MBIRI YA MOYO
Yahova watithandiza ‘kukula pomwe tidabzaliwa’
“KULANI pomwe mwabzaliwa.” Yamwaya yangakhale ninge malangizo yosabveka, koma osati kwa Mats na Ann-Catrin, banja inango ya ku Suécia yomwe “idabzaliwa” m’malo yosiyanasiyana. Ko malangizo mwaya yadawathandiza tani?
Mats na Ann-Catrin adangena mu Shikola ya Giliyadi mu gole ya 1979. Ni komwe adatambira malangizo mwaya na mpfunzisi wawo dzina yake Jack Redford. Patsogolo pake Mats na Ann-Catrin “adabzaliwa” panango kuti adatumiziwa kuti akatumikire ku Irã, Maurício, Mianmar, Tanzânia, Uganda na Zaire. Malangizo mwaya yambawathandiza nthawe iriyose yomwe atambira utumiki unyowani. Naboni tiwasiye afotokoze okha.
Ko mungayambe na kutiuzako momwe mudapfunzirira chonadi?
Mats: Patimbakhala ku Polônia pa nthawe ya nkhondo yachiwiri ya padziko yose, ababa wangu ambawona voipa vomwe tchetchi ya Katolika imbachita. Olo venze teno, iwo ambanena kuti: “Chonadi chiripo.” Kuyenda kwa nthawe, nidaona kuti iwo ambanena chaivo. Ine nimbakonda kugula mabukhu yazinji yophatisiwa kale basa, ndipo ibodzi mwa mabukhu mwaya yenze yagirini. Ndipo yenze na msolo wakuti: Coonadi Cimene Cimatsogolera ku Moyo Wamuyaya. Msolo moyu, udanichitisa chidwi maninge. Pomwe nidawerenga bukhu mweyi, nidazidikira kuti nagumana chonadi!
Kundoyambira mu Abril 1972, nidayamba kuwerenga vofalisa vizinji va Mboni za Yahova, ndipo nidagumana midawiro ya mibvunzo yangu yonena va Baibolo. Nimbadzibva ninge wamalonda yemwe Yesu adamufotokoza mu chitsanzo chake. Padagumana mwala ubodzi wofunika maninge, adagulisa vose vomwe wenze navo kuti agule mwala moyu. Inembo nidachinja mapulani yose yomwe nenze nayo, yakuti niyende ku universidade kuti nidzakhale mediko. Nidasiya vose vimwevi kuti nigule “mwala” wa chonadi womwe nenze nidaugumana. (Mat. 13:45, 46) Nidabatizika pa 10 Dezembro 1972.
Nikanati kumala gole, azibereki wangu na m’bale wangu mng’ono, adabvumambo chonadi ndipo adabatizika. Mu Julho 1973, nidayamba kutumikira ninge mpainiya wokhazikika. Pa gulu ya apainiya wakhama omwe enze mumpingo mwathu, penze mulongo munango wokhuza yemwe akonda Yahova, dzina yake Ann-Catrin. Tidakondana ndipo tidalowolana mugole ya 1975. Magole yanayi ya patsogolo pake, timbakhala mu thaundi yokhuza maninge ya Strömsund, ya ku Suécia, komwe wanthu azinji ambafuna kupfunzira Baibolo.
Ann-Catrin: Ababa wangu adapfunzira Baibolo pomwe angamaliza universidade ku Estocolmo. Nthawe imweyi inepano nenze na minyezi yatatu. Koma iwo ambanitenga nkuyenda nane kumisonkhano komasoti mu umboni. Amayi wangu ambakondwalini navo vimwevi, ndipo ambayesesa kunena kuti Wamboni za Yahova ni wanthulini wabwino, koma iwo alibe kukwanirisa cholinga chawo. Kuyenda kwa nthawe iwombo adabatizika. Penenze na magole 13, inembo nidabatizika. Panidafikisa magole 16, nidakhala mpainiya wokhazikika. Patsogolo pakuti natumikira ku Umeå, thaundi yomwe imbafunika ofalisa azinji, nidakhala mpainiya wapadera.
Patidalowolana na Mats, timbakondwa kuthandiza wanthu azinji kupfunzira chonadi. M’bodzi pa wanthu mwawa, ni mtsikana munango dzina yake Maivor, yemwe adasiya kutchaya bola nkuyamba kutumikira ninge mpainiya na m’bale wangu mng’ono. Iwo adangena mu Shikola ya Giliyadi mu 1984 ndipo apa ankutumikira ninge amishonale ku Equador.
