NKHANI YOPFUNZIRA 43
NYIMBO NA. 41 Bveserani pemphero yangu
Mbapemphererani anango nthawe zose
“ Mbapemphererani anango . . . Pemphero yogwigwirira ya munthu wolungama iphata basa mwamphanvu maninge.”—YAK. 5:16.
CHOLINGA
Tipfunzire kufunika kopempherera anango na kuwona njira zomwe tingachitire vimwevi.
1. Ko tidziwa tani kuti mapemphero yathu ni yofunika kwa Yahova?
PEMPHERO ni mphaso yabwino maninge. Ganizirani ivi: Yahova adapasa angelo basa zinango. (Sal. 91:11) Iye adapasa pomwe Mwana wake maudindo yakulu. (Mat. 28:18) Koma ko iye adapasa munthu munango udindo wobvesera mapemphero yathu? Neye. Yahova ‘akubva pemphero.’ Iye atibvesera tikambapemphera.—Sal. 65:2.
2. Ko ntumi Paulo adapereka chitsanzo chabwino chiponi pakupempherera anango?
2 Tingakhale omasuka kumufotokozera Yahova vinthu vose vomwe vitichitisa nkhawa. Koma tifunika kumbapempherera pomwe anango. Ntumi Paulo adapereka chitsanzo chabwino pa nkhani mweyi. Iye adanembera mpingo wa ku Efeso kuti: “Ninkupitiriza kukupemphererani.” (Aef. 1:16) Paulo ambapempherera pomwe wanthu mwakuchita kutomola madzina yawo. Mwakulinganiza, iye adauza Timoteyo kuti: “Ninkutembeja Mulungu, . . . ndipo niyebwalini kukutomola m’mapemphero yangu yogwigwirira usiku na masikati.” (2 Tim. 1:3) Moyo wa Paulo wenze woshupa ndipo iye ambapempherera va mabvuto yake. (2 Akor. 11:23; 12:7, 8) Olo nteno, iye ambapatula nthawe kupempherera anango.
3. Ndawa chani tingayebwe kupempherera wanthu anango?
3 Nthawe zinango tingayebwe kupempherera anango. Ko ndawa chani? Mulongo munango dzina yake Sabrinaa adafotokoza kuti: “Moyo wa ntsiku zino ni woshupa. Tingambandoganizira va isepano basi nkumbandopemphera va mabvuto yathu.” Ko vidakuchitikirankoni kale? Peno nteno, pfunziro mweyi ikuthandizeni imwepo (1) tipfunzire kuti ndawa chani tifunika kupempherera anango na (2) kuwona njira zinango za momwe tingachitire vimwevi.
NDAWA CHANI TIFUNIKA KUPEMPHERERA ANANGO?
4-5. Ko mapemphero yathu kwa anango yangakhale tani ‘yamphanvu’? (Yakobo 5:16)
4 Kupempherera anango ‘kuphata basa mwamphanvu maninge.’ (Werengani Yakobo 5:16.) Mapemphero yathu yangathandize munthu munango. Yesu ambadziwa kuti mapemphero yangachinje moyo wa munthu. Pakudziwa kuti ntumi Petulo adakamulamba, iye adati: “Koma ine nakupempherera kuti chikhulupiriro chako ayi kuti chimale.” (Luka 22:32) Paulo ambadziwambo mphanvu ya pemphero. Pomwe iye wenze mudjeri ku Roma, iye adanembera Filimoni kuti: “Ninashuwa kuti na mapemphero yanu, nimasuliwe kuti nidzakutumikireni.” (Filim. 22; onani mawu ya m’nyantsi.) Ndipo ni vimweviletu vomwe vidachitika. Patsogolo pake Paulo adamasuliwa mudjeri ndipo adayamba pomwe kulalikira.
5 Vimwevi vinkutanthauzalini kuti mapemphero yanu yangachichimize Yahova kuchita vinthu vomwe ankufunalini. Yahova akhala tcheru kubvesera mapemphero ya atumiki wake ndipo nthawe zinango awachitira vinthu vomwe akumbira. Kudziwa vimwevi kungatithandize kupemphera kwa Yahova mogwigwirira va mabvuto yathu na kumukhulupirira nkusiya nkhani m’manja mwake.—Sal. 37:5; onani 2 Akorinto 1:11.
