Ko Yobu wenze mbani?

Mu thaundi inango yochemerewa Uzi kwenze munthu munango yemwe ambatumikira Yahova dzina yake Yobu. Iye wenze na banja ikulu ndipo wenze wolemera maninge. Yobu wenze wabwino ntima ndipo ambathandiza wanthu wosauka, azimayi wamasiye komasoti wana wamasiye. Koma ko iye ambagumanalini na mabvuto ndawa yakuti wenze munthu wabwino? Neye.

Satana ambaona vose vomwe Yobu ambachita. Olo kuti Yobu ambadziwalini vimwevi. Yahova adauza Satana kuti: ‘Ko waona ntumiki wangu Yobu? Padziko yapasi palibe munthu wolungama ninge iye.’ Iye anibvera komasoti achita vinthu vabwino.’ Satana adadawira kuti: ‘Nishuwadi kuti Yobu akubverani, koma ndawa yakuti mumuteteza komasoti mwamudalisa. Mwamupasa malo yabwino komasoti vipfuwo. Koma muchiti mwamutengera vinthu vimwevi, angasiye kukubverani.’ Yahova adalewa kuti: ‘Nabvuma kuti umuyese koma ayi kumupha.’ Ndawa chani Yahova adabvuma kuti Satana ayese Yobu? Ndawa yakuti ambadziwa kuti Yobu apitirize kukhala wokhulupirika.

Satana adayamba kuyesa Yobu pakumubweresera mabvuto yosiyanasiyana. Chakuyamba, adachitisa kuti wanthu wochemerewa Asabeya abe ng’ombe na abulu wake. Patsogolo pake, moto udashoka nkhosa zake. Manje padabwera pomwe wanthu wochemerewa Akasidi ndipo adaba ngamila zake, komasoti anyabasa wake omwe ambanyang’anira vipfuwo vake adaphewa. Koma ni vimwevilini vokha, ntsiku inango wana wa Yobu, enze mu nyumba inango nkumbachita phwando. Koma mwadzidzidzi nyumba idagwa nkupha wana wake wose mwawo. Yobu adabva chisoni maninge na vimwevi, koma alibe kusiya kutumikira Yahova.

Satana adaganiza kuti Yobu angasiye kubvera Mulungu akagumana na mabvuto yanango. Patsogolo pake, adachitisa kuti Yobu afunthuke vironda thupi yose. Yobu ambadziwalini chomwe chimbachitisa vose mwevi, koma adapitiriza kubvera Yahova. Mulungu ambaona vose mwevi ndipo adakondwa maninge pakuona kuti Yobu ankupitiriza kukhala wokhulupirika.

Patsogolo pake, Satana adatumiza azishamwali atatu wa Yobu. Iwo adauza Yobu kuti: ‘Panango iwepo udachimwira Mulungu ndipo udabisa ndipomwapa Mulungu ankukulanga.’ Yobu adalewa kuti: ‘Palibe chirichose chophonyeka chomwe nidachita.’ Pamwapo Yobu adayamba kuganiza kuti Yahova ni yemwe adachitisa mabvuto yake ndipo ankuchitalini chilungamo.

Munthu munango, yemwe wenze ng’ono pa azishamwali wake atatu wa Yobu wale dzina yake Elihu, ambandobvesera pomwe wanthu mwawa ambakambirana. Patsogolo pake, Elihu adadawira kuti: ‘Vomwe imwepo munkunena ivi nichaivolini. Yahova niwapadzulu maninge ndipo wanthu ise tingakwaniselini kubvesa vochita vake vose. Iye angachitelini vinthu voipa, iye awona vose ndipo wanthu akambabonera awathandiza.’

Manje Yahova adayankhula na Yobu kuti: ‘Ko wenze kuponi pomwe ningalenga kudzulu na dziko yapasi? Ndawa chani unkunena kuti ninkuchita vinthu vilibe chilungamo? Ukundoyankhula vinthu vomwe unkuvidziwalini.’ Yobu padazindikira kuti wenze na maganizo yophonyeka adalewa kuti: ‘Pepani naphonya, nimbandobva va imwepo, koma manjeuno nakudziwani palibe chomwe mungakwaniselini kuchita. Munikhululukire ndawa ya vomwe nanena ivi.’

Pamwapo mayesero ya Yobu yadamala ndipo Yahova adamupolesa. Adamupasa pomwe vinthu vizinji kuposha vomwe wenze navo pakuyamba, Yobu adakhala na moyo okondwa komasoti utali. Yahova adamudalisa ndawa yakuti ambamubvera olo pa mabvuto. Ko iwepo ungakhale ninge Yobu nkumbabvera Yahova podiya vinthu vishupe tani?