NKHANI YOPFUNZIRA 34
NYIMBO NA. 3 Ndinu Mphamvu ndi Chiyembekezo Chathu Ndipo Timakudalirani
Tsimikizirani kuti Yahova adakukhululukirani
‘Mudanikhululukira vophonya vangu na machimo yangu.’—SAL. 32:5.
CHOLINGA
Kuona kuti ndawa chani tidekana kubvuma kuti Yahova adatikhululukira, na kuona momwe Baibolo ititsimikizirira kuti Yahova akhululukira munthu yemwe walapa.
1-2. Ko wanthu omwe alapa angakhale tani na ntendere wa muntima? (Onani pomwe foto.)
MPFUMU Davide, adabvesa momwe munthu angakhalire wokwinyirira ndawa ya machimo yakumbuyo. (Sal. 40:12; 51:3; mawu ya padzulu) Iye adachita machimo yakuluyakulu pa moyo wake. Patsogolo pake adaonesa kuti walapa kuchokera pasi pa ntima, ndipo Yahova adamukhululukira. (2 Sam. 12:13) Phindu niyakuti Davide adabvesa momwe munthu akhalira wokondwa akakhululukiriwa na Yahova.—Sal. 32:1.
2 Ninge Davide, tingakhalembo okondwa ndawa yodziwa kuti Yahova watikhululukira. Ni volimbikisa maninge kudziwa kuti Yahova ni wokonzeka kutikhululukira machimo yathu olo yachikhala machimo yakuluyakulu. Koma tidekana kulapa kuchokera pasi pa ntima, nkuwulula machimo yathu, nkuyesesa kuchita vomwe tingakwanise kuti tileke kubwerezera pomwe. (Miy. 28:13; Mac. 26:20; 1 Yoh. 1:9) Ndipo ni volimbikisa pomwe kudziwa kuti Yahova akakhululuka, aganiziralini pomwe va chimo mweyo ndipo vikhala ninge iribe kuchitika.—Ezek. 33:16.
Mpfumu Davide adanemba masalimo yazinji yomwe yaonesa va kukhululuka kwa Yahova (Onani ndime 1-2)
3-4. Ko mulongo munango adadzibva tani patsogolo pakuti wabatizika, ndipo tikambirane chani mu nkhani mweyino?
3 Koma nthawe zinango, munthu angashupike kukhulupirira kuti Yahova wamukhululukira. Onani chitsanzo cha Jennifer, yemwe adakulira mu chonadi. Pomwe wenze mulumbwana, iye adayamba kuchita vinthu voipa ndipo ambabisa vomwe angachita. Magole patsogolo pake, adabwerera kwa Yahova ndipo adabatizika. Iye adanena kuti: “Pakuyamba moyo wangu wenze wokonda kobiri, nimbachita vinthu vachigololo, nimbamwa komasoti nenze waukali maninge. M’maganizo mwangu nimbadziwa kuti nikalapa kuchokera pasi pa ntima nkukumbira kuti Yahova anikhululukire, dipo ya Yesu Khrisitu, inganichenese. Koma olo nteno, nimbakhulupiriralini kuti Yahova anganikhululukire.”
4 Ko nthawe zinango vikushupani kutsimikizira mu ntima kuti Yahova adakukhululukirani machimo yanu yakumbuyo? Yahova ankufuna kuti timbadzibve otetezeka kumbatsimikizira kuti iye ationesa chifundo ninge momwe adachitira na Davide. Mu nkhani mweino, tikambirane kuti ndawa chani tidekana kutsimikizira kuti Yahova adatikhululukira machimo yathu, na vomwe vingatithandize kutsimikizira vimwevi.
KO NDAWA CHANI TIDEKANA KUTSIMIKIZIRA KUTI YAHOVA ADATIKHULULUKIRA?
