Abale anyowani awiri wa mu Bungwe Yotonga

PA 5 OUTUBRO 2024, pa nsonkhano wa pagole padachitiwa chilengezo chapadera chakuti: M’bale Jody Jedele na Jacob Rumph aikhiwa kukhala wa m’Bungwe Yotonga ya Mboni za Yahova. Abale mwawa atumikira Yahova mokhulupirika kwa magole yazinji.

M’bale Jedele adabadwira ku Missouri, Estados Unidos ndipo adakulira mu banja ya Mboni. Ambakhala pafupi na dera komwe kwenze wofalisa ang’onog’ono. Ndipomwapa iye adadziwana na abale azinji wa madziko yanango omwe ambabwera kudzathandiza basa yolalikira ntontholo wabwino. Chikondi na mbverano wa abale mwawa vidachitisa kuti nayembo afune kuchitambo utumiki wa nthawe zose. Iye adabatizika akali mng’ono maninge, pa 15 Outubro, 1983. Iye ambakonda maninge kulalikira ndipo pomwe adamaliza kupfunza shikola adayamba kuchita upainiya wokhazikika mu Setembro 1989.

Pomwe m’bale Jedele wenze mulumbwana, azibereki wake ambamutenga pabodzi na mulongosi wake kuti akazungire Beteli. Vimwevi vidamuchitisa kudziyikhira cholinga chofuna kutumikira pa Beteli ndipo wose awiri adachikwanirisa. M’bale Jedele adayamba kutumikira ku Beteli yaku Wallkill mu Setembro 1990. Choyamba, adayamba kutumikira mu Dipatimenti ya Ukhuzi patsogolo pake adatumikira mu Dipatimenti ya Shipitali.

Vingachitike kuti pa nthawe mweyo, mipingo ya chiyankhulo cha Espanhol mudera mweire yadayamba kuwanda ndipo pambafunika abale. Pamwapo m’bale Jedele adafulukira mumpingo unango ndipo adayamba kupfunzira chiyankhulo cha Espanhol. Patsogolo pake adadziwana na Damaris, mpainiya wokhazikika wa mudera mweire. Patsogolo pake iwo adalowolana ndipo adayamba kutumikira pabodzi pa Beteli.

Mu 2005 iwo adachoka pa Beteli kukasamalira azibereki wawo. Pa nthawe mwiyo iwo ambatumikira ninge apainiya okhazikika. M’bale Jedele adakhala mulangizi wa Shikola ya Utumiki ya Apainiya. Iye adatumikira pomwe mu Komiti Yoyankhula na wa Kushipitali na mu Komiti ya Chimango.

Mu 2013, banja mweyi idachemerewa pomwe pa Beteli na pa basa ya chimango ku Warwick. Kuyambira nthawe mwiyo, iwo atumikira pomwe ma Beteli ya Patterson na Wallkill. M’bale Jedele adaphata basa mu Dipatimenti Yowona va Mapulani na Vomangamanga na mautumiki ya Dipatimenti Yoyankhula na wa Kushipitali. Mu Março 2023, iye adayikhiwa kuti akhale wothandiza Komiti ya Utumiki. Pakukumbukira mautumiki yose yomwe wakhala nayo, iye adati: “Nthawe zinango imwepo mungakhale na mantha mukatambira utumiki unyowani. Koma ni nthawe mweyi yomwe mufunika kukumbukira kuthemba Yahova, ndawa iye angachitise imwepo kukhala chirichose chomwe akufuna.”

M’bale Rumph adabadwira ku California, Estados Unidos. Pomwe wenze mng’ono, amayi wake enze ofoka pakutumikira Mulungu, koma iwo ambachita khama kupfunzisa wana wawo chonadi cha m’Baibolo. Kuingizira mwapo, gole iliyose ambazungira ambuya wawo womwe enze Mboni yokhulupirika. Iwo adathandiza Rumph kukulisa chidwi chake pa chonadi ndipo ali na magole 13 adakumbira kuti ayambe kupfunzira Baibolo. Pa 27 Setembro, 1992, adakali mulumbwana m’bale Rumph adabatizika. Chokomedza nchakuti amayi wake adakhala pomwe wolimba pakutumikira Mulungu ndipo banja yawo yose mwakankulumize idabatizika.

Pomwe wenze mulumbwana, m’bale Rumph adaona momwe apainiya enzere okondwa. Pomwe adamaliza shikola iye adayamba kuchita upainiya mu Setembro 1995. Mu 2000, iye adafulukira ku Equador komwe kumbafunikira wofalisa azinji. Kumuko iye adadziwana na Inga, mpainiya wokhazikika wa ku Canadá ndipo patsogolo pake adalowolana. Padandolowolana adayenda kukatumikira ku thaundi inango ya ku Equador komwe kwenze kagulu kang’ono ka ofalisa. Ntsiku zino mu thaundi mweyi muna mpingo ubodzi omwe muna wofalisa azinji.

Kuyenda kwa nthawe banja ya m’bale Rumph adaikhiwa kuti akatumikire ninge apainiya wapadera ndipo patsogolo pake adatumikira ninge wonyang’anira dera. Mu 2011 adachemerewa kukangena mushikola ya Giliyadi kalasi namba 132. Pomwe adamaliza shikola mweyi, adatumikira malo yosiyanasiyana ninge pa Beteli, amishonale na wonyang’anira dera. M’bale Rumph adakhala pomwe na mwayi wokhala mulangizi wa Shikola ya Olalikira va Ufumu.

Ndawa ya matenda ya coronaviru, Banja ya m’bale Rumph idabwerera pomwe ku Estados Unidos. Iwo adachemerewa kuti akatumikire Beteli yaku Wallkill ndipo ni komwe m’bale Rumph adapfunzisiwa mu Dipatimenti ya Utumiki. Kuyenda kwa nthawe, adauziwa kuti akatumikire pomwe ku Beteli yaku Equador, komwe m’bale Rumph adatumikira mu Komiti ya Nthambi. Mu 2023 adatumiziwa ku Warwick. Mu Janeiro 2024, m’bale Rumph adaikhiwa kuti atumikire ninge wothandiza mu Komiti ya Utumiki. Pakukumbukira malo yomwe watumikira iye adati: “Vomwe vichitisa utumiki kukhala wapadera sikuti ni malo koma wanthu womwe unkuphata nawo basa.”

Isepano titembeja maninge ndawa ya basa ikulu yomwe abale mwawa achita ndipo ‘tipitirize kulemekeza abale mwawa.’—Afil. 2:29.