Ko mudakwanisa tani kukhala okondwa na obvera malangizo pa mautumiki yosiyansiyana yamudapasiwa?
Mats: Kazinjikazinji timbatumiziwa kukachita utumiki unyowani. Koma chomwe chidatithandiza ni kutewedzera kudzichepesa kwa Yesu. (Akol. 2:6, 7) Mwakulinganiza, m’malo mwakuti tidikhire kuti abale wa kumuko azolowere chikhalidwe chathu, timbayesesa kubvesa momwe angachitira vinthu, ninge chikhalidwe chawo na kaganizidwe kawo. Ndawa yotewedzera Yesu, isepano tadzibva kuti ‘tabzaliwa m’mphepete mwamadzi’ kuti tikule pa utumiki uliwose.—Sal. 1:2, 3.
Kuyenda kukazungira mipingo, yenze mbali yomwe timbachita pafupipafupi pa moyo wathu
Ann-Catrin: Kuti muti ukwanise kukula patsogolo pakuti wazuliwa, udekana dzuwa na nvula. Nthawe zose Yahova wakhala ‘dzuwa’ kwa isepano. (Sal. 84:11) Iye watipasa abale na alongo omwe atikonda maninge. Mwakulinganiza, timbatumikira mu mpingo unango ung’ono ku Teerã ku Irã, ndipo abale wa kumoku atambira bwino anzawo. Vimwevi vidatikumbusa momwe wanthu wa kalekale ambathandiziranambo. Timbaukonda maninge utumiki wathu ku Irã, koma mu Julho 1980, boma idalambiza basa yathu ndipo idatiuza kuti tichoke mu dziko mwiyo nkati mwa ntsiku ziwiri. Adatitumiza ku Zaire komwe manjeuno kuchemerewa kuti República Democrática do Congo, ku África.
Tikondwa tikambakumbukira utumiki wathu ku Zaire, mu 1982
Pomwe nidadziwa kuti atitumize ku África, nidalira. Panidabva kuti kumuku kuli nyoka na matenda yosiyanasiyana. Koma banja inango yomwe timbakondana nayo maninge yomwe yenze idatumikira kale ku África kwa magole yazinji, idatiuza kuti: “Imwepo mukanati mwayenda ku África. Peno mungabvume utumiki moyu, mukaone kuti ku África nikwabwino maninge.” Ndipo ni vimweviletu vomwe vidachitika. Abale na alongo wakumoku ni wachikondi maninge. Patidamala magole 6, timbafunika kuchoka ku Zaire ndawa ya chidzudzo. Koma nidayamba kudziseka nekha ndawa mwapa manje nimbapemphera kwa Yahova kuti: “Pulizi Yahova, tisiyeni kuti titumikire kunkuno.”
Ko ni madaliso yaponi yomwe mwagumana ndawa yotumikira Yahova?
“Chipinda” chathu ku Tanzânia, mu 1988
Mats: Takondwa maninge ndawa yokhala pa ushamwali na amishonale anzathu, wamadziko yosiyanasiyana komasoti chikhalidwe chosiyana. Kuingizira pamwapa, pa mautumiki yanango, timbakhala okondwa maninge ndawa yochitisa mapfunziro ya Baibolo yazinji. Nthawe zinango, timbakhala na mapfunziro 20 kada munthu. Ndipo nidzayebwelini momwe abale wa ku África adatitambirira na chikondi chadatiwonesa. Pomwe timbakazungira mipingo ku Tanzânia, abale ambatitambira bwino podiya kuti ni osauka. Mwakulinganiza, tikaimisa karo yathu yomwe nkati yenze na malo yogona, ambatipasa vinthu kuti tithandizike. (2 Akor. 8:3) Ndipo tiyebwalini pomwe nthawe yomwe ine na Ann-Catrin timbakhala pasi kumaulo, nkumbaganizira vinthu vose vomwe vachitika pa ntsiku mwiyo, nkutembeja Yahova ndawa ya thandizo yake.
Ann-Catrin: Chinthu chibodzi chomwe chimbanikondweresa maninge, ni kudziwana na abale na alongo ochokera m’madziko yose. Tidapfunzira viyankhulo vinyowani, kuphatanidzapo chi Farsi, Francês, Luganda na Swahili. Ndipo tadziwa vikhalidwe vizinji vochitisa chidwi. Tathandiza pomwe opfunzira anyowani kuti afike pobatizika na kutumikira nawo Yahova mobverana.—Zef. 3:9.