5. Ko Satana ankufuna kuti timbakhulupirire chani? Perekani chitsanzo.
5 Tikatsimikizira kuti Yahova watikhululukira, vitithandiza kuleka kukhulupirira bodza ya Satana. Kumbukirani kuti Satana adzachite vose vomwe angakwanise kuti atichitise kusiya kutumikira Yahova. Kuti akwanirise cholinga chake, Satana angatichitise kumbaganiza kuti machimo yathu yangakhululukiriwelini. Onani chitsanzo cha mwamuna wa mumpingo wa ku Korinto, yemwe wenze adachosewa mumpingo ndawa yochita chigololo. (1 Akor. 5:1, 5, 13) Patsogolo pakuti iye walapa, Satana ambafuna kuti abale wa mumpingo aleke kumukhululukira na kumutambira pomwe mumpingo ninge m’bale. Nthawe ibodzibodzi mweyo, Satana ambafuna kuti mwamuna moule ambadzibve kuti alibe kukhululukiriwa, nakuti ambakhale “wokwinyirira maninge mpakana kutaya ntima” nkusiya kutumikira Yahova. Satana alibe kuchinja cholinga chake na njira zomwe iye aziphatisa basa. Koma isepano “tinkudziwa bwino viwembu vake.”—2 Akor. 2:5-11.
6. Ko tingachite tani kuti tileke kumbadziimba mulandu, pa vinthu vomwe tidaphonyesa kumbuyo?
6 Tikabvuma kuti Yahova watikhululukira, tingakwanise kukhala womasuka na kuleka kudziimba mulandu. Tikachimwa, tidziimba mulandu. (Sal. 51:17) Vimwevi ni vabwino. Chikumbuntima chathu chingatithandize kuchita vinthu vabwino, vomwe vingatithandize kukonza vinthu vomwe taphonyesa. (2 Akor. 7:10, 11) Manje, tikambadziimba mulandu kwa nthawe itali patsogolo pakuti talapa chimo yathu, vingatichitise kukhala wokhumudwa mpakana nkuyamba kuganiza kuti viribwino kusiya kutumikira Yahova. Koma tikabvuma kuti Yahova watikhululukira, vitithandiza kuti tileke kudziimba mulandu. Ndipo tingapitirize kutumikira Yahova ninge momwe iye afunira na chikumbuntima chochena komasoti okondwa. (Akol. 1:10, 11; 2 Tim. 1:3) Manje, ko tingatsimikizire tani muntima kuti Mulungu watikhululukira?
VOMWE VINGATITHANDIZE KUKHULUPIRIRA KUTI YAHOVA WATIKHULULUKIRA?
7-8. Ko Yahova adadzidziwikisa tani kwa Mose, ndipo vimwevi vinkutitsimikizira chani? (Ekisodo 34:6, 7)
7 Kumbukirani vomwe Yahova adanena pakufuna kudzidziwikisa. Mwakulinganiza, vomwe Yahova adauza Mose Mphiri ya Sinai.a (Werengani Ekisodo 34:6, 7.) Pana vinthu vizinji maninge vomwe Yahova adakanena pa nkhani ya makhalidwe yake na momwe achitira vinthu. Koma adakonda kodzidziwikisa ninge ‘Mulungu wachifundo na wokoma ntima.’ Ko Mulungu wa tene uyu, angalambedi kukhululukira ntumiki wake yemwe walapa kuchokera pasi pa ntima? Angachitelini vimwevo. Kuchita tene, kungakhale kusowa chilungamo komasoti kuipa ntima. Ndipo vimwevi ni vinthu vomwe Yahova angavichiterini ne pang’ono.
8 Tingatsimikizire kuti Yahova angadzidziwikiserini mwabodza, ndawa yakuti iye ni Mulungu chaiye. (Sal. 31:5) Ndipomwapa, tingakhulupirire vomwe iye anena. Peno vikushupani kuleka kudziimba mulandu pa vinthu vomwe mudaphonyesa m’buyo, dzibvunzeni kuti: ‘Ko nikhulupirira kuti Yahova ni Mulungu wachikondi na wokoma ntima, yemwe angalekerini kukhululukira munthu yemwe walapa kuchokera pasi pa ntima? Manje, ko nidekanalini kutsimikizira kuti iye adanikhululukira?’
