NKHANI YOPFUNZIRA 42
NYIMBO NA. 44 Pemphero ya munthu yemwe ankubonera
Ko tingapemphere tani kwa Yahova na ntima wose?
‘ Nachemera na ntima wangu wose, nidawireni imwepo Yahova.’—SAL. 119:145.
CHOLINGA
Kuona momwe mapemphero ya m’Baibolo yangatithandizire kuti timbakwanise kumbapemphera na ntima wose.
1-2. (a) Ndawa chani vingakhale voshupa kupemphera kwa Yahova kuchokera pasi pa ntima? (b) Ko tikudziwa tani kuti Yahova akhala tcheru na mapemphero yathu?
KO MAPEMPHERO yanu ni yobwerezerabwerezera panango mudzibva kuti ni voshupa kupemphera na ntima wose kwa Yahova? Peno nteno, dziwani kuti ndimwelini mwekha. Ndawa yotangwanika na vochitika va ntsiku na ntsiku, panango tingambapemphere mwakankulumize. Panango tingambaganize kuti ndiselini woyenerera mwayi wa pemphero ndipo ndawa ya vimwevi tikwanisalini kupemphera kwa Yahova, momwe tibvera na maganizo yathu.
2 Baibolo ititsimikizira kuti chofunika maninge kwa Yahova, sikuti nikuphatisa basa mawu yabwino m’mapemphero yathu, koma ni kuyankhula naye kuchokera pasi pa ntima. Iye abvesera ‘mapemphero ya wanthu opfatsa.’ (Sal. 10:17) Yahova akhala tcheru na mawu yaliyose yomwe tinganene mpemphero ndawa yakuti ndise ofunika kwa iye.—Sal. 139:1-3.
3. Ko tipfunzire chani mu pfunziro ino?
3 Mu pfunziro ino, tiwone midawiro ya mibvunzo aya: Ndawa chani tifunikalini kukhala na mantha tikambapemphera kwa Yahova? Ko tingachite tani kuti timbapemphere kuchokera pasi pa ntima? Ko mapemphero yonembewa m’Baibolo yangatithandize tani kuchita vimwevi? Ko tingachite tani peno ndise okhumudwa maninge ndipo tikukwanisalini kumufotokozera Yahova nkhawa zathu? Naboni tikambirane midawiro ya mibvunzo mwaya.
AYI KUCHITA MANTHA KUPEMPHERA KWA YAHOVA
4. Ko nchani chomwe chingatithandize kuleka kuchita mantha kupemphera kwa Yahova? (Salimo 119:145)
4 Yahova ni shamwali wathu wokhulupirika ndipo afuna kuti vinthu vimbatifambire bwino. Tikabvesa vimwevi tikhala omasuka kumuuza vomwe tikuganiza na momwe tikubvera. Wonemba Salimo 119 ambafuna kukhala na maganizo ninge ya Yahova. Iye wenzelini wangwiro ndipo wanthu woipa ambamunamizira mabodza. (Sal. 119:23, 69, 78) Kuingizira pamwapa, wa Masalimo muyu nthawe zinango ambakhala wokhumudwa ndawa ya vophonya vake. (Sal. 119:5) Olo nteno, iye wenze alibe mantha kupemphera kwa Yahova na ntima wose.—Werengani Salimo 119:145.
5. Ndawa chani tifunikalini kubvuma kuti maganizo yophonyeka yatikangise kupemphera kwa Yahova? Fotokozani chitsanzo chomwe chinkuonesa kuti tifunikalini kuchita manyazi kupemphera kwa Yahova.
5 Tifunikalini kubvuma kuti maganizo yathu yophonyeka yatikangise kupemphera kwa Yahova. Viri teno ndawa yakuti Yahova achemera pomwe wale omwe adachita machimo yakuluyakulu kuti ambapemphere kwa iye. (Yes. 55:6, 7) Ganizirani chitsanzo ichi, ofambisa ndeke adziwa kuti angakwanise kuyankhulana na anzake ophatisa basa mashini kuti ndeke ifambe bwino, panthawe yose pomwe akufuna thandizo. Linganizani kuti iye akuchita manyazi ndawa yakuti wasokera panango ndawa yakuti waphonyesa vinthu. Ko imwepo mukuganiza kuti vingakhale bwino kuti aleke kuyankhula na wanthu omwe akuphatisa basa mashini? Neye! Molingana na vimwevi, tikambadzibva kuti tasokera panango taphonyesa vinthu, tifunikalini kukhala na mantha kupemphera kwa Yahova na ntima wose.—Sal. 119:25, 176.
