Ezara ambapfunzisa Chilamulo cha Mulungu

Penze padapita magole 70, kundochokera pomwe Aizirayeli adabwerera ku Yerusalemu. Koma penze Aizirayeli anango omwe ambakhala m’madera yanango ya mu ufumu wa Perisiya. M’bodzi mwa wanthu mwawa wenze Ezara, iye ambapfunzisa wanthu Chilamulo cha Yahova. Ezara adabva kuti wanthu anango omwe ambakhala ku Yerusalemu ambatewedzalini Chilamulo. Patsogolo pake, adaganiza voyenda kuti akawathandize. Mpfumu Aritasasita idamuuza kuti: ‘Mulungu wakupasa nzeru kuti umbapfunzise Chilamulo chake. Yenda ku Yerusalemu ndipo ungatenge aliyese yemwe ankufuna kuyenda nawe.’ Ezara adagumana na wose omwe ambafuna kubwerera ku Yerusalemu. Iwo adapemphera kwa Yahova kuti awathandize kuti afambe bwino pa ulendo moyu, patsogolo pake adanyamuka.

Payapita minyezi 4, adafika ku Yerusalemu. Atsogoleri adauza Ezara kuti: ‘Aizirayeli asiya kubvera Yahova ndipo alowola akazi omwe atumikira milungu yabodza.’ Manje ko Ezara adachita tani? Iye adagwada pamaso pa wanthu ose mwawo nkupemphera kuti: ‘Yahova mwatichitira vinthu vizinji, koma isepano takuchimwirani.’ Wanthu mwawo adalapa, koma penze chinthu chinango chomwe ambafunika kukonza. Patsogolo pake Ezara adasankhula akuluakulu na Oweruza kuti athandize wanthu mwawo. Payadamala minyezi 3, nkuti wanthu wose mwawo omwe ambatumikiralini Yahova amala kuthamangisiwa.

Manje payadamala magole 12, Aizirayeli adayamba pomwe kumanga mpanda wa Yerusalemu. Patsogolo pake, adasonkhanisa wanthu nkuyamba kuwawerengera Chilamulo cha Mulungu. Ezara padandofungula bukhu ya Chilamulo cha Mulungu, wanthu mwawo wose adaimilira. Iye adatamanda Yahova ndipo wanthu mwawo adaimisa manja yawo m’dzulu pakutamanda Yahova. Patsogolo pake, Ezara adayamba kuwerenga Chilamulo ndipo wanthu mwawo ambabvesera mwatcheru. Iwo adabvuma kuti enze adasiya kubvera Yahova ndipo adalira. Mangwana yake Ezara adapitiriza kuwawerengera Chilamulo mwicho. Wanthu mwawo adazindikira kuti afunika kuchita chikondwerero cha misasa ndipo nthawe mwiyo adayamba kukonzekera.

Aizirayeli adachita chikondwerero mwichi kwa ntsiku 7. Ndipo adakondwa komasoti adatembeja Yahova pakuwapasa vokolola vizinji, penze pakanati pachitikako chikondwerero cha misasa mwechi kundoyambira mu nthawe ya Yoswa. Chikondwerero mwechi pachidamala, wanthu mwawo adasonkhana nkupemphera kuti: ‘Yahova mudatipulumusa ku ukapolo, mudatidyesa mu chipululu komasoti mudatipasa dziko yokhuza. Koma isepano takhala tinkukuchimwirani mobwerezabwereza. Mudatitumizira Aneneri koma tiribe kuwabvera, koma mudatikomera ntima ndipo mudasunga polomisi yanu kwa Abulahamu, manje tinkukupolomisani kuti timbakubvereni.’ Padachita vimwevo adanemba polomisi yawo mweyo ndipo atsogoleri, Alevi komasoti wantsembe adatsimikiza va polomisi yawo mweyo na chidindo chawo.