9. Ko kukhululukiriwa machimo, kutanthauza chani? (Salimo 32:5)
9 Kumbukirani vomwe Yahova adauzira onemba Baibolo kuti anene va kukhululuka kwake. Mwakulinganiza, ninge momwe Davide adafotokozera kukhululuka kwa Yahova. (Werengani Salimo 32:5.) Davide adanena kuti: ‘Mwanikhululukira vophonya vangu na machimo yangu.’ Mu Chiheberi mawu yakuti “kukhululuka,” yangatanthauze “kutakula” panango “kuchosa.” Pomwe adakhululukira Davide, vidakhala ninge Yahova watakula machimo yake nkuyenda nayo. Ndipomwapa, Davide adakhala womasuka pakuleka kudziimba mulandu ndawa ya machimo yomwe adachita. (Sal. 32:2-4) Tingakhalembo womasuka tene uyu. Tikalapa machimo yathu kuchokera pasi pa ntima, tidekanalini kupitiriza kutakula ntolo moyu womwe ni kudziimba mulandu pa machimo yomwe tidachita. Ndawa yakuti Yahova akhala kuti wayachosa kwa ise.
10-11. Ko mawu yakuti ‘wokonzeka kukhululuka,’ yankutiuza chani va Yahova? (Salimo 86:5)
10 Werengani Salimo 86:5. Pa lemba mweyi Davide ankunena Yahova kuti nthawe zose akhala ‘wokonzeka kukhululuka.’ Vimwevi vinkutanthauza kuti Yahova akulumizalini kukalipa tikaphonyesa vinthu. Ndipo nthawe zose, akhululukira munthu yemwe walapa. Ko ndawa chani Yahova ali tene uyu? Mavesi ya pa tsogolo pake yanena kuti: ‘Ndimwe wodzadza na chikondi chaicho kwa wose omwe akutumikirani.’ Ninge momwe tidaonera mu nkhani yapita, chikondi chokhulupirika cha Yahova, ndicho chomwe chimuchitisa kuti iye akhale pa ushamwali wolimba maninge na atumiki wake okhulupirika. Ndawa ya chikondi mwechi, iye ‘adzakhululukire na ntima wose,’ wanthu wose ochimwa omwe alapa. (Yes. 55:7, mawu ya m’nyantsi.) Peno imwepo vikushupani kukhulupirira kuti Yahova adakukhululukirani, mungadzibvunze kuti: ‘Ko inepano nikhulupirira kuti Yahova ni wokhululuka, nakuti iye akhululukira wanthu wose omwe alapa omwe ankukumbira kuti awachitire chifundo? Manje, ko nidekanalini kukhulupirira kuti iye adanikhululukira pomwe nidamukumbira kuti anichitire chifundo?’
11 Tingalimbikisiwe tikadziwa kuti Yahova abvesa bwinobwino chibadwa chathu komasoti kuti ndise ochimwa. (Sal. 139:1, 2) Vimwevi vinkufotokozewa bwinobwino mu Salimo inango yomwe Davide adanemba. Ndipo ingatithandize pomwe kubvesa kuti Yahova atikhululukira.
AYI KUYEBWA VOMWE YAHOVA AKUMBUKIRA
12-13. Mobverana na Salimo 103:14, ko Yahova akumbukira chani va isepano, ndipo vimwevi vimuchitisa kuchita chani?
12 Werengani Salimo 103:14. Pa lemba mweyi, Davide ankunena kuti Yahova ‘akumbukira kuti ndise pfumbi.’ Na mawu mwaya Davide ankufotokoza chibodzi mwa vifukwa vomwe vichitisa Yahova kukhululukira ntumiki wake yemwe walapa. Ndawa yakuti iye adziwa kuti nthawe zinango tingaphonyese vinthu. Kuti tibvese vimwevi, naboni tione pomwe bwinobwino mawu ya Davide mwaya.