KO NCHANI CHINGATITHANDIZE KUPEMPHERA KWA YAHOVA NA NTIMA WOSE?
6-7. Ko nchani chomwe chingatithandize kuti timbapemphere kuchokera pasi pa ntima? Perekani chitsanzo. (Onani pomwe mawu ya m’nyantsi.)
6 Tikambapemphera kwa Yahova na ntima wose nkumuuza maganizo yathu na momwe tikubvera, timufenderera maninge. Ko ni njira ziponi zomwe zingatithandize kuchita vimwevi?
7 Ganizirani va makhalidwe ya Yahova.a Tikambaganizira va makhalidwe ya Yahova, vikhala vosashupa kumuuza vomwe tikuganiza na momwe tikubvera. (Sal. 145:8, 9, 18) Onani chitsanzo cha Kristine, mulongo yemwe wenze na baba wankhanza. Iye adati: “Kwa inepano venze voshupa kuona Yahova ninge Baba na kuti nimasuke naye. Inepano nimbaganiza kuti ndawa ya vophonya vangu iye adakanisiya.” Ko ni khalidwe iponi ya Yahova yomwe idathandiza Kristine? Iye adati: “Chikondi chokhulupirika cha Yahova chidanipasa chitsimikizo chakuti Yahova anikonda. Inepano nidziwa kuti iye anganisiyelini. Olo nichigwa, iye adzanisamalire mwachikondi ndipo adzanithandize kuti niyimirire. Kudziwa vimwevi kunithandiza kuti nikwanise kumuuza va chimwemwe changu na mabvuto yangu.”
8-9. Mobverana na chitsanzo cha Aliska, ko ndawa chani kuyamba kuganiza ni kwabwino tikanati tachita pemphero?
8 Ganizirani vomwe muyankhule. Mukanati mwapemphera, mungadzichite mibvunzo. Mwakulinganiza: ‘Ko ni mabvuto yaponi yomwe nikugumana nayo manjeuno? Ko nikufunika kukhululukira munthu munango? Ko nikulimbana na bvuto inango inyowani yomwe nikufunika thandizo ya Yahova kuti nipirire?’ (2 Maf. 19:15-19) Komasoti tingatewedzere pemphero ya chitsanzo ya Yesu pakuphatanidza pa mapemphero yathu yokumbira yonena va dzina Yake, Ufumu Wake na cholinga cha Yahova.—Mat. 6:9, 10.
9 Mulongo munango dzina yake Aliska adazindikira kuti mwamuna wake anamatenda ya khansa ya muulupi ndipo pakuyamba venze voshupa kuti apemphere kwa Yahova. Iye adati: “Inepano nidakhala na nkhawa maninge mwakuti nimbaona kuti ni voshupa kuganizira bwinobwino vomwe ningayankhule.” Ko ni chani chomwe chidathandiza Aliska? Iye adafotokoza kuti: “Nikalibe napemphera nipatula kanthawe kuti nikhazikise maganizo yangu, vimwevi vinithandiza kuti osati nimbandoyankhula va inepano na matenda ya mwamuna wangu. Ndipo vinithandiza kukhala wodekha na kukhazikisa maganizo panthawe yomwe nikufuna kupemphera.”
10. Ko ndawa chani ni vabwino kupemphera tiri wodekha? (Onani pomwe mafoto.)
10 Mbapempherani modekha. Ni shuwadi kuti mapemphero yafupi yangakhale yochokera pasi pa ntima, koma tikambapemphera modekha vikhala vosashupa kufotokoza vose, momwe tikubvera na vomwe tikuganiza.b Elijah mwamuna wake wa Aliska, adanena kuti: “Inepano niyesesa kupemphera maulendo yazinji pantsiku, nikapatula nthawe kuti nichite mapemphero yataliyatali maninge, nidzibva kuti ushamwali wangu na Yahova ukhala wolimba maninge. Yahova achitalini gugu kuti nimalize kuchita mapemphero yangu yataliyatali mwaya. Ndipomwapa nidziwa kuti nigayankhule momwe ningafunire.” Yesani kuchita ivi: Gumanani nthawe na malo yomwe imwepo mungapemphere palibe vosokoneza, panango mungapemphere mokuwa ndipo khalani na chizolowezi chombachita mapemphero modekha.
