Vomwe viri muchigawo 11

Mu chigawo mwechi, munankhani zochokera m’Malemba ya Chigiriki. Yesu adabadwira m’banja yosauka yomwe imbakhala mu kathaundi kang’ono. Iye ambaphata basa yopala matabwa pabodzi na ababa wake. Koma Yesu adapasiwa udindo wopulumusa wanthu. Yahova adamusankhula kuti akhale Mpfumu ya Ufumu wa kudzulu. Peno ndimwe m’bereki, thandizani mwana wanu kudziwa kuti Yahova adasankhula mwanzeru banja komasoti malo yakuti Yesu abadwire na kukulira. Muthandizeni kudziwa vomwe Yahova adachita pa kuteteza Yesu kuti osati aphewe na Herode. Mu chigawo mwechi, tione umboni wakuti palibe chomwe chingakangise Yahova kukwanirisa cholinga chake. Tione pomwe kuti Yahova, adatuma Yohani kuti akonzere Yesu njira. Pakukambirana, tsimikizirani umboni woonesa kuti Yesu ambatewedza mpfundo za Yahova kuyambira ali mwana ndipo ambazikonda maninge.