Yahova alibe kumuyebwa Yosefe

Yosefe pomwe wenze mu djeri, Farao yemwe wenze mpfumu ya ku Iguputo, adalota maloto ndipo palibe yemwe ambadziwa tanthauzo ya maloto mwayo. Nyabasa munango wa Farao adalewa kuti Yosefe angakwanise kutsumbudzulira maloto mwayo. Nthawe mwiyo Farao adachemeresa Yosefe.

Padafika, Farao adamubvunza kuti: ‘Ko ungakwanise kutsumbudzulira loto yangu? Pamwapo Yosefe adadawira kuti: ‘Pa magole 7 yomwe yankubwera, mu Iguputo muno mudzakhale vakudya vizinji. Koma patsogolo pake kudzabwere magole yanango 7 ya njala. Musankhule munthu wanzeru kuti asonkhanise vakudya kuti wanthu wanu ayi kuti adzafe na njala.’ Farao adadawira kuti: ‘Nakusankhula iwepo ukhale wachiwiri wangu. Ko Yosefe adadziwa tani tanthauzo ya maloto ya Farao? Yahova ni yemwe adamuthandiza.

Manje Yosefe adasonkhanisa vakudya kwa magole 7. Patsogolo pake, mu dziko mose mwenze njala ninge momwe iye adanenera. Wanthu wochokera m’madziko yosiyanasiyana, ambabwera kudzagula chakudya kwa Yosefe. Manje ababa wake padabva kuti ku Iguputo kuna chakudya, adatuma wana wawo 10 kuti ayende kukagula chakudya.

Wana wa Yakobo adayenda kwa Yosefe ndipo pomwe adawaona azibale wake mwawo, iye adawazindikira. Koma azibale wake mwawo alibe kumuzindikira, iwo adamugwadira ndipo vimwevi venze vobverana na vomwe Yosefe adalota ali ng’ono. Koma iye ambafuna kudziwa peno azibale wake mwawo enze akali wanthu woipa. Patsogolo pake, adawauza kuti: ‘Imwepo ndimwe akazitape mwabwera kuno kudzaona malo yathu yomwe yali yofoka.’ Koma iwo adadawira kuti: ‘Neye shuwa, tachokera ku Kanani ndipo m’banja mwathu tenzemo amuna 12 m’bale wanthu munango adamwalira ndipo m’ng’ono wasala na ababa wathu!’ Patsogolo pake Yosefe adalewa kuti: ‘Mukabwere na m’ng’ono wanu uyo kuti nikukhulupirireni.’ Pamwapo azibale wake wa Yosefe adabwerera kwawo.

Manje chakudya chire chidamala, Yakobo adauza pomwe wana wake kuti ayende pomwe ku Iguputo. Paulendo moyu adatenga ng’ono wawo ule ndipo dzina yake wenze Benjamini. Pakufuna kuwayesa azibale wake, Yosefe adabisa khapu yake m’sakha mwa Benjamini nkuwauza kuti aba khapu mwiyo. Anyabasa wa Yosefe adagumana khapu mwiyo m’sakha mwa Benjamini ndipo mwevi vidadabwisa maninge azibale wake wale. Iwo adakumbira Yosefe kuti awalange m’malo mwa Benjamini.

Pamwapa Yosefe adadziwa kuti azibale wake achinja maninge. Iye adakangira kudziphata mwakuti adayamba kulira nkulewa kuti: ‘Ndine Yosefe m’bale wanu ule. Ko ababa akana moyo? Azibale wake wale adadabwa maninge koma iye adawauza kuti: ‘Ayi kudandaula na vomwe mudanichitira vire. Mulungu ni yemwe adanitumiza kuti nikupulumuseni, yendani mukatenge ababa mubwere nawo kuno.’

Azibale wake mwawo adakondwa maninge ndipo adayenda kukauza ababa wawo nkhani yokomedza mweyi ndipo adawatenga nkuyenda nawo ku Iguputo. Yosefe na ababa wake padagumana pomwe, adakondwa maninge ndawa penze padapita magole yazinji akanati agumana.