Wonyang’anira djeri adapfunzira mawu ya Yahova

Ku Filipi, kwenze nyabasa munango mtsikana yemwe wenze na chiwanda. Chiwanda mwicho chimbachitisa mtsikana muyo kuti ambalosere vakutsogolo ndipo chimbachitisa pomwe kuti mabwana yake yalemere. Manje Paulo na Sila padafika ku Filipi, mtsikana muyo ambawalondola kwa ntsiku zizinji. Chiwanda mwicho chimbamuchitisa kukuwa kuti: “Wanthu awa ni akapolo wa Mulungu Wam’dzulum’dzulu!” Paulo padaneta navo, adauza chiwanda mwicho kuti: ‘Ninkukulamula mu dzina ya Yesu Khrisitu kuti, ubule mwa mtsikana moyu!’ Nthawe mwiyo chiwanda mwicho chidamusiya.

Mabwana ya mtsikana muyo payadawona kuti mwayi wogumanira kobiri wamala, adakalipa maninge. Iwo adaphata Paulo na Sila nkuwayendesa ku tilibunali ndipo adanena kuti: ‘Wanthu mwawa ankuphwanya malamulo ndipo ankusokoneza maninge muthaundi muno!’ Pamwapo akuluakulu wa boma adalamula kuti Paulo na Sila ashapuliwe, patsogolo pake adawafungira mudjeri. Adawafungira mu djeri ya m’dima ndipo adawaphinirira minyendo yawo na matabwa yobowola.

Mudjeri mumo Paulo na Sila ambaimba nyimbo zotamanda Mulungu ndipo wadjeri anango ambabvesera. Manje pakati pa usiku, kudachitika chivomezi chomwe chidagunduza maninge djeri mwiyo. Misuwo yose yadafunguka ndipo matcheni yomwe enze adamangira wadjeri wose yadamasuka. Wonyang’anira djeri ule padathamanga nkugumana kuti misuwo yafunguka, adaganiza kuti wadjeri wose athawa. Pamwapo adatenga chibemba kuti adziphe.

Koma Paulo adauza nsocha ule kuti: ‘Ayi kudzipha! Tose tiri momuno!’ Wonyang’anira djeri muyo adangena mwakankulumize nkugwada pafupi na Paulo na Sila. Patsogolo pake adabvunza kuti: “Nichite chani kuti nipulumuke?” Iwo adamudawira kuti: ‘Iwepo na banja yako mufunika kukhulupirira Yesu.’ Patsogolo pake Paulo na Sila, adayamba kupfunzisa wonyang’anira djeri muyo na banja yake mawu ya Yahova ndipo wose adabatiziwa.