13 Davide adanena kuti ‘Yahova adziwa momwe adatikonzera.’ Iye adaumba Adamu ‘kuchokera ku dothi, ndipo adziwa bwino vinthu vomwe wanthu ankudekana.’ Mwakulinganiza, wanthu adekana kudya, kugona na kupuma. (Gen. 2:7) Koma pomwe Adamu na Hava adachimwa, wanthu adakhala pfumbi mu njira inango. Ninge mbadwa zawo, tidatengera uchimo womwe utichitisa kukhala na maganizo yofuna kuchita vinthu voipa. Yahova adziwa bwino vimwevi. Koma pomwe Davide adanena kuti Yahova adziwa kuti ndise pfumbi, ambatanthauza pomwe kuti Yahova adziwa kuti tiribe ungwiro, ndipomwapa, nthawe zinango tiphonyesa vinthu. Kukumbukira vimwevi, kuchitisa kuti Yahova atikhululukire na kutikomera ntima tikalapa kuchokera pasi pa ntima.—Sal. 78:38, 39.
14. (a) Ko Davide ankufotokoza tani va kukhululuka kwa Yahova? (Salimo 103:12) (b) Ko chitsanzo cha Davide chinkuonesa tani kuti Yahova akhululuka na ntima wose? (Onani bokosi yakuti “Yahova akakhululuka, ayebweratu.”)
14 Ko ni chinthu chinango chiponi chomwe chingatitsimikizire kuti Yahova adatikhululukira? (Werengani Salimo 103:12.) Davide adanena kuti Yahova akatikhululukira, aikha machimo yathu kutali maninge na ise, ‘ninge komwe kuchokera dzuwa kuliri kotalikirana na komwe ingenera.’ Kulewa kunango, kumachibese nkutali maninge na kumaulo. Ndipo mbuto ziwiri zimwezi, zingagumanerini. Ko mwevi vinkufuna kutiuza chani pa nkhani ya machimo yomwe Yahova watikhululukira? Pa kufotokoza va vesi mweyi, bukhu inango inena kuti: “Mulungu aikha kutali maninge machimo yathu na isepano. Mwakuti viri ninge kapfungo ka chinthu komwe kamala.” Ndipomwapa, tidekana kutsimikizira kuti Yahova adzakumbukirelini pomwe panango kutikumbusa pomwe machimo yomwe tidachita. Kumbukirani kuti kapfungo kachinthu kangatikumbuse chinthu chinango chomwe chidachitika kumbuyo. Koma Yahova akatikhululukira, palibe chinthu chomwe chingamuchitise kukumbukira pomwe chinthu mwecho. Ndipo angaphatiselini pomwe basa vimwevo kuti atiimbe mulandu panango kutilanga. Ezek. 18:21, 22; Mac. 3:19.
15. Ko tidekana kuchita chani peno tinkupitiriza kudziimba mulandu pa vophonya vomwe tidachita kumbuyo?
15 Ko mawu ya Davide pa Salimo 103 yangatithandize tani kutsimikizira kuti Yahova adatikhululukira? Peno tinkupitiriza kudziimba mulandu na vinthu vomwe tidachita kumbuyo, tingadzibvunze kuti: ‘Ko ninkuyebwa vomwe Yahova akumbukira, panango ko ninkuyebwa kuti Yahova akumbukira kuti ndine wochimwa nakuti akhululukira munthu wochimwa yemwe walapa ninge inepano? Ko ninkukumbukira vomwe Yahova asalula kuyebwa, panango kuti ko ninkupitiriza kukumbukira machimo yomwe iye adakhululuka yomwe angadzaniimbelini pomwe nayo mulandu?’ Yahova andokhaliralini kuganizira machimo yathu yakumbuyo. Isembo tidekanalini kumbavikumbukira. (Sal. 130:3) Tikatsimikizira kuti Yahova watikhululukira, tidzakwanise kudzikhululukira tekha, nkupitiriza kumutumikira.
