Ayi kuchebwa kubatizika

1. Ko maphindu yanango yakubatizika ni yaponi?

KO IMWEPO mukonda Yahova, ule yemwe adakupasani vinthu vose mpakana moyo? Ko muna chifuno chomuwonesa kuti mumukonda? Njira yabwino yochitira vimwevi nkudzipereka kwa iye mpakana kubatizika. Kundochokera nthawe mweyi imwepo muyamba kuchita mbali ya banja yake. Ndipo imwepo mudzakhale wa Yahova ndipo iye adzatsogolere moyo wanu na kukusamalirani ninge Baba na shamwali wanu. (Sal. 73:24; Yes. 43:1, 2) Kuingizira mwapa, mudzakhale na chidikhiro cha moyo wosapera.—1 Pet. 3:21.

2. Ko tipfunzire chani mu nkhani mweino?

² Ko pana chinthu chinango chomwe chinkukukangisani kuti mubatizike? Peno nteno imwepo ndimwelini woyamba kugumana na vimwevi. Wanthu mamidyau yazinji ambadekana kuchinja vinthu pa moyo wawo, vochita vawo na vomwe aganiza kuti ayenerere kubatizika. Koma manjeuno iwo ankutumikira Yahova mwakhama komasoti mokondwa. Vimwevi vidachitika pomwe na anango omwe adabatizika mu nthawe ya atumi. Naboni tipfunzire vinthu vinango vomwe iwo ambadekana kuchinja na kuona vomwe isepano tingapfunzire pa chitsanzo chawo.

ASAMARIYA ADASALULA KUBATIZIKA

3. Ko ni mabvuto yaponi yomwe Asamariya anango ambadekana kulimbana nayo kuti abatizike?

³ Mu nthawe ya Yesu Asamariya enze mu gulu inango ya wanthu wopemphera omwe ambakhala ku norte kwa Yuda pafupi na thaundi ya Sekemu na Samariya. Akanati kubatizika iwo ambadekana kudziwa bwinobwino mawu ya Mulungu. Venze tene ndawa yakuti iwo ambaganiza kuti mabukhu 5 yokha yoyambirira ya m’Baibolo ndiyo youziriwa basi. Mabukhu mwaya ni kundochokera Genesis mpakana Deuteronomo panango pomwe bukhu ya Yoswa. Koma iwo ambadikhirira kubwera kwa Mesiya mobverana na polomisi yomwe igumanika pa Deuteronomo 18:18, 19. (Yoh. 4:25) Kuti abatizike iwo ambadekana kutsimikizira kuti Yesu ni Mesiya wopolomisiwa ndipo “Asamariya azinji” adachita vimwevi. (Yoh. 4:39) Kuingizira mwapa, penze tsankho ikulu maninge pakati pa Ayuda na Asamariya. Mosakaika Asamariya anango ambadekana kulimbana na tsankho mweyi.—Luka 9:52-54.

4. Ko Asamariya azinji adachita tani pomwe Filipo adawalalikira va ntontholo wabwino? (Machitidwe 8:5, 6, 14)

⁴ Ko chidathandiza Asamariya kubatizika nchani? Pomwe Filipo ‘adawalalikira va Khrisitu,’ Asamariya anango ‘adabvuma mawu ya Mulungu.’ (Werengani Machitidwe 8:5, 6, 14.) Filipo wenze mu Yuda koma iwo ambawonalini kuti mweyi ni bvuto, panango iwo ambakumbukira mbali inango ya malemba yomwe inena kuti Mulungu alibe tsankho. (Deut. 10:17-19) Mulimose momwe venzere, iwo “ambabvesera mwa tcheru vomwe Filipo ambawauza” vokhudza Yesu ndipo ambadziwa maumboni chaiyo yakuti Filipo wenze adatumiziwa na Mulungu. Iye pomwe adachita vodabwisa vizinji ninge kupolesa wodwala na kubulisa viwanda.—Mac. 8:7.

5. Ko tingapfunzire chani na chitsanzo cha Asamariya?

⁵ Tsankho na kusadziwa vinthu vizinji vidakachitisa Asamariya mwawale kuti aleke kupita patsogolo. Koma iwo alibe kubvuma kuti vimwevi vichitike. Pomwe adatsimikizira kuti vomwe Filipo ambapfunzisa ni chaivo iwo alibe kuchebwa kubatiziwa. Baibolo inena kuti: “Iwo padakhulupirira Filipo, yemwe ambalengeza ntontholo wabwino wa Ufumu wa Mulungu komasoti wonena va dzina ya Yesu Khrisitu, ambabatiziwa, amuna na akazi kubodzi.” (Mac. 8:12) Manje tani imwepo? Ko mutsimikizira kuti mawu ya Mulungu ni chonadi? Mukhulupirira kuti wa Mboni za Yahova amalisa tsankho ndipo achita khama kuti aonese chikondi ninge momwe Yesu adanenera kuti ni vomwe Akhrisitu chaiwo adzachite? (Yoh. 13:35) Ndipomwapa, ayi kuchita mantha kubatizika. Imwepo mungakhale na chitsimikizo chakuti Yahova adzakudaliseni.

