Imwepo wachikulire ndimwe ofunika maninge mumpingo
“Penenze mtsikana, inepano nimbakwanisa kuchita vizinji. Koma manjeuno mphanvu zanimalira ndipo nichitalini vinthu ninge kalekale.”—Adalewa teno Connie wamagole 83.
Panango imwepo munkukwanisambolini kuchita vinthu ninge poyamba ndawa ya uchikulire. Ndipo panango mukwinyirira mukaganizira vomwe mumbachita kalekale koma manjeuno munkukangira ndawa yosowa mphanvu. Manje imwepo mudzibva tene, nchani chingakuthandizeni?
DZIWANI VOMWE YAHOVA ADIKHIRA KUTI MUMBACHITE
Dzibvunzeni kuti: ‘Ko Yahova adikhira kuti inepano nimbachite chani?’ Panango mawu ya pa Deuteronomo 6:5 yangakulimbikiseni. Lemba mwiyi ilewa kuti: “Mumbakonde Yahova Mulungu wanu na ntima wanu wose, moyo wanu wose na mphanvu zanu zose.”
Lemba mwiyi inkuwonesa kuti Yahova afuna kuti mumbachite vomwe mungakwanise pomutumikira mobverana na momwe vinthu viriri pamoyo wanu manjeuno. Kudziwa vimwivi kungakuthandizeni kuti osati mumbadzilinganize na wanthu anango panango kumbalinganiza vomwe mumbachita kalekale na vomwe munkushupika kuchita manjeuno.
Ni vodziwikiratu kuti pemwenze mulumbwana mumbakwanisa kuchita vizinji potumikira Yahova ndawa mwenze na mphanvu. Koma manjeuno pakuti vinthu vachinja pamoyo wanu, mbandochitani vomwe mungakwanise basi. Dziwani kuti mudakali kutumikira Yahova na mphanvu zanu zose olo kuti mwakalamba. Yahova ankuwona kuti mulibe kusiya kumutumikira. Khama yanu iribe kumala, ni imwiire yemwenze nayo pemwenze mulumbwana. Zandochinja ni mphanvu basi.
Khama yamunkuchita manjeuno pamuli wachikulire, ni ibodzibodzi yomwe mumbachita pemwenze wachilumbwana
CHITSANZO CHANU CHINGATHANDIZE ANANGO
M’malo mombandokhalira kuganizira vomwe mungakwaniselini kuchita, mbaganizirani momwe mungathandizire anango na chitsanzo chanu. Dziwani kuti pamwakalamba tene, ndipo pamungakwanise kuchita vinthu vomwe mudakakwanisalini pemwenze mulumbwana. Mwakulinganiza, mungakwanise kuchita vinthu ivi:
Mungasimbire anango mbiri yanu. Ganizirani vomwe Baibolo ifotokoza m’mavesi yali m’nyantsi aya:
Mpfumu Davide: “Nenze mwana ndipo manje pano nakula, koma nikanati nawonako wolungama ankusiiwa panango wana wake kumbandokhalira kukumbira chakudya.—Sal. 37:25.
Yoswa: “Onani manje, pano nasala pang’ono kufa. Ndipo imwepo munkudziwa bwino pa mawu yose yomwe Yahova adapolomisa, palibe olo mawu yabodzi yomwe yalibe kukwanirisika. Yose yadakwanisirika kwa imwepo. Palibe mawu olo yabodzi yomwe yalibe kukwanirisika.”—Yos. 23:14.
Imwepo mbayesesanimbo kuyankhula mawu yolimbikisa ninge mwaya. Vomwe Davide na Yoswa adayankhula venze na mphanvu ndawa aliyese adafotokoza vomwe adawona pamoyo wake. Mukayesesa kusimbira anango vomwe mwawona pamoyo wanu, mudzalimbikise omwe ankukubveserani.
Peno imwepo mwatumikira Yahova kwa nthawe itali, simbani vomwe iye adakuchitirani na vomwe mudawona ankuchitira anango. Ko pali nthawe yamudawona kuti Yahova wadalisa wanthu wake mwapadera? Peno nteno, asimbireni anango vimwivo. Dziwani kuti vingawakomedze maninge ninge momwe vidakomedzera imwepo panthawe mwiyo. Ayi kukaikira kuti vomwe mungasimbire abale na alongo vingawalimbikise maninge.—Aro. 1:11, 12.