6. Mobverana na vitsanzo vomwe takambirana, ko nchani chichitika tikambapepherera anango? (1 Petulo 3:8)
6 Kupempherera anango kutithandiza kukhala na “chifundo chikulu.” (Werengani 1 Petulo 3:8.) Munthu wachifundo abvesa mabvuto ya anango ndipo akhala wofunisisa kuthandiza. (Maliko 1:40, 41) Kupempherera anango kubweresa maphindu yazinji. Mwakulinganiza, nkulu munango dzina yake Michael adati: “Nikambapempherera anango vomwe ankufunika, nibvesa bwino mabvuto yomwe ankugumana nayo. Ndipo vimwevi vinithandiza kuti nimbawakonde maninge. Nidzibva kukhala pafupi na iwo, olo kuti iwo ankudziwalini vimwevo.” Nkulu munango dzina yake Richard adati: “Tikapempherera munthu munango, tikhala wofunisisa kumuthandiza. Ndipo tikathandiza munthu munango, tikhala m’dawiro wapemphero yake.”
7. Ko kupempherera anango kungatithandize tani kuona mabvuto yathu munjira yoyenera? (Afilipi 2:3, 4) (Onani pomwe mafoto.)
7 Kupempherera anango kutithandiza kuwona mabvuto munjira yoyenera. (Werengani Afilipi 2:3, 4.) Tinkukhala mudziko yomwe inkutongewa na Satana. Ndipomwapa, tose tigumana na mabvuto. (1 Yoh. 5:19; Chiv. 12:12) Kukhala na chizolowezi chopempherera anango kutikumbusa kuti “abale [wathu] padziko yose ankugumanambo na mabvuto ninge mwaya.” (1 Pet. 5:9) Mpainiya munango dzina yake Katherine adati: “Kupempherera anango kunikumbusa kuti ndinelini nekha ninkugumana na mabvuto. Vimwevi vinithandiza kuti osati nimbandoganizira va mabvuto yangu.”
Kupempherera anango kutithandiza kuona mabvuto yathu munjira yoyenera (Onani ndime 7)d
IWO AFUNIKA MAPEMPHERO YATHU
8. Ko ni gulu iponi ya wanthu yomwe tifunika kuitomola mapemphero yathu?
8 Ko tingaphatanidzepo mbani m’mapemphero yathu? Tingapempherere wanthu azinji. Mwakulinganiza, wale omwe ali na bvuto yathanzi, wachilumbwana omwe ankutsutsiwa ku shikola panango wale omwe ankugumana na mabvuto ya uchikulire. Abale wathu azinji ankutsutsiwa na wachibale wawo panango boma. (Mat. 10:18, 36; Mac. 12:5) Ndawa ya mabvuto ya vipiringu va ndale, abale anango ambafunika kusiya nyumba zawo. Anango ankubonera ndawa ya matsoka yachilengedwe. Vingachitike kuti tiwadziwalini abale na alongo mwawa. Koma tikambawapempherera tiwonesa kuti tinkubvera lamulo ya Yesu yakuti “mumbakondane.”—Yoh. 13:34.
9. Ndawa chani tifunika kupempherera wanthu womwe ankutsogolera gulu ya Yahova na azikazi wawo?
9 Tingapempherere pomwe wale omwe ankutsogolera gulu ya Yahova. Vimwevi vinkuphatanidza abale wa m’Bungwe Yotonga, wothandizira wawo, wa mu Makomiti ya Nthambi, wonyang’anira madipatimenti, onyang’anira dera, akulu na atumiki othandiza. Abale mwawa aphata basa mwakhama kuti atisamalire ndipo azinji alimbana na nkhawa zawo. (2 Akor. 12:15) Mwakulinganiza, wonyang’anira dera munango dzina yake Mark adati: “Bvuto ikulu ni kukhala kutali na azibereki wangu. Inepano nidziwa kuti mulongosi wangu na tsano wangu awasamalira bwino. Koma viniwawa ndawa yakuti nikwanisalini kuchita vizinji pakuthandiza azibereki wangu.” Ni nthawelini zose pomwe tingadziwe mabvuto yomwe abale wathu ankugumana nayo, koma ni vabwino maninge kuwapempherera. (1 Ates. 5:12, 13) Tingapempherere pomwe azikazi wawo, ndawa ya thandizo yawo ikulu vithandiza kuti abale mwawa apitirize pa utumiki wawo.
