Wanthu wa makhaindi yanango adabva ntontholo wabwino

Atumi adabvera lamulo ya Yesu yakuti ntontholo wabwino ulalikiriwe padziko yose. Mu 47 Yesu wayenda kale kudzulu, abale wa ku Antiokeya adatumiza Paulo na Baranaba kuti akalalikire. Wanthu awiri mwawa adafambafamba ku Ásia Minor ndipo adakafika ku Debe, ku Lusitara na ku Ikoniyo.

Paulo na Baranaba ambalalikira kwa aliyese, kwa olemera panango kwa osauka, nkulu panango mng’ono. Wanthu azinji ambabvesera. Paulo na Baranaba akulalikira governadori munango dzina yake Sergio Paulo, munthu munango wamatsenga ambafuna kusokoneza. Pamwapo Paulo adamuuza kuti: ‘Yahova akulange iwepo.’ Nthawe mweyoletu, munthu moyu adakhala lombe. Governadori ule padawona vimwevi, adakhala wokhulupirira.

Paulo na Baranaba ambalalikira m’mamiyi, m’mabazali, m’misewu komasoti m’masunagoge. Padafika ku Lusitara, adapolesa munthu munango wopunduka. Pamwapo wanthu padawona vimwevi, adafuna kuwatumikira pakuganiza kuti iwo ni milungu. Koma Paulo na Baranaba adawauza kuti: ‘Wanthu imwe, isepano ndise wanthu ninge imwepo, mumbatumikire Mulungu yekha basi!’ Koma patsogolo pake kudabwera Ayuda omwe adasokoneza maganizo ya wanthu. Nthawe mwiyo wanthu adayamba kumuthusira minyala Paulo ndipo patsogolo pake adamukwekwetera kunja kwa thaundi pakuganiza kuti wafa. Koma Paulo wenze akana moyo! Pavidateno abale adayenda nkukamutenga nkuyenda naye mu thaundi. Patsogolo pake, Paulo adabwerera ku Antiokeya.

Mu 49 Yesu wayenda kale kudzulu, Paulo adanyamuka ulendo unango. Padachoka ku Ásia Minor, adayenda kukalalikira ku Europa. Iye adafika ku Atene, ku Filipi, ku Tesalonika komasoti m’madera yanango. Pa ulendo moyu wenze na Sila, Luka komasoti mulumbwana munango dzina yake Timoteyo. Iwo ambaphatira basa pabodzi yokhazikisa mipingo na kuyalimbikisa. Paulo adakhala ku Korinto kwa gole ibodzi na hafu, na cholinga chakuti alimbikise abale kumuko. Iye ambalalikira, kupfunzisa na kunemba makalata yoyenda ku mipingo yosiyanasiyana. Koma ambaphata pomwe basa yokonza matenti kuti ambagumane kobiri. Patsogolo pake, Paulo adabwerera ku Antiokeya.

Mu 52 Yesu wayenda kale kudzulu, Paulo adayamba ulendo wachitatu, padachoka ku Ásia Minor adakafika ku Filipi ndipo patsogolo pake adayenda ku Korinto. Iye adakhala magole yanganani ku Efeso, komwe ambapfunzisa, kupolesa wanthu komasoti kuthandiza mpingo kumuko. Ntsiku iriyose, ambakamba nkhani mu nyumba pa shikola inango. Wanthu azinji ambabvesera ntontholo wake ndipo adachinja makhalidwe yawo. Paulo pomwe adalalikira m’madera yazinji, adayenda ku Yerusalemu.