Yesu adasankhula Saulo

Saulo wenze wa ku Roma ndipo adabadwira ku Tariso. Iye wenze mfalisi ndipo ambadziwa bwino Chilamulo cha Mose, koma ambawazonda maninge Akhrisitu. Ambawaphata nkuwayendesa kudjeri. Iye wenzepo pomwe wanthu wa ukali ambaboma Sitefano na minyala mpakana kumupha.

Koma Saulo viribe kumukwanira kumanga Akhrisitu ku Yerusalemu. Pamwapo adakumbira kwa nkulu wa antsembe kuti akaphate pomwe Akhrisitu wa mu thaundi ya Damasiko. Koma padasala pang’ono kufika mu thaundi mwiyo, mwadzidzidzi adaona kugaka ndipo adagwa pasi. Patsogolo pake adabva mawu yakuti: ‘Saulo, ko ukunidzudziranyi?’ Iye adabvunza kuti: ‘Ndimwe mbani?’ Mawu yale yadabveka pomwe kuti: ‘Ndine Yesu. Yenda ku Damasiko ndipo ukauziwe vofunika kuchita.’ Nthawe mwiyoletu, Saulo adakhala lombe, mwakuti ambakwanisalini pomwe kuwona ndipo adachita kumuphata djanja nkumbamutsogolera.

Ku Damasiko kwenze Nkhrisitu munango dzina yake Hananiya. Yesu adauza Hananiya kuti: ‘Nyamuka yenda munsewu wa sitiriti ndipo ukafike pa nyumba ya Yudasi, nkubvunza va munthu wochemerewa Saulo.’ Koma Hananiya adanena kuti: ‘Ambuya, munthu muyu nikumudziwa bwino! Akuphata opfunzira nkumbawafungira mudjeri!’ Koma Yesu adanena kuti: ‘Yenda. Nasankhula Saulo kuti ambalalikire ntontholo wabwino kwa wanthu wa makhaindi yazinji.’

Hananiya adayendadi ndipo padagumana na Saulo, adamuuza kuti: ‘M’bale wangu Saulo, Yesu wanituma kuti nidzafungule maso yako.’ Nthawe mwiyoletu Saulo adayamba kuwona. Adadziwa va Yesu ndipo adakhala wopfunzira wake. Padabatiziwa, adayamba kulalikira m’masunagoge, ndipo Ayuda adadabwa maninge padawona kuti Saulo wayamba kupfunzisa wanthu va Yesu. Iwo adanena kuti: ‘Ko ni munthulini moyu yemwe ambaphata opfunzira wa Yesu?’

Saulo adapfunzisa wanthu wa ku Damasiko kwa magole yatatu. Koma Ayuda ambazondananaye maninge ndipo adakonza pulani yakuti amuphe. Abale padabva vimwevi adamuikha m’dengu nkumubulisa panja na pajanela ya mpanda.

Saulo padafika ku Yerusalemu ambafuna kuti ambakhale pabodzi na abale. Koma abale mwawo ambamugopa. Patsogolo pake opfunzira munango dzina yake Baranaba, adamukomera ntima ndipo adayenda naye kwa atumi nkuwafotokozera kuti Saulo adachinja maninge ndipo manje ni Nkhrisitu. Saulo adayamba kulalikira molimba ntima pabodzi na mpingo wa ku Yerusalemu, patsogolo pake adayamba kudziwika na dzina yakuti Paulo.