Chinthu chinango chokomedza, ni kuona vinthu vosiyanasiyana vomwe Yahova adalenga. Pa utumiki uliwose unyowani, timbadzibva ninge kuti tili paulendo na Yahova yemwe atitsogolera. Taona vinthu vokomedza pakutumikira Yahova, vomwe tidakavionalini sembe tiribe kudzipereka kuti timutumikire.
Ankulalikira m’madera yosiyanasiyana ya ku Tanzânia
Ko ni mabvuto yaponi yomwe mwagumana nayo, ndipo mwalimbana nayo tani?
Mats: Nkupita kwa magole, tadwala matenda yosiyanasiyana mu madera yakupsa kuphatanidzapo malária. Ndipo nthawe zinango Ann-Catrin ambachita kudekana kuchitiwa operasawu mwakankulumize. Timbakhala pomwe na khawa ndawa ya azibereki wathu omwe ambakalamba. Ndipomwapa, tinkutembeja maninge azibale wathu wakuthupi omwe atithandiza kusamalira azibereki wathu. Iwo ambachita vimwevi mwachikondi, modekha komasoti mokondwa. (1 Tim. 5:4) Timbachita vose vomwe tingakwanise kuti tisamalire azibereki wathu olo tiri kutali. Olo viri teno, nthawe zinango timbalimbana na maganizo yofokesa, ninge nkhawa, kudziimba mulandu, ndawa timbafuna kuchita vizinji pa kuwathandiza.
Ann-Catrin: Mu 1983 ku Zaire, nidadwala maninge. Mediko, adauza Mats kuti: “Munkudekana kuchoka mu dziko mweyi mwakankulumize.” Mangwana yake tidanyamuka nkuyenda ku Suécia na ndeke yotakula katundu yomwe yenze imweyi basi yomwe tidakapakira pa nthawe mweire.
Mats: Mwapa timbandoganiza kuti ni kumala kwa utumiki wathu wa umishonale, ndipomwapa tidalira maninge. Koma mosiyana na vomwe mediko ule ambaganiza, Ann-Catrin adachira. Gole ibodzi patsogolo pake tidakwanisa kubwerera pomwe ku Zaire. Pa nthawe mweyi tidakatumikira mumpingo unango ung’ono wa chiyankhulo cha chi Swahili mu thaundi ya Lubumbashi.
Ann-Catrin: Petenze ku Lubumbashi, nidakhala na mimba, koma tidaluza mwana wathu. Olo kuti tenze tiribe cholinga chokhala na mwana, nidakwinyirira maninge. Koma pa nthawe yoshupa mweyi, Yahova adatipasa mphaso yomwe timbaidikhiriralini. Tidakhala na mapfunziro ya Baibolo yazinji kuposha poyamba. Nkati mwa gole ibodzi yokha, namba ya ofalisa mumpingo idachoka pa 35 nkufika pa 70, ndipo namba ya wanthu omwe ambafika pa misonkhano idakwira kuchoka pa 40 nkufika pa 220. Tenze otangwanika maninge mu utumiki, ndipo daliso ya Yahova mweyi idakhala chilimbikiso chikulu maninge kwa inepano. Mpakana manjeuno, tiganizira basi va mwana wathu ndipo nthawe zinango tichezerana va nkhani mweyi. Tinkudikhirira mwachidwi pa nthawe yomwe Yahova adzachose nkhawa mweyi m’mitima yathu mu Paradaiso.
Mats: Nkuyenda kwa nthawe, Ann-Catrin adayamba kufoka maninge. Pa nthawe ibodzibodzi mwiyo nidagumanikambo na matenda ya khansa ndipo nimbadekana kuchitiwa operasau ikulu maninge. Manjeuno niribwino, ndipo Ann-Catrin ankuchitambo vomwe angakwanise pakutumikira Yahova.
Tidazindikira kuti ndiselini tekha omwe tinkugumana na mabvuto. Patsogolo pakuti wanthu anango aphewa ku Ruanda mu 1994, tidakazungira abale azinji m’madera ya wanthu othawa kwawo. Tidaona kuti iwo ni okhulupirika ndipo akonda anzawo. Vimwevi vatithandiza kuona kuti Yahova anamphanvu zolimbikisa wanthu wake pa bvuto iriyose.—Sal. 55:22.
