Ko munkukumbukira?

Ko mudawerenga mosamala nkhani za mu Ntsanja za ulonda za gole ino? Peno nteno, onani peno mungakwanise kudawira mibvunzo aya:

Ko nchani chomwe chitilimbikisa kupasa ulemerero Yahova?

Tipasa ulemerero Yahova ndawa yakuti timulemekeza maninge, timukonda ndipo tinkufuna kuti anango amudziwe.—w25.01, tsa. 3.

Peno munthu watiphonyera, nchani chingatithandize kuti timukhululukire?

Sikuti tifunika kubisa momwe vatiwawira, koma tifunika kupewa kumusungira chakuntima. Viri teno ndawa tikambandokhala wokalipa, tingadwale.—w25.02, tsa. 15-16.

Ndawa chani Maliko ni chitsanzo chabwino kwa abale wachilumbwana?

Iye ni chitsanzo chabwino ndawa adabvuma utumiki wadapasiwa. Olo kuti vomwe Paulo adachita vidamukwinyiririsa, iye alibe kundolekeratu kutumikira abale na alongo. Adayesesa kubvana na Paulo na Akhrisitu anango wachikulire.—w25.04, tsa. 27.

Ko Yesu ambatanthauza chani padapemphera kuti: “Inepano nachitisa kuti iwo adziwe dzina yanu”?

Opfunzira wa Yesu ambaidziwa kale dzina ya Mulungu. Koma Yesu adawathandiza kudziwa bwino makhalidwe ya Mulungu, basa zake na volinga vake.—w25.05, tsa. 20-21.

Peno ndise odzichepesa, ko tingazindikire chani?

Tingazindikire kuti pali vinthu vinango vomwe tividziwalini. Mwakulinganiza, tinkudziwalini ntsiku yomwe mapeto yadzabwere na vomwe vidzachitike pantsiku mwiyi. Tikwanisalini kudziwa vomwe vidzachitike mangwana. Ndipo tikwanisalini pomwe kuzidziwa bwino tekha ninge momwe Yahova atidziwira.—w25.06, tsa. 15-18.

Nchani chingatithandize kubvesa bwino nkhani ya wose panango nkhani yomwe tinkuwerenga?

Tingafunike kudzibvunza kuti: ‘Ko ni umboni uponi womwe unkufotokozewa pofuna kutsimikizira omwe ankubvesera? Ko munkhani mwiyi mwafotokozewa chitsanzo chomwe inembo ningadzachiphatise basa pakupfunzisa? Ko ni mbani waningafotokozereko nkhani mwiyi?’—w25.07, tsa. 19.

Ko tinkupfunzira chani kwa Mulungu pankhani yokhululuka tikawona momwe iye adachitira vinthu na Davide?

Podiya kuti Davide adachita machimo yakuluyakulu, Yahova adamukhululukira padawona kuti iye walapadi chaivo. (1 Maf. 9:4, 5) Mulungu akakhululukira munthu, aikumbusiralini nkhani ndipo amulangalini ndawa ya vomwe iye adaphonyesa kalekale.—w25.08, tsa. 17.

Ko mungachite tani peno munthu wamunkupfunzisa vinkumushupa kuphata mpfundo inango?

Peno imwepo munkuyesesa kumupfunzisa koma iye ankushupika kubvesa, ndopitirizani kupfunza vinango ndipo mpfundo mwiyo adzaibvese kutsogolo.—w25.09, tsa. 24.

Ko Baibolo itanthauza chani ikambati “uchimo unamphanvu yonamiza”? (Aheb. 3:13)

Uchimo ungatipumpse mpakana kuchita vinthu voipa. Uchimo ungatichitise pomwe kukaikira maninge nkumbawona ninge kuti Mulungu atikondalini.—w25.10, tsa. 16.

Ni vinthu vitatu viponi vatingachite kuti mapemphero yathu yambakhale yatanthauzo?

(1) Tifunika kuganizira makhalidwe ya Mulungu. (2) Tingamuuze nkhani yomwe inkutishupa, ndipo peno tinkukangira kukhululukira munthu, tingamuuze Mulungu. (3) Tifunika kulimbikira kupemphera. Tikateno tidzakwanise kufotokoza vomwe vinkutishupadi.—w25.10, tsa. 19-20

Ko tingawathandize tani wachikulire?

Timbawazungire panango kuwafonera. Tifunika pomwe kuwaperekeza kushipitali. Timbawone pomwe vatingachite kuti tilalikire nawo pabodzi.—w25.11, tsa. 6-7.

Ko mungachite tani kuti muchite ukwati wolemekeza Yahova?

Mumbatewedze malamulo ya boma. Mumbachite vinthu mwaulemu paukwati wanu kuti osati mukhale ninge wanthu omwe adziwalini Mulungu. Chitani ukwati wosafuna vizinji ndipo pewani miyambo yosabverana na Baibolo. Mufunika pomwe kukambirana bwino pokonzekera ukwati wanu.—w25.12, tsa. 21-24.