16. Fotokozani ngozi yomwe iripo ndawa yodziimba mulandu pa vophonya vomwe tidachita kumbuyo (Onani pomwe foto.)
16 Kumbukirani chitsanzo ichi. Kudziimba mulandu ndawa ya machimo yakumbuyo, viri ninge kufambisa karo koma nkumbanyang’ana pa girazi yomwe itiwonesa va kumbuyo. Ni vabwinodi kunyang’ana girazi yomwe itiwonesa vakumbuyo nthawe inango, ndawa mungakwanise kupewa ngozi yomwe ingafune kuchitika kumbuyo kwanu. Koma kuti mukwanise kuyenda kutsogolo motetezeka, imwepo mudekana kuikhira nzeru kuwona msewu, nkumbanyang’ana kutsogolo. Mwanjira ibodzibodzi mweyi, vingakhale bwino nthawe zinango kumbakumbukira vakumbuyo, panango machimo yomwe tidachita nkumbatengera pfunziro pa vomwe vidatichitikira, nkumbakhala wotsimikizira kuti tidzavichitelini pomwe. Koma tikambandokhalira kukumbukira machimo yomwe tidachita kumbuyo, kudziimba mulandu komwe tingakhale nako kungatichitise kuti tikangire kuchita vinthu vinango pa kutumikira Yahova. M’malo mwa vimwevi, tidekana kupitiriza kunyang’ana mu msewu nkumbanyang’ana kutsogolo. Ndawa tiri mu msewu womwe unkutiyendesa ku moyo wosapera womwe Mulungu ndiye adatipolomisa. Ndipo mu dziko inyowani vinthu vose voipa ‘tidzavikumbukirelini pomwe.’—Yes. 65:17; Miy. 4:25.
Ninge motorista yemwe adekana kukhala tcheru na kunyang’ana kutsogolo m’malo mondokhalira kunyang’ana girazi yomwe iwonesa va kumbuyo, isepano tidekana kumbanyang’ana va madaliso ya kutsogolo m’malo mombandoganizira vinthu vomwe tidaphonyesa kumbuyo (Onani ndime 16)
PITIRIZANI KUTSIMIKIZIRA KUTI YAHOVA ADAKUKHULULUKIRANI
17. Ko ndawa chani tidekana kupitiriza kutsimikizira kuti Yahova atikonda komasoti atikhululukira?
17 Tidekana kupitiriza kutsimikizira muntima mwathu va chikondi na kukhululuka kwa Yahova. (1 Yoh. 3:19.) Ko ndawa chani tidekana kuchita vimwevi? Ndawa yakuti Satana adzalekelini kutichitisa kukhala na maganizo yakuti Yahova atikondalini, panango kuti angatikhululukirelini. Mulimose momwe viriri, cholinga chake ni chofuna kutichitisa kuti tisiye kutumikira Yahova. Tingamusiye Satana kuti achite vomwe ankufuna, ndawa yakuti iye ankudziwa kuti nthawe yamumalira. (Chiv. 12:12) Koma tidekanalini kubvuma kuti atiwine.
18. Ko mungachite tani kuti mumbatsimikizire va chikondi na kukhululuka kwa Yahova?
18 Kuti mulimbise chikhulupiriro chanu pa chikondi cha Yahova, phatisani basa mpfundo zomwe tidakambirana mu nkhani yapita. Kuti mulimbise chikhulupiriro chanu chakuti Yahova akhululuka, ganizirani momwe Yahova adadzifotokozera pofuna kudzidziwikisa. Ganizirani vomwe iye adanena pakuuzira onemba Baibolo kuti afotokoze va kukhululuka kwake. Ayi kuyebwa kuti iye akumbukira kuti ndise pfumbi nakuti iye nthawe zose adzatichitire vinthu mwachifundo. Ndipo kumbukirani kuti akakhululuka, akhululukiratu na ntima wose. Ndipamwapa, ninge momwe Davide ambathembera Yahova kuti ni wachifundo, imwembo munganene kuti: “Mwaphata basa Yahova pa kunikhululukira ‘vophonya na machimo yangu’.”—Sal. 32:5.
NYIMBO NA. 1 Makhalidwe a Yehova
a Onani nkhani yakuti: “Yandikirani Mulungu Yehova Anafotokoza Makhalidwe Ake” mu Nsanja ya Olonda ya 1 Maio, 2009.