Mpanda wa Yerusalemu

Vomwe tafotokoza mu msolo wapita ule vikalibe vachitika, padachitika pomwe vinthu vinango. Nehemiya wenze mu Izirayeli ndipo ambaphata basa kwa Mpfumu Aritasasita ku Susani. Manje ng’ono wake adafika kuchokera ku Yuda nkumuuza kuti: ‘Wanthu omwe adabwerera kuchoka ku Yerusalemu ali pamabvuto, mpanda wa thaundi ya Yerusalemu omwe Ababulo adaudzonga ukalibe wakonzewa.’ Vimwevi vidamukalipisa maninge Nehemiya, iye adaganiza voyenda ku Yerusalemu kukawathandiza wanthu mwawo. Patsogolo pake adapemphera kuti mpfumu imubvumize kuti ayende.

Pamwapo mpfumu idazindikira kuti Nehemiya ankukondwalini. Manje idamubvunza kuti: ‘Iwepo uwonekalini tene, ko wachita tani? Nehemiya adadawira kuti: ‘Ninkufunikadi kuwoneka wokwinyirira ndawa ya thaundi yathu ya Yerusalemu ilirini bwino.’ Mpfumu mwiyo idamubvunza kuti: ‘Manje nikuthandize tani?’ Nthawe mwiyo Nehemiya adapemphera chamuntima, pamwapo adabvunza kuti: ‘Ko munganibvumize kukamanga mpanda wake?’ Mpfumu ire idamubvumiza ndipo idawonesesa kuti akhale wotetezeka paulendo wake. Ndipo adalamula kuti akhale governadori wa Ayuda ndipo adamupasa matabwa yakuti akakonzere misuwo ya mpanda.

Nehemiya padafika ku Yerusalemu, adazungira mpanda wose. Patsogolo pake, adasonkhanisa antsembe na atsogoleri nkuwauza kuti: ‘Akuluakulu vinthu vilirini bwino ndipo tinkufunika kumanga pomwe mpanda moyu.’ Wanthu mwawo adabvuma ndipo basa idayambika.

Koma azondi wa Aizirayeli ambawaseka nkumbalewa kuti: ‘Nkhandwe ingagwese kampanda kanu aka.’ Koma Aizirayeli mwawo alibe kubvera vimwevi ndipo adapitiriza kuphata basa yawo mwiyo. Ambamanga bwinobwino mpanda wawo ndipo umbaoneka wolimba.

Azondi mwawo ambaganiza vomenyana na Aizirayeli kuchokera ku mbali zosiyanasiyana. Ayuda padabva vimwevi adachita mantha, koma Nehemiya adawauza kuti: ‘Ayi kugopa, Yahova atithandize.’ Manje adaikha magwarda yakuti yambateteze wanthu omwe angaphata basa mwiyo ndipo azondi mwawo alibe kumenyana nawo.

Pazidandomala ntsiku 52, basa yose yokonza mpanda komasoti misuwo idamala. Manje Nehemiya adachemeresa Alevi wose ku Yerusalemu kuti adzaufungulire. Adakonza vakuti pakhale magulu yawiri yoimba, magulu mwayo yambapita padzulu pa mpanda muyo na ntsikada za pamsuwo womwe wenze pafupi na kamadzi. Ezara na gulu inango adayenda kumbali inango ya thaundi mweyo ndipo Nehemiya nagulu inango adayenda mbali inango. Ambatamanda Yahova pakuimba malipenga, vinganga na azeze. Magulu yawiri mwaya yambagumana pamalo pomwe penze kachisi. Patsogolo pake wanthu wose amuna, akazi na wana kubodzi adapereka ntsembe kwa Yahova ndipo adachita chikondwerero ndipo penze zungo yowonesa kukondwa.