10-11. Ko tinkudziwa tani kuti Yahova akondwa tikambapempherera gulu yose ya abale?
10 Ninge momwe tawonera, ni vachilendolini kupempherera abale na alongo. Mwakulinganiza, olo kuti tinkudziwalini madzina ya abale wathu, nthawe zizinji tikumbira Yahova kuti athandize omwe ali mudjeri na omwe aferewa. Nkulu munango dzina yake Donald adati: “Tili na abale azinji omwe ankugumana na mabvuto yazinji ndipo nthawe zinango tipempherera abale wathu padziko yose kuti awathandize.
11 Ko mapemphero mwaya yakondweresa Yahova? Inde! Isepano tidziwalini vose vomwe abale wathu afuna. Ndipomwapa, nkuphonyalini kupempherera abale wathu padziko yose ninge gulu. (Yoh. 17:20; Aef. 6:18) Mapemphero mwaya yawonesa kuti ‘tikonda gulu yose ya abale,’ panango kuti abale wathu wose padziko yose.—1 Pet. 2:17.
MBAPEMPHERANI PAKUCHITA KUWATOMOLA
12. Ko nchani chingachitike na mapemphero yathu peno tikhala tcheru?
12 Mbakhalani tcheru. Kuingizira pakupempherera gulu ya abale, tifunika pomwe kupemphera pakuchita kuwatomola madzina. Ko mu mpingo mwanu muli m’bale yemwe ankudwala matenda yokhalisa? Ko pali mulumbwana yemwe ni wokwinyirira ndawa yotsutsiwa kushikola? Ko munkudziwako m’bale panango mulongo yemwe asamalira yekha wana “pa kuwapasa malangizo na kuwapfunzisa mobverana na vomwe Yahova anena”? (Aef. 6:4) Peno tingakhale tcheru, tidzawonese chifundo kwa anango ndipo vimwevi vidzatithandize kuti timbawatomole m’mapemphero yathu.b—Aro. 12:15.
13. Ndawa chani tifunika kupempherera abale mwakuchita kuwatomola madzina olo kwa wale omwe tiwadziwalini?
13 Pemphererani m’bale pakuchita kumutomola dzina. Tingachite vimwevi olo kwa abale omwe tiwadziwalini. Mwakulinganiza, abale azinji ku Cingapura, ku Crimeia, Eritreia na Rússia ali mudjeri. Pa saiti ya jw.org, tingagumane madzina ya abale mwawa omwe ali mudjeri.c Wonyang’anira dera munango dzina yake Brian adati: “Nidazindikira kuti kunemba dzina ya m’bale yemwe ali mudjeri nakuchita kumutomola mokuwa vinithandiza kukumbukira kumutomola m’mapemphero yangu.”
14-15. Ko nchani chingatithandize kuchita mapemphero yathu mwasitiriti?
14 Mbakumbirani mwasitiriti. Michael, yemwe tamutomola kumayambiriro, adati: “Nikambawerenga nkhani za abale pa jw.org omwe ali mudjeri, niyesesa kuganizira momwe nidakabvera nidakakhala kuti ndinepano. Mosakaika, nidakakhala na nkhawa kuti ni mbani yemwe asamalire nkazi wangu. Vimwevi vinithandiza kupemphera mwasitiriti kwa abale omwe ni olowola omwe ali mudjeri.”—Aheb. 13:3, mawu ya m’nyantsi.
