Mbalimbikisani anango na “mphaso yauzimu.”

Tose isepano tikubva bwino tikambalimbikisiwa na abale na alongo wathu. Baibolo inena kuti kulimbikisa anango ni “mphaso yauzimu.” (Aro. 1:11, 12) Koma kulimbikisa anango sikuti ni kundokhala nthawe ikulu tili pabodzi. Manje ko tingachite tani kuti titsimikizire kuti tinkuphatisa basa bwino mphaso mweyi?

Mbalimbikisani na mawu yanu. Mwakulinganiza, pakudawira pamisonkhano vingakhale bwino kuleka kuyankhula maninge va maganizo yathu. M’malo mwa vimwevi, ni bwino kuikha maganizo yathu pakufotokoza vomwe tapfunzira va Yahova, va Baibolo na va atumiki anango okhulupirika. Tikambacheza na abale, tifunika kuyankhula nkhani zomwe zingalimbise chikhulupiriro chawo na chathu.

Mbalimbikisani anango na vosalula vanu komasoti na vochita vanu. Mwakulinganiza, abale anango ankupitiriza kuchita utumiki wanthawe zose podiya kuti ankugumana na mabvuto. Anango ni chitsanzo chabwino pakugumanika pa misonkhano nthawe zose olo kuti ankudwala. Ndipo anango abwera kumisonkhano podiya kuti akhala woneta ndawa ya basa. Peno imwepo munkugumana na mabvuto ninge mwaya, podiya kuti ni voshupa kwa imwepo, chitsanzo chanu chilimbikisa maninge abale.

Ko imwepo munkuwona tani? Ko mulimbikisa abale na alongo pa vomwe muyankhula na kuchita? Ko imwepo mubvumambo kulimbikisiwa?