale wokwinyirira maninge, koma Yahova angatithandize pabvuto yomwe tinkugumana nayo na kutithandiza kukhala odekha! Nthawe zizinji, tikhala okondwa ndawa yakuti tiri pa ushamwali wolimba na Yahova komasoti tidziwa kuti iye akhala wokondwa na vomwe timuchitira.
20. Ko imwepo munkufuna kupitiriza kuchita chani?
20 Naboni tipitirize kuchita vomwe tingakwanise ndipo ayi kuti tibvume kuti mabvuto yathu, vophonya vomwe tidachita kalekale vitikangise kukhala okondwa. Tikakhala na nkhawa, Yahova angatithandize kuti tikhale odekha. (Sal. 143:10) Mudziko inyowani, tidzakhalelini na nkhawa ndipo timbadzatumikire Yahova mokondwa!
NYIMBO NA. 34 Nifuna kumbachita vinthu mokhulupirika
a DZIWANI IVI: Munkhani ino, tinkunena va wanthu omwe nthawe zinango akhala okwinyirira panango ndawa ya nkhawa. Tinkunenalini va wanthu omwe ali na bvuto ya maganizo omwe afunika thandizo ya mafulumero.
b Mawu ya Paulo, yankuwonesa kuti iye wenze na bvuto ya maso ndipo vimwivi vidakamuchitisa kuti vikhale voshupa kunemba makalata na kuchita utumiki wake. (Agal. 4:15; 6:11) Panango Paulo wenze pomwe na nkhawa ndawa ya voyankhula va apfunzisi wabodza. (2 Akor. 10:10; 11:5, 13) Olo kuti tinkudziwalini bwinobwino bvuto ya Paulo, koma iye nthawe zinango ambakwinyirira.
c Madzina yanango yachinjiwa.