Mibvunzo yochokera kwa owerenga

Ko Yahova adzaikhe “pulani” iponi m’mitima ya maboma ya wanthu manjemanjepa?

Pakunena va kuyamba kwa chisautso chikulu, lemba ya Chivumbuluso 17:16, 17 inena kuti: “Nyanga 10 zomwe waziwona zire komasoti chilombo, zidzazondane nayo hule mwiyo. Zidzatenge vinthu vake vose nkuisiya pezi ndipo zidzadye minyompfu yake nkuyanyekesa na moto. Ndawa Mulungu adaikha pulani m’mitima yawo kuti vichite mobverana na maganizo yake komasoti kuti vikwanirise maganizo yawo yobverana yale, pakupereka ufumu.” Kalekale, mabukhu yathu yambanena kuti, “pulani” yomwe Yahova adzaikhe m’mitima ya maboma ya wanthu ni ya kudzonga vipembedzo vabodza.

Koma tawona kuti pankufunika kuchinja kabvesesedwe kathu. “Pulani” yomwe Yahova adzaikhe m’mitima ya maboma ya wanthu, ni kupereka “ufumu womwe ali nawo kwa chilombo.” Kuti tibvese bwino momwe vimwivi vidzakwarisikire, naboni tidawire mibvunzo yanango.

Ko omwe ankutomolewa maninge pa lemba mwiyi ni mbani? Ni “hule” yomwe ichemerewa kuti “Babulo Nkulu” yemwe ankuimira ufumu wa pa dziko yose wa vipembedzo vabodza. Chinango ni “chilombo chifuwira” chomwe chinkuimira bungwe ya “Nações Unidas,” yomwe idakonzewa mu gole ya 1919, na cholinga chofuna kukhazikisa ntendere padziko yose ndipo imbachemerewa kuti Liga das Nações. (Chiv. 17:3-5) “Nyanga 10” zinkuimira mautongi yose yomwe yankuthandiza chilombo.

Ko pali kubverana kuponi pakati pa hule na chilombo chifuwira? Hule “iri khale” padzulu pa chilombo. Vimwevi vikutanthauza kuti hule inkuthandizira na kuyesesa kuchitsogolera.

Ko nchani chomwe chidzachitikire hule? Chilombo na nyanga 10, “zidzazondane na hule mwiyo” mpakana zidzatenge vinthu vake nkuisiya pezi. Komasoti Yahova adzaidzongeretu mpakana kalekale. (Chiv. 17:1; 18:8) Mwaya yadzakhale mapeto ya vipembedzo vose vabodza. Koma vimwevi vikalibe kuchitika, Yahova adzachitise maboma kuti yachite chinthu chomwe chikalibe chachitikako.

Ko Yahova adzachitise maboma kuchita chani? Iye adzachitise kuti ‘mafumu mwaya yadzakhale na maganizo yolingana’ panango kuti ‘adzachitise maboma mwaya kuti yadzapereke mphanvu zawo na ulamuliro wawo kwa chilombo mwicho’ chifuwira chomwe ni Nações Unidas. (Chiv. 17:13) Ko vimwevi vinkutanthauza chani? Ko maboma ya wanthu yadzandopereka mwakufuna kwawo mphanvu na udindo wawo kwa chilombo? Neye! Malemba yankuwonesa kuti Mulungu ndiye wati adzachitise vimwevi. (Miy. 21:1; linganizani na Yesaya 44:28.) Ko kuchinja kumuku kudzachitike mwapang’onopang’ono? Neye! Vidzachitike mwakankulumize. Pamwapo chilombo chidzaphatise basa mphanvu zomwe chidatambira pakupereka chiweruzo cha Yahova kwa vipembedzo vabodza, nkuvidzongeratu mpakana kalekale.

Manje ko tifunika kuchita chani? Tifunikalini kudikhira kubva kuti maboma mwapang’onopang’ono yankuthandiza maninge Nações Unidas. Koma tifunika kudikhira kuti, mwakankulumize Yahova adzachitise maboma kupereka mphanvu zawo kwa chilombo. Vimwevi vikadzachitika, tidzadziwe kuti chisautso chikulu chili pafupi kuchitika. Pomwe tinkudikhira vimwevi, naboni “tipitirize kukhala maso ndipo tipitirize kukhala woganiza bwino,” ndawa manjemanje vinthu vichinje mwakankulumize maninge!—1 Ates. 5:6.