Nthandizo kwa azikazi omwe ankuchitiriwa nkhanza

Nkhani mweyi iri mu Chichewa ndipo iri na msolo wakuti: “Kuteteza Akazi—Zimene Baibulo Limanena,” pa saite ya jw.org. M’nyantsi mwa tsamba mweyi pana link yobulusira nkhani mweyi. Mukayibulusa mungaipulinte nkuipetapeta kuti ikhale matsamba yanayi. Mulongo Stacy waku América adati: Inepano nidapulinta nkhani mweyi ndipo nidatengana na mulongo munzangu nkuyenda naye ku malo yosungira akazi mu dera yathu.

Nyabasa munango adabvunza mulongo Stacy peno angamusiyile matsamba yanango kuti akapase wanthu womwe akhala kumalo yosungira akazi. Phindu ni yakuti tumatsamba toposha 40 tudagawiriwa pabodzi na tumakhadi twa jw.org tokwana 30. Ntsiku inango, wonyang’anira malo yosungira akazi adakumbira alongo mwawale kuti awawonese akazi waku malo kumuko momwe pfunziro ya Baibolo ichitikira.

Stacy na alongo anango awiri adagumana pomwe maphindu yabwino pomwe adayenda kumalo yanango yosungira akazi. Kumuko iwo adagawira tumatsamba tokwana tushanu ndipo wanthu adakumbira pomwe kuti akatenge tunango. Nyabasa munango adati: “Tumatsamba mutu tuthandize maninge akazi omwe ali kuno. Ni vimweviletu vomwe timbafunikira.” Pa ulendo unango, akazi waku malo mwaya adaunganidzana kuti awone momwe pfunziro ya Baibolo ichitikira. Pamwapo awiri adanena kuti ankufuna kudzagumanika pa misonkhano sondo yamangwana yake.

Stacy adati: “Venze vokomedza maninge kuona momwe wanthu ambakhalira okondwa kuwerenga ntontholo moyu. Patsogolo pakuti kapulintiwa na nkupetewapetewa kakhala kochitisa chidwi maninge ndipo ni njira yabwino maninge yolalikirila ntontholo wa Ufumu kwa gulu mweyi ya akazi. Venze volimbikisa kuona momwe wanthu adachitira pomwe adatambira ntontholo moyu. Ndipo tinkudikhirira mwachidwi kuona momwe Yahova adzadalisire khama yathu kuti tipitirize kulalikira akazi mwawa.”