Koneliyo adatambira mzimu uchena

Ku Kaisareya kwenze munthu munango dzina yake Koneliyo. Ndipo wenze nkulu wa masocha. Olo kuti iye wenzelini Muyuda, iwo ambamulemekeza. Koneliyo ambathandiza wanthu azinji wobonera. Iye ambakhulupirira Yahova ndipo ambakonda kupemphera. Ntsiku inango, kudabwera mngelo ndipo adamuuza kuti: ‘Mulungu wabva pemphero yako. Tumiza wanthu ku Yopa, kuti akachemere munthu munango dzina yake Petulo.’ Nthawe mwiyoletu, Koneliyo adatumizadi wanthu ku Yopa ndipo wenze ulendo wa makilometro 48 ku norte kwa Kaisareya.

Panthawe mwiyi nkuti Petulo ali ku Yopa ndipo wanthu wale enze munjira, iye adaona masomphenya. Adaona nyama zomwe Ayuda ambabvumiziwalini kudya, ndipo adabva mawu yankumuuza kuti adye nyama mwizo. Petulo adalamba ndipo adanena kuti: ‘Inepano chibadwire changu nikanati nadyako nyama mwezi.’ Koma mawu yadabvekasoti kuti: ‘Ulekeretu kunena kuti nyama mwezi ni zopsipiziwa. Ndawa Mulungu wazichenesa.’ Patsogolo pake Petulo adauziwa kuti: ‘Pali wanthu atatu omwe akufuna kugumana nawe. Yenda nawo pabodzi.’ Petulo adayenda kukagumana na wanthu mwawo ndipo padawapasa moni, wanthu mwawo adamuuza kuti: ‘Watituma ni nkulu munango wa masocha dzina yake Koneliyo. Wanena kuti tikutengeni tiyende namwe pabodzi ku Kaisareya.’ Petulo adangena nawo m’nyumba nkuwasamalira ninge alendo wake. Mangwana yake, adanyamuka nawo nkuyenda ku Kaisareya, ndipo adayenda pomwe na abale anango wa ku Yopa.

Patsogolo pake adafika ku Kaisaleya, Koneliyo padaona Petulo adamugwadira nkujolima mpakana nkhope yake pasi. Koma Petulo adamuuza kuti: ‘Imirirani! Ndawa inembo ndinembo munthu ninge imwepo.’ Patsogolo pake, adamuuza kuti: ‘Ayuda angenalini m’nyumba za wanthu wa makhaindi yanango, koma Mulungu waniuza kuti nibwere kunyumba kwanu kuno. Manje niuzeni chomwe mwanichemerera.’

Koneliyo adauza Petulo kuti: ‘Ntsiku 4 zapita izi panthawe yomwe nimbapemphera kwa Mulungu, mngelo adaniuza kuti nitumize wanthu kudzakuchemerani. Pulizi nipfunziseni mawu ya Mulungu.’ Petulo adanena kuti: ‘Nadziwa kuti Mulungu alibe tsankho. Iye atambira aliyese yemwe akufuna kumutumikira.’ Petulo adawapfunzisa vinthu vizinji va Yesu. Patsogolo pake mzimu uchena udafika pa Koneliyo na kwa wanthu omwe enze naye ndipo wose mwawo adabatiziwa.