Mibvunzo yochokera kwa owerenga

Lemba ya Miyambo 30:18, 19 inena kuti ‘njira ya mwamuna na mtsikana’ ni ‘yodabwisa maninge.’ Ko mawu mwaya yankutanthauza chani?

Wanthu azinji kuphatanidzapo opfunza maninge, adzibvunza tanthauzo ya mawu mwaya. Lemba yose mu Baibulo la Dziko Latsopano inena kuti: ‘Pana vinthu vitatu vomwe vinidabwisa maninge. Komasoti vinthu vinayi vomwe inepano nivibvesalini. Njira ya mphungu m’dzulu, njira ya nyoka pamwala, njira ya barko m’madzi komasoti njira ya mwamuna na mtsikana.’—Miy. 30:18, 19.

Kalekale timbabva ninge kuti mawu yakuti ‘njira ya mwamuna na mtsikana,’ yanatanthauzo yoipa. Ndawa chani? Ndawa yakuti mawu ya patsogolo pake na mawu ya pambuyo pake yanena vinthu voipa vomwe vikhutiralini panango kunena kuti “ndimo.” (Miy. 30:15, 16) Kuingizira mwapa, vesi 20 inena va ‘nkazi yemwe achita chigololo,’ koma anena kuti nilibe kuphonya chirichose. Ndipomwapa, timbaganiza kuti ninge mwairiri mphungu yomwe imbululuka m’dzulu maninge, nyoka yomwe ifamba pamwala panango barko yomwe ifamba m’nyanja yonoka maninge, koma vose vimwevi vichita vimwevi ne kusiya chizindikiro chirichose, munthu angachitembo chinthu ne kuzindikiriwa na munthu aliyese. Ndawa yoganizira vinthu vimwevi, timbaganiza ninge kuti mawu yakuti ‘njira ya mwamuna na mtsikana,’ yankutanthauza vinthu voipa ninge vakuti: Mulumbwana wochenjera yemwe ankunyengerera mtsikana wosaphonya, yemwe ankudziwalini chirichose kuti agone naye.

Koma tinavifukwa vobveka vomwe vinkutichitisa kuona kuti mavesi mwaya yanatanthauzo yabwino. Chaivo ni vakuti, wonemba mavesi mwaya ambachita chidwi na vinthu vomwe iye adavifotokoza.

M’mipukutu yakalekale ya Chiheberi, yafotokozambo kuti mawu mwaya yanatanthauzo yabwino. Bukhu ya Léxico Teológico do Velho Testamento, inena kuti: Mawu ya Chiheberi yotsumbudzuliriwa kuti ‘ni vodabwisa maninge kwa ine,’ yomwe yagumanika pa Miyambo 30:18, “yatanthauza chinthu chomwe munthu . . . angachite nacho chidwi panango kuchiwona kuti nichosakwanisika.”

Crawford H. Toy ticha wa Universidade wa ku Estados Unidos, adatsimikizirambo kuti mawu mwaya yankutanthauzalini vinthu voipa. Iye adati: “Chaivo ni vakuti wonemba mavesi mwaya ambayesesa kufotokoza momwe vinthu mwevi viriri vochitisa chidwi.”

Ndipomwapa, ni vobveka kukhulupirira kuti mawu ya pa Miyambo 30:18, 19, yankufotokoza va vinthu vochitisa chidwi vomwe tingakwaniselini kuvibvesa. Molingana na munthu yemwe adanemba mwambi moyu, tichita chidwi tikaona mphungu inkumbululuka m’dzulu maninge, nyoka ilibe minyendo inkukwira mwala ukulu maninge, barko ikambafamba m’nyanja ikulu maninge na mwamuna pabodzi na mtsikana akakondana nkulowolana nkukhala na banja yokondwa maninge.