Ko mungaphindule tani na kabukhu kakuti Kuphunzira Malemba Tsiku ndi Tsiku?

Ko imwepo muna chizolowezi cha kumbalewenga lemba ya ntsiku na ndemanga zomwe zichagumanika mu kabukhu kakuti Kuphunzira Malemba Tsiku ndi Tsiku? Peno mukanati kuyamba, mungachite bwino kukhala na chizolowezi chimwechi. Wanthu azinji achakonda kulewenga lemba ya ntsiku machibese ndipo vichachitisa kuti ambaganizire vomwe alewenga ntsiku yose. (Yos 1:8; Sl 119:97) Ko imwepo mungaphindule tani na lemba ya ntsiku? Chintsintsi chili pakumbalewenga ntsiku iliyose. Ndipo, mumbaphatise basa vomwe mwapfunzira pa moyo wanu. Mukambaphatisira basa vomwe Baibolo ichapfunzisa pakusalula vochita, mudzawone kuti nthawe zose mudzakhale wakukondwa.—Sl 119:105.

Banja ya Beteli padziko yose ichapfunzira kabukhu ka Kuphunzira Malemba Tsiku ndi Tsiku kumachibese pa nthawe ya chakudya cha kumachibese. M’magole yakumalizira yano, mbali zizinji za pologalama mweyi zichayikhiwa pa JW Broadcasting^® zomwe zichagumanika pa MAPOLOGALAMA NA VOCHITIKA. Ko ni panthawe iponi yomwe imwepo mudalingitsirako vidiyo ya mbali mweyi? Vingachitike kuti yanango ya mavidiyo mwaya ndiyo yamuchada. Mwakulinganiza, ko munkupfunzira chani pa chitsanzo cha Loti pankhani ya kusalula vochita?

LINGITSIRANI VIDIYO YAKUTI AYI KUMBAKONDA DZIKO (1YO 2:15), NDIPO IKAPERA DAWIRANI MIBVUNZO AYA:

• Ko mpfundo za m’pfunziro ya kumachibese zachokera pa lemba yanyi?

• Ko nkhani ya Loti ichawonesa tani kuyipa kokonda dziko na vinthu va kudziko?—Ge 13:12; 14:12; 19:3, 12, 13, 24-26

• Ko tingawonese tani kuti tichakonda Yahova osati dziko panango vinthu va kudziko?