Paulo na Timoteyo

Timoteyo wenze m’bale wachilumbwana mu mpingo wa ku Lusitara. Ababa wake enze m’Giriki ndipo amayi wake enze m’Yuda. Amayi wake dzina yawo enze a Yunike ndipo ambuya wake enze a Loisi. Timoteyo adapfunzira mawu ya Mulungu kuyambira ali kacheche ndipo adamupfunzisa ni a mayi wake komasoti ambuya wake.

Paulo padafika ku Lusitara pa ulendo wake wachiwiri, adadziwa kuti Timoteyo akonda maninge abale ndipo wenze na ntima wofuna kuthandiza. Pamwapo Paulo, adakumbira Timoteyo kuti ayende naye. Paulo adapfunzisa Timoteyo kulalikira komasoti kupfunzisa ntontholo wabwino mwaluso.

Mzimu uchena udathandiza Paulo na Timoteyo kulikose komwe ambayenda. Ntsiku inango usiku, Paulo adawona masomphenya, adawona munthu ankumuuza kuti ayende ku Makedoniya kuti akawathandize. Ndipomwapa Paulo, Timoteyo, Sila na wanthu anango, adayenda kukalalikira ku Makedoniya ndipo adakhazikisa mipingo.

Padafika mu thaundi ya Tesalonika, wanthu azinji adakhala Akhrisitu koma Ayuda anango ambachitira njiru Paulo na anzake. Iwo adanyengerera gulu ya wanthu nkutenga Paulo na anzake mwawo nkuyenda nawo kwa wolamulira wa mu thaundi mwiyo. Wanthu mwawo adakuwa kuti: ‘Wanthu awa ni azondi wa boma ya Roma!’ Pamwapa moyo wa Paulo na Timoteyo wenze pangozi, pakudandoti kwadoka, iwo adathawira ku Bereya.

Wanthu wa ku Bereya enze na ntima wofuna kubvesesa ntontholo wabwino ndipo Agiriki na Ayuda adakhala okhulupirira. Koma Ayuda ochokera ku Tesalonika padabwera, adayambisa chipiringu. Pavidateno, Paulo adachoka nkuyenda ku Atene. Timoteyo na Sila adakhala ku Bereya muko kuti alimbikise abale. Paidapita nthawe, Paulo adatumiza Timoteyo ku Tesalonika kuti akalimbikise abale kumuko, omwe ambadzudziwa maninge. Patsogolo pake adamutumiza pomwe ku mipingo yanango kuti akalimbikise abale na alongo.

Paulo adauza Timoteyo kuti: ‘Yemwe ankufuna kutumikira Yahova adzadzudziwe.’ Timoteyo adadzudziwa komasoti kufungiriwa mu djeri ndawa yotumikira Mulungu. Iye ambawona kuti moyu ni mwayi wake wowonesa kuti ni wokhulupirika kwa Mulungu.

Paulo adauza Akhrisitu wa ku Filipi kuti: ‘Nakutumizirani Timoteyo kuti adzakupfunziseni vomwe mufunika kuchita pakutumikira Mulungu komasoti pakulalikira.’ Paulo adachita vimwevi ndawa yakuti Timoteyo wenze wothembeka. Iwo ambabverana maninge ndipo adatumikira Mulungu pabodzi kwa magole yazinji.