Gumanani nthawe na malo yomwe imwepo mungapemphere modekha (Onani ndime 10)
MBAGANIZIRANI MAPEMPHERO YOMWE YADANEMBEWA M’BAIBOLO
11. Ndawa chani ni vabwino kumbaganizira mapemphero yogumanika m’Baibolo? (Onani pomwe bokosi yakuti: “Ko imwepo mukudzibva ninge momwe iwo ambabvera?”)
11 Chinthu chomwe chingatithandize ni kuganizira mapemphero yochokera pasi pa ntima, nyimbo yopatulika panango masalimo yogumanika m’Baibolo. Kuganizira momwe atumiki wa Mulungu wakalekale adafotokozera maganizo yawo yochokera pasi pa ntima, yangakulimbikisenimbo kupemphera kwa Yahova na ntima wose. Kuona mawu yomwe iwo adayaphatisa basa pakutamanda Yahova, yangakuthandizeni kugumana mawu yanyowani yomwe mungayaphatise basa pa mapemphero yanu. Panango imwepo mungagumane mapemphero ya atumiki wa Yahova omwe adagumanambo na mabvuto ninge yomwe mukugumana nayo.
12. Ni mibvunzo yaponi yomwe tifunika kuganizira tikakhala kuti tikuganizira va pemphero yonembewa m’Baibolo?
12 Mukambawerenga mapemphero yomwe yadanembewa m’Baibolo, ganizirani ivi: ‘Ni mbani adachita pemphero mwiyi ndipo nchani chomwe chidamuchitikira pamoyo wake? Ko nikubverana navo vomwe adanena? Ko nikupfunzira chani pa pemphero mwiyi?’ Panango mungafunike kufagafaga kuti mukwanise kudawira mibvunzo mwaya. Koma mudzaphindule na khama yanu. Naboni tiwone vitsanzo vinango.
13. Ko tikupfunzira chani na pemphero ya Hana? (1 Samueli 1:10, 11) (Onani pomwe foto ya pakhava.)
13 Werengani 1 Samueli 1:10, 11. Pomwe Hana adachita pemphero mwiyi, iye ambagumana na mabvuto yawiri yakuluyakulu. Iye ambaberekalini ndipo nkazi munzake ambamuboneresa. (1 Sam. 1:4-7) Koma Hana adapemphera kwa Yahova modekha na ntima wose. Iye adadzibva kukhala alibe nkhawa. (1 Sam. 1:12, 18) Peno imwepo mukugumana na bvuto yomwe ikukusowesani ntendere, ko mungapfunzire chani pa pemphero ya Hana? ‘Tikamutulira Yahova nkhawa yathu’ nkumufotokozera mabvuto yathu yose, momwe tinkubvera, tikhala tilibe nkhawa.—Sal. 55:22.
Hana ambaberekalini ndipo nkazi munzake ambamuboneresa. Iye adapemphera kwa Yahova na ntima wose. (Onani ndime 13)
14. (a) Ko tingapfunzire pomwe chani pa chitsanzo cha Hana? (b) Ni chani chinkuonesa kuti kuganizira vitsanzo va m’Baibolo kungatithandize kuti timbachite mapemphero yabwino? (Onani mawu ya m’nyantsi.)
14 Hana adabereka mwana dzina yake Samueli, patsogolo pake pomwe iye adakula adayenda naye kwa wantsembe Eli. (1 Sam. 1:24-28) Pakupemphera na ntima wose, iye adatembeja Yahova ndawa yoteteza atumiki wake okhulupirika na kuwasamalira.c (1 Sam. 2:1, 8, 9) Mabvuto ya Hana yalibe kumaliratu, koma iye ambaganizira maninge madaliso yomwe Yahova adamupasa. Ko tikupfunzira chani? Tingakwanise kupirira pomwe tikugumana na mabvuto, tikambaganizira maninge vomwe Yahova wachita na vomwe ankupitiriza kuchita pakutithandiza.