Ann-Catrin: Bvuto inango idachitika pomwe tidayenda kukanyang’anira kufunguliriwa kwa nthambi ku Uganda mu 2007. Pomwe pologalama idamala, tidayenda na amishonale pafupifupi 25 pabodzi na atumiki wa pa Beteli ku Nairóbi ku Quênia. Tikanati kufika m’malire ya Quênia, mwadzidzidzi karo ikulu idatulukira munsewu mwathu kuchokera njira inango ndipo idamenya kutsogolo kwa karo yomwe tenze tidapakira. Diraiva na abale anango 5 adaferatu panthawe mwiyo. Mulongo munango adakamalizikira ku shipitali. Tinkudikhirira mwachidwi kudzawaona pomwe azishamwali wathu mwawa.—Yobu 14:13-15.
Nkuyenda kwa nthawe nidakhala bwino. Koma inepano, Mats na wanthu anango omwe tenze nawo mu karo mweire, tidapitiriza kushupika na nkhawa ndawa ya ngozi mweire. Kwa inepano, nkhawa zimbanibwerera usiku, vomwe vimbanichitisa kumuka ninkubva ninge kuti ninkuyamba kudwala matenda ya ntima. Venze vopasa mantha. Koma kupemphera mogwigwirira Yahova, kuwerenga na kuganizira malemba yomwe niyakonda, kwanithandiza maninge. Tidagumana pomwe na mafulumero yodziwa vizinji ndipo yadatithandiza pomwe maninge. Manjeuno, tishupikalini pomwe maninge na nkhawa. Ndipo nthawe zose tikumbirambo Yahova kuti athandize omwe ankulimbanambo na mabvuto ninge mwaya.
Pakufotokoza momwe mwalimbanirana na mabvuto, imwepo mudaniuza kuti Yahova wakutakulani ninge momwe antakulira “mazayi yawisi.” Ko mwevi vinkutanthauza chani?
Mats: Tinkutanthauza kuti, ninge momwe munthu atakulira mazayi mosamala maninge kuti osati yaphwanyike, Yahova mokoma ntima, watithandiza pa utumiki wathu uliwose. Nthawe zose tenze na vose vomwe timbadekana, komasoti timbakhala na vinthu vizinji vomwe timbadikhiralini. Njira ibodzi ya momwe taonera chikondi cha Yahova na thandizo yake, ni kuona momwe Bungwe Yotonga itisamalirira.
Ann-Catrin: Ninkufuna kufotokoza chochitika chibodzi cha momwe Yahova adationesera chikondi. Ntsiku inango nidafonerewa, ndipo nidauziwa kuti ababa wangu omwe enze ku Suécia ali ku shipitali ndipo ambadwala maninge. Mats ambadwala malária ndipo wenze akanati kupola bwinobwino. Ndipo tenze tiribe kobiri zokwana kuti tipagaliri ndeke kuti tiyende kumoku. Ndipomwapa, tidaganiza vogulisa karo yathu. Mwapo tidafonerewa pomwe na wanthu awiri. Inango yenze banja yomwe idabva vomwe vidachitika, ndipo iwo ambafuna kupagaliri munthu m’bodzi. Tidafonerewa pomwe na mulongo wachikulire yemwe wenze adasunga kobiri zake mu kabokosi, komwe wenze adanembapo kuti: “Zothandizira munthu wobonera.” Mu kanthawe kang’onong’ono, Yahova adasamalira nkhani mweyi.—Aheb. 13:6.
Mukanyang’ana kumbuyo pa magole 50 ya utumiki wanu, ko mwapfunzira chani?
Tiri mu gawo yathu inyowani ku Mianmar
Ann-Catrin: Inepano napfunzira kuti, kuti tikhale na mphanvu, tidekana kukhala “odekha na kuthemba Yahova.” Tikathemba Yahova, iye amenya nkhondo yathu. (Yes. 30:15; 2 Mbiri 20:15, 17) Ndawa yakuti tamuchitira vose vomwe tingakwanise Yahova pa utumiki wathu, tagumana madaliso yazinji yomwe tidakayagumanalini sembe tiribe kusalula kumutumikira.
Mats: Pfunziro ikulu yomwe nagumana, ni kuthemba Yahova pa bvuto iriyose na kuona momwe iye anithandizira. (Sal. 37:5) Yahova nthawe zose wanithandiza ninge momwe iye adapolomisira. Mpakana manjeuno, tinkukwanisa kuona thandizo ya Yahova pa utumiki wathu unyowani kuno ku Beteli ya ku Mianmar.
Isepano tinkufunisisa kuti wachilumbwana omwe ankufuna kuchita vinthu vizinji pa kutumikira Yahova, aonembo chikondi chokhulupirika cha Yahova chomwe iye wationesa. Ndipo tinkutsimikizira kuti alumbwana mwawa adzabvembo chibodzibodzi akabvuma kuti Yahova awathandize kukula palipose pomwe iwo angabzaliwe.