6. Ko chitsanzo cha Ruben chingakuthandizeni tani?

⁶ Ruben, wa ku Alemanha, adalerewa m’banja ya Mboni. Koma pomwe wenze mulumbwana iye ambatsimikiziralini kuti Mulungu aliko. Ko iye adachita tani kuti aleke kumbakaikira? Iye adazindikira kuti achadekana kupfunzira vizinji va nkhani mweyi ndipo adachita vimwevi. Iye adanena kuti: “Nidaphatisa basa pfunziro yangu ya panekha kuti nimalise kukaikira muko ndipo nidapfunzira kazinji maninge va momwe moyo udayambira.” Iye adawerenga bukhu yakuti. Existe um Criador Que Se Importa com Você? Bukhu mweyi idalimbisa chikhulupiriro cha Ruben ndipo iye adayamba kuganiza kuti: ‘Koma Mulungu aliko.’ Kuingizira mwapa, Ruben adakazungira likulu yathu. Iye adazindikira kuti mbverano wa abale na alongo pa dziko yose yapasi ni chinthu chodabwisa maninge. Ndipo adapitiriza kuchita chidwi na vimwevi. Ruben adabwerera ku Alemanha ndipo adabatizika na magole 17. Peno imwepo mukaikira va Mulungu, Baibolo panango nkhani zinango, fufudzani mu vofalisa vathu. Kukaikira kwanu kudzamale ndawa ‘yodziwa vinthu molondola.’ (Aef. 4:13, 14) Kuyenda kwa nthawe imwepo mudzabve vitsanzo vizinji maninge vokhudza mbverano na chikondi cha abale na alongo padziko yose yapasi na kuona vitsanzo vimwevi mumpingo wanu. Vimwevi vidzaingizire chikondi chanu kwa abale na alongo padziko yose yapasi.

SAULO ADASALULA KUBATIZIKA

7. Ko Saulo ambadekana kuchinja kaganizidwe kaponi?

⁷ Onani chitsanzo cha Saulo wa ku Tariso. Iye wenze adatambira mapfunziro yapadzulu maninge ya Chiyuda ndipo ambachita vinthu vizinji maninge pakuthandizira chipembedzo cha Chiyuda. (Agal. 1:13, 14; Afil. 3:5) Pa nthawe mweire Ayuda azinji ambakhulupirira kuti Akhrisitu ni wanthu wampatuko. Ndawa ya vimwevi Saulo ambawadzudza mwankhanza ndipo ambaganiza kuti ankuchita chifuniro cha Mulungu. (Mac. 8:3; 9:1, 2; 26:9-11) Peno Saulo ambafuna kuonesa kukhulupirika kwa Yesu na kubatizika ninge Khrisitu, iye ambadekana kukhala wotsimikiza kuti adzadzudziwe.

8. (a) Ko chidathandiza Saulo kubatizika nchani? (b) Mobverana na Machitidwe 22:12-16, ko Ananiya adathandiza tani Saulo? (Onani pomwe foto.)

⁸ Ko chidathandiza Saulo kubatizika nchani? Pomwe Yesu adayankhula na Saulo kuchokera kudzulu, kugwerewera kukulu maninge kudamuchitisa kuti akhale lombe. (Mac. 9:3-9) Kwa ntsiku zitatu Saulo alibe kudya panango kumwa madzi ndipo mosakaika iye ambaganizira vomwe vidachitika. Iye adatsimikizira kuti Yesu wenze Mesiya na kuti Akhrisitu enze muchipembedzo chaicho. Ganizirani momwe Saulo ambabvera pakukumbukira kuti adatengambo mbali pa kuphewa kwa Sitefano. (Mac. 22:20) Patsogolo pa ntsiku zitatu mweizi, wopfunzira munango dzina yake Ananiya adayankhula naye Saulo mwachikondi. Adamupolesa ndipo adamulimbikisa kuti abatizike mwakankulumize. (Werengani Machitidwe 22:12-16.) Saulo adakhala wodzichepesa ndipo adabvuma thandizo ya Ananiya nkuyamba moyo unyowani ninge Mkhrisitu wobatizika.—Mac. 9:17, 18.