15. Ko tingapfunzire chani pa pemphero ya mneneri Yeremiya? (Yeremiya 12:1)
15 Werengani Yeremiya 12:1. Nthawe zinango mneneri Yeremiya adakhala wokhumudwa pomwe adaona wanthu azinji woipa omwe ambaoneka ninge vinthu vikuwafambira ndipo ambaoneka wokondwa. Adakhala pomwe wokhumudwa maninge ndawa yakuti ambadzudziwa na Aizirayeli anzake. (Yer. 20:7, 8) Yeremiya alibe kunena kuti Mulungu ni wosalungama koma adauza Yahova vose vomwe vingamukalipisa. Patsogolo pake Yeremiya adaona momwe Yahova adathandizira Aizirayeli omwe enze osabvera. Vimwevi vidaingizira chikhulupiriro chake pa chulungamo cha Mulungu. (Yer. 32:19) Isembo tikambaona wanthu omwe alibe chilungamo vikuwafambira bwino panango kutinyoza, tingambadzibvembo ninge momwe adabvera Yeremiya. Koma ninge iye tingamuuze Yahova va mabvuto yathu na kuthemba kuti panthawe yake Yahova adzachose kusowa chilungamo.
16. Ko tingapfunzire chani na pemphero ya Mulevi yemwe adakakwanisalini kutumikira pakachisi? (Salimo 42:1-4) (Onani pomwe mafoto.)
16 Werengani Salimo 42:1-4. Salimo mwiyi idanembewa na Mulevi yemwe ambakwanisalini kutumikira pabodzi na Aizirayeli anzake ku kachisi. Mawu yake yawonesa momwe iye angabvera. Peno tingamangiwe ndawa ya chikhulupiriro chathu panango kudwala matenda yomwe yangatikangise kuchoka pamuyi nthawe zinango tingambadzibve ninge Mulevi muyu. Podiya kuti maganizo yathu ni yodekha, vingakhale bwino kumuuza Yahova momwe tinkubvera. Vimwevi vingatithandize kubvesa bwino maganizo yathu na kuona vinthu munjira yoyenerera. Mwakulinganiza, Mulevi adazindikira kuti iye wenze na mwayi unango wotumikira Yahova. (Sal. 42:5) Iye adapatula pomwe nthawe yoganizira momwe Yahova angamusamalirira. (Sal. 42:8) Kupemphera kochokera pasi pa ntima kwa Yahova, kungatithandize kubvesa bwino maganizo yathu na kugumana pomwe mphanvu kuti tikwanise kupirira.
Mulevi yemwe adanemba Salimo 42 adafotokoza va mu ntima vose kwa Yahova tikambafotokozera Yahova vose na momwe tikubvera, tingakwanise kuona vinthu mu njira inango. (Onani ndime 16)
17. (a) Ko pemphero ya mneneri Yona inkutipfunzisa chani? (Yona 2:1, 2) (b) Ndawa chani ni vabwino kusunga malemba yanango ya m’Baibolo m’maganizo yathu, ninge ya m’Masalimo? (Onani mawu ya m’nyantsi.)
17 Werengani Yona 2:1, 2. Mneneri Yona adachita pemphero mwiyi panthawe yomwe wenze m’mimba mwa chintsomba chikulu. Iye wenze alibe kubvera Yahova, olo nteno iye wenze na chitsimikizo chakuti Yahova amubvesere. Mu pemphero yake Yona adaphatisa mawu yazinji yomwe yagumanika m’Masalimo.d Vimwevi vikuonesa kuti iye ambayadziwa bwino mawu mwaya. Kuganizira mawu mwaya kudamuthandiza kuthemba Yahova kuti amuthandize. Mwanjira ibodzibodzi mweyi, tingachite bwino kusungako mavesi yanango ya m’Baibolo m’maganizo mwathu. Mwanjira mwiyi, tikambapemphera panthawe yoshupa tidzakumbukire malemba mwaya ndipo yadzatilimbikise.
PITIRIZANI KUCHITA MAPEMPHERO YOMWE YANGAKUTHANDIZENI KUFENDERERA YAHOVA
18-19. Ko lemba ya Aroma 8:26, 27 ititsimikizira va chani? Perekani chitsanzo.
18 Werengani Aroma 8:26, 27. Nthawe zinango tikakhala na nkhawa tikwanisalini kumuuza Yahova momwe tikubvera, podiya viri teno tingathembe thandizo ya Yahova. Panthawe mwiyi, mzimu uchena wa Mulungu “ugwigwirira” m’malo mwa isepano. Ko vichitika tani? Yahova adaphatisa basa mzimu uchena kuti uthandize onemba Baibolo kuti akwanise kunemba mapemphero mwaya. Tikakhala kuti tikukwanisalini kumuuza bwinobwino maganizo yathu mpemphero, Yahova angaone mbali zinango za mapemphero yonembewa m’mawu yake ninge mapemphero yathu ndipo iye angadawire mapemphero mwaya ninge kuti ni yathu.
19 Kudziwa vimwevi kudathandiza mulongo munango wa ku Russia dzina yake Yelena. Iye adaikhiwa mudjeri ndawa ya kupemphera na kuwerenga Baibolo. Yelena adakhala wokwinyirira maninge ndipo ambaona kuti ni voshupa kuchita pemphero. Iye adati: “Nikakhala na nkhawa maninge ndipo peno nikudziwalini vomwe ningakumbire mpemphero, Yahova adawira mapemphero ya atumiki wake wakalekale . . . ninge kuti ni yangu . . . Vimwevi vidanilimbikisa maninge panthawe yoshupa yose mwiyi.”
20. Tikakhala kuti tinankhawa, ko tingachitetani kuti tikonzekerese maganizo yathu kuti tichite pemphero?
20 Tikakhala na nkhawa nkupemphera, tingakhale wodekha pomwe tikugumana na mabvuto. Kuti tikonzekerese maganizo yathu, tingabvesere mavesi yanango yochita kutepewa ya mu Salimo. Komasoti tingayesese kuchita kunemba momwe tikubvera ninge momwe Davide adachitira. (Sal. 18, 34, 142; misolo.) Chaivo ni vakuti palibe njira ibodzi ya momwe tingakonzekerere kuchita pemphero. (Sal. 141:2) Yesesani kuzindikira vomwe ni vabwino kwa imwepo.
21. Ko ndawa chani tifunika kupemphera kwa Yahova kuchokera pasi pa ntima?
21 Ni volimbikisa kudziwa kuti Yahova abvesa maganizo yathu olo tikalibe tamuuza chirichose. (Sal. 139:4) Olo nteno, iye akhala wokondwa pakutibvesera na kuwonesa kuti timuthemba. Ndipomwapa, ayi kukhala na mantha pakupemphera kwa Ababa wanu waku dzulu. Phatisirani basa mapemphero ya m’Baibolo kuti yakulimbikiseni. Pempherani na ntima wose. Mufotokozereni va chimwemwe chanu na mabvuto yanu. Yahova ni shamwali wanu wabwino ndipo nthawe zose adzakhale kusaidi yanu!
NYIMBO NA. 45 Vinthu vomwe niganiza
a Onani “makhalidwe yanango ya Yahova yomwe yaonekera maninge” yomwe yatomolewa pa bukhu yakuti: Malemba yothandiza pa moyo wathu wachikhrisitu. Pa msolo wakuti “Yahova.”
b Kazinjikazinji mapemphero yomwe yachitiwa pagulu mu mpingo yakhala yachigwato maninge.
c M’mapemphero yake, Hana adaphatisa basa mawu yolingana na yomwe Mose adanemba. Ndipomwapa ni vosakaikisa kuti iye ambapatula nthawe kuti ambaganizire Malemba. (Deut. 4:35; 8:18; 32:4, 39; 1 Sam. 2:2, 6, 7) Patsogolo pa magole yazinji, Mariya amayi wake wa Yesu adaphatisa basa mawu yotamanda, yolingana na yomwe Hana adaphatisa basa mu pemphero yake.—Luka 1:46-55.
d Mwakulinganiza, pemphero ya pa Yona 2:3-9 onani momwe Yona adatomolera mawu yazinji ya mu Salimo. Mawu mwaya ni ya mu Salimo 69:1; 16:10; 30:3; 142:2, 3; 143:4, 5; 18:6; na 3:8