Peno ni vokwanisika, mbachitani kuyenda ku Nyumba ya Ufumu kukachita misonkhano. Mukateno mungakhale na mwayi wolimbikisa azinji. Connie watafotokoza poyamba ule adati: “Kuchitira ku Nyumba ya Ufumu misonkhano, kunithandiza kuti osati nimbandokhala wokwinyirira. Ningakharelini wokwinyirira, ndawa nitambiriwa bwino na abale na alongo. Niyesesa kuwatembeja na kuwapasa tumphaso. Niyesesa pomwe kuti osati nimbatayane nawo.”
YAHOVA AKONDWA NA VOMWE MUCHITA POMUTUMIKIRA
Baibolo isimba va wanthu azinji omwe ambakwanisambolini kuchita vizinji ndawa ya momwe venzere pamoyo wawo, koma olo nteno ambakondewa na Yahova. Ganizirani va Simiyoni yemwe wenze wokalamba. Yesu adabadwa iye akali moyo. Nivodziwikiratu kuti Simiyoni akafika pa kachisi ambawona alumbwana ankuphata basa mwamphanvu. Ndipo panango Simiyoni ambaganiza kuti alumbwana mwawa ndiwo ankutumikira bwino Yahova, osati iye. Koma Yahova ambawonalini tene. Iye ambawona kuti Simiyoni ni “wokhulupirika ndipo ni wakhama.” Ndipomwapa adamupasa mwayi woona Mwana wake Yesu nakuti alewe vomwe vidzamuchitikire. (Luka 2:25-35) Yahova ambaikhiralini nzeru pa mphanvu za Simiyoni, koma ambakomedzewa na kulimba kwa chikhulupiriro chake “ndipo mzimu wake wenze pa iye.”
Yahova adapasa mwayi Simiyoni kuti awone Yesu ali kacheche na kuleweratu vati vidzamuchitikire kutsogolo
Imwepo dziwanimbo kuti Yahova awona vabwino kwa imwepo olo kuti vinthu vachinja. Iye afuna kuti “mumbamupase vinthu vomwe mungakwanise, osati vomwe mungakwaniselini.”—2 Akor. 8:12.
Ndipomwapa, mbayesesani kuchita vomwe mungakwanise basi. Mwakulinganiza, mbayesesani kulalikira olo kanthawe kang’onong’ono. Mungachite pomwe bwino kumbafonera anango panango kuwatumizira kakalata kuti muwalimbikise. Dziwani kuti abale na alongo akubva bwino maninge, makamaka akalimbikisiwa na munthu yemwe watumikira Yahova kwa nthawe itali.
Olo kuti wachikulire alibe mphanvu, angachite vizinji potumikira Yahova. Werengani nkhani ya mulongo wa ku África kuno mu kabokosi kakuti: “Iwo adapulumusa moyo wake.”
Ayi kuyebwa kuti chitsanzo chanu chabwino chingalimbikise anango. Viri teno ndawa yakuti ndimwe wokhulupirika ndipo tsimikizirani kuti “Mulungu ni wolungama ndipo angayebwelini basa yanu na chikondi chomwe mudachiwonesa padzina yake pakutumikira ochena ndipo munkupitiriza kuwatumikira.”—Aheb. 6:10.
PITIRIZANI KUTHANDIZA ANANGO MOMWE MUNGAKWANISIRE
Pali umboni wowonesa kuti amuna na akazi azinji okalamba omwe athandiza anzawo akhala okondwa, aganiza bwino ndipo akhala na moyo utali.
Koma sikuti mabvuto yanu yangamaliretu mukathandiza wanthu. Ni Ufumu wa Mulungu wokha womwe udzamalise mabvuto yose kuphatanidzapo impfa.—Aro. 5:12.
Koma mukambayesesa kutumikira Yahova na kuthandiza anango kuti amudziwe, mudzakhale na chidikhiro cholimba ndipo mungambabveko bwino. Dziwani kuti tikukondani maninge imwepo wachikulire. Ayi kuyebwa kuti Yahova ankuwona vose vomwe munkumuchitira ndipo atembeja. Nawombo abale na alongo akukondani ndipo ankuphindula na chitsanzo chanu.