15 Kuyesesa kuganizira momwe moyo wa ntsiku na ntsiku wa abale wathu ali mudjeri uliri, kungatithandize kuti timbapemphere mwasitiriti. Mwakulinganiza, tingakumbire kuti magwarda yambawasamalire bwino abale wathu nakuti akuluakulu wadjeri ambawabvumidze kutumikira Yahova momasuka. (1 Tim. 2:1, 2) Tingapemphere pomwe kuti chitsanzo cha abale mwawa okhulupirika chilimbikise mpingo wakufupi na wanthu omwe atumikiralini Yahova kuti awone makhalidwe yawo yabwino, ndipo angayambe kubvesera ntontholo wabwino. (1 Pet. 2:12) Malangizo mwaya yaphata pomwe basa kwa abale wathu omwe ankugumana na mabvuto yanango. Tikambakhala tcheru tikwanisa kutomola madzina ya abale ndipo tikwanisa kuwapempherera mwasitiriti, tiwonesa kuti ntima wathu ni wodzala na ‘chikondi kwa anango.’—1 Ates. 3:12.
MBAKHALANI NA MAGANIZO YOYENERA PA MAPEMPHERO YANU
16. Ndawa chani tifunika kukhala na maganizo yoyenera mapemphero yathu? (Mateyu 6:8)
16 Ninge momwe taonera, mapemphero yathu yangathandize wanthu pa vomwe vingawachitikire. Koma tifunika kukhala na maganizo yoyenera pa mabvuto yawo. Tikapemphera, sikuti Yahova akhala kuti ankudziwalini. Ndipo iye afunikalini pomwe malangizo yathu kuti agumane njira yabwino yomalisira bvuto inango. Munthu akalibe wadziwa vomwe ankufunika ndipo isepano tikalibe tadziwa, Yahova akhala kuti ankudziwa kale vomwe munthu muyo ankufunika. (Werengani Mateyu 6:8.) Manje ndawa chani tifunika kupempherera anango? Kuingizira pa vifukwa vomwe takambirana kale, kupempherera anango ni njira yowonesera chikondi. Ndipo Yahova akhala wokondwa akawona atumiki wake ankuwonesa chikondi ninge iye.
17-18. Ko ni chitsanzo chiponi chomwe chitithandiza kukhala na maganizo yoyenera mapemphero yathu?
17 Nthawe zinango vingawoneke ninge kuti mapemphero yathu yankuphatalini basa. Olo nteno, tipitiriza kuwonesa chikondi kwa abale wathu ndipo Yahova akhala tcheru. Kuti tibvese bwino nkhani mweyi, linganizani na banja yomwe ili na wana wawo awiri. Kalumbwana kankudwala maninge. Kamtsikana kankukumbira mogwigwirira ababa wake kuti: “Pulizi, chitani vamungakwanise kuti muthandize m’bale wangu. Iye ankudwala maninge!” Koma ababa wake ankuchita kale vose vomwe angakwanise pakumusamalira ndawa yakuti amukonda. Ganizirani momwe baba moyu angakhalire wokondwa pakuwona mwana wake nkazi ankuchita nkhawa na m’bale wake mpaka kugwigwirira kuti amuthandize.
18 Ni vimwevi vomwe Yahova atilimbikisa kuti timbachite. Iye afuna kuti timbakhale na nkhawa na anango komasoti timbawapempherere. Tikachita vimwevi, tiwoneseratu kuti tindoganiziralini va ise tekha, koma tiwonesa kuti tikonda abale wathu kuchokera pasi pa ntima. Yahova awona vimwevi. (2 Ates. 1:3; Aheb. 6:10) Ninge momwe tawonera, nthawe zinango mapemphero yathu yangathandize pa vomwe vinkuchitikira abale wathu. Ndipomwapa, ayi kuyebwa kupempherera anango.
NYIMBO NA. 101 Timbaphate basa mobverana
a Madzina yanango yachinjiwa.
b Onani pa saiti ya jw.org vidiyo yakuti: Takeshi Shimizu: Yahova ni “wakubva pemphero.”
c Kuti mugumane madzina ya abale omwe ali mudjeri, nembani kuti: “Mayiko Amene a Mboni za Yehova Akumangidwa Chifukwa Chotsatira Zimene Amakhulupirira—Nkhani za padziko lonse.” Pa jw.org.
d MAWU YOFOTOKOZERA FOTO: Olo kuti abale na alongo agumana na mabvuto, iwo apitiriza kupempherera anango.