9. Ko tingapfunzire chani na chitsanzo cha Saulo?

⁹ Ko tingapfunzire chani na chitsanzo cha Saulo? Kudzikuza komasoti mantha na wanthu kudakachitisa kuti Saulo aleke kubatizika. Koma iye alibe kubvuma kuti vimwevi vichitike. Saulo adakhala wodzichepesa ndipo adachinja vinthu pa moyo wake kuti akhale nteweri wa Yesu. (Mac. 26:14, 19) Iye ambadziwa kuti adzadzudziwe koma olo nteno iye adatsimikiza kukhala Mkhrisitu. (Mac. 9:15, 16; 20:22, 23) Patsogolo pakuti wabatizika, Saulo adapitiriza kuthemba Yahova pakulimbana na mabvuto yosiyanasiyana. (2 Akor. 4:7-10) Panango imwepo mungalimbane na chiyeso cha chikhulupiriro kuti mukhale Mboni ya Yahova. Koma mungathembe kuti Yahova na Yesu adzakupaseni thandizo yokwana kuti mupitirize kukhala wokhulupirika.—Afil. 4:13.

10. Ko chitsanzo cha Anna chingakuthandizeni tani?

¹⁰ Anna adalerewa mu banja ya ntundu wa Chikurda kumachibese kwa Europa. Pomwe amayi wake adabatizika, Anna adayamba kupfunzira Baibolo pomwe adabvumiziwa na ababa wake. Pa nthawe mweyi iye wenze na magole 9 ndipo azibale wake anango ambakhala nyumba ibodzi na iye. Azibale wake mwawa ambakomedzewalini ndawa yakuti Anna ankupfunzira Baibolo. Iwo ambaganiza kuti kusiya chipembedzo chomwe adakulira ni vochitisa manyazi maninge kwa iwo. Pomwe wenze na magole 12 Anna adakumbira ababa wake kuti amubvumize kubatizika. Ababa wake ambafuna kudziwa peno iye wasalula yekha kuchita vimwevi panango ankuchita kuchichimiziwa na munthu munango. Iye adawauza kuti “inepano nikonda Yahova.” Ndipomwapa, ababa wake mwawo adamubvumiza kuti abatizike. Pomwe vimwevi vidachitika, Anna adapitiriza kumbanyozewa komasoti na kuchitiriwa vinthu vosowa chilungamo. M’bale wake munango adanena kuti: “Vingakhale bwino iwepo uchikonda moyo wachigololo panango kupepa, m’malo mokhala wa Mboni za Yahova.” Ko Anna adalimbana tani na vimwevi? Iye adanena kuti: “Yahova adanithandiza kukhala wolimba ndipo ababa na amayi wangu adanithandiza maninge.” Anna, ana ndandanda ya vinthu vomwe iye adawona Yahova ankumuthandiza pa moyo wake. Nthawe zose iye awona ndandanda mweyi kuti aleke kumbayebwa nthawe zomwe Yahova adamuthandiza. Peno imwepo muna mantha yakuti mungadzadzudziwe, kumbukirani kuti Yahova adzakuthandizeni.—Aheb. 13:6.

KONELIYO ADASALULA KUBATIZIKA

11. Ko chidakachitisa Koneliyo kuchebwa kubatizika nchani?

¹¹ Baibolo ilewa pomwe va chitsanzo cha Koneliyo. “Iye wenze mtsogoleri” wa masocha 100 ya gulu ya masocha ya Chiroma. (Mac. 10:1, mawu ya m’nyantsi.) Vingachitike kuti iye wenze munthu wodziwika maninge kwa wanthu komasoti kwa masocha. Iye “ambapereka vinthu vizinji kwa wanthu wosauka.” (Mac. 10:2) Yahova adatumiza ntumi Petulo kuti akalalikire va ntontholo wabwino kwa Koneliyo. Ko iye adachebwa kubatizika ndawa ya udindo womwe wenze nawo?

12. Ko nchani chidathandiza Koneliyo kubatizika?

¹² Ko chani chidathandiza koneliyo kubatizika? Baibolo inena kuti: “Iye ambagopa Mulungu pabodzi na wanthu wose wa m’banja yake.” Ndipo iye ambagwigwirira kwa Mulungu nthawe zose. (Mac. 10:2) Pomwe Petulo adamulalikira va ntontholo wabwino, Koneliyo na banja yake adakhulupirira Yesu ndipo kanthawe pang’ono adabatizika. (Mac. 10:47, 48) Mosakaika Koneliyo wenze wotsimikiza kuchinja chinthu chilichose pa moyo wake kuti atumikire Yahova pabodzi na banja yake.—Yos. 24:15; Mac. 10:24, 33.

13. Ko tingapfunzire chani na chitsanzo cha Koneliyo?

¹³ Ninge momwe venzere na Saulo, udindo udakachitisambo Koneliyo kuti aleke kukhala Mkhrisitu. Koma iye alibe kubvuma kuti vimwevi vichitike. Ko imwepo munkufunika kuchinja vinthu vizinji maninge kuti mubatizike? Peno viri teno, Yahova adzakhale nthandizi wanu. Peno ndimwe wotsimikiza kuphatisa basa mpfundo za m’Baibolo kuti mukondwerese, Yahova iye adzakudaliseni.

14. Ko chitsanzo cha Tsuyoshi chingakuthandizeni tani?

¹⁴ Kuti abatizike Tsuyoshi wa ku Japão, ambadekana kuchinja vinthu vinango pa nkhani ya basa yake. Iye ambaphata basa ninge wachiwiri wa wonyang’anira shikola inango yobvekera maninge yodziwika kuti Ikenobo. Yomwe ipfunzisa wanthu kukodza mafulori. Peno nkulu wa shikola mweyi alibe kukwanisa kufika pa maliro pomwe pambachitika miyambo ya chibunda, Tsuyoshi ndiye ambapita m’malo mwake. Koma pomwe adapfunzira chaivo pa nkhani ya wanthu wakufa, imweyi yenze bvuto ikulu maninge kuti asiye na cholinga chakuti ayenerere kubatizika. Ndipomwapa iye adatsimikiza kuti adzayendelini pomwe ku miyambo ya chibunda. (2 Akor. 6:15, 16) Iye adayankhula na nkulu wonyang’anira shikola mweyi va nkhani mweyi. Ko chidachitika nchani? Tsuyoshi adakwanisa kupitiriza basa yake ne kumbagumanika pa miyambo mweyi. Iye adabatizika pafupifupi gole ibodzi kundochokera pomwe adayamba kupfunzira Baibolo.a Peno imwepo munkufuna kuchinja vinthu vinango ku basa kwanu kuti mukondwerese Yahova, mungatsimikizire kuti Yahova adzasamalire vosowa va banja yanu.—Sal. 127:2; Mat. 6:33.

WANTHU WA KU KORINTO ADASALULA KUBATIZIKA

15. Ko ni vinthu viponi vomwe wanthu wa ku Korinto ambadekana kulimbana navo kuti abatizike?

¹⁵ Wanthu azinji omwe ambakhala mu thaundi ya ku Korinto kalekale ambachita vinthu vomwe Yahova ambakondwalini navo. Iwo enze wanthu okonda chuma komasoti vinthu va chigololo. Pavochitika ninge vimwevi yemwe ambafuna kutumikira Yahova ambadekana kulimbana na mabvuto yakulu. Olo venze teno pomwe ntumi Paulo adayenda ku Korinto kukalalikira va Khrisitu, “wanthu azinji wa ku Korinto omwe adabva ntontholo wabwino, adayamba kukhulupirira nkubatiziwa.” (Mac. 18:7-11) Komasoti usiku, Ambuya adauza Paulo m’masomphenya kuti: “Ninawanthu azinji muthaundi mweyi.” Ndipomwapa, Paulo adapitiriza kulalikira moku kwa gole na hafu.

16. Ko chidathandiza wanthu wa ku Korinto kubatizika nchani? (2 Akorinto 10:4, 5)

¹⁶ Ko chidathandiza wanthu wa ku Korinto kuti abatizike nchani? (Werengani 2 Akorinto 10:4, 5.) Mphanvu ya mzimu uchena na mawu ya Mulungu vidawathandiza kuti achinje vinthu pa moyo wawo. (Aheb. 4:12) Wanthu wa ku Korinto omwe adakhala Akhrisitu adakwanisa kusiya vinthu voipa vomwe ambachita pa moyo wawo ninge kuledzera, kuba na chigololo.—1 Akor. 6:9-11.b

17. Ko tingapfunzire chani na chitsanzo cha wanthu wa ku Korinto

¹⁷ Ninge momwe taonera, wanthu anango ku Korinto ambadekana kusiya vinthu vomwe enze adazolowera. Olo venze tene iwo alibe kuganiza kuti kukhala Mkhrisitu ni chinthu chakuti iwo angakwaniselini kuchichita. Iwo adachita khama maninge kuti angene pa msewu wopapatidza omwe utsogolera ku moyo. (Mat. 7:13, 14) Ko imwepo munkufuna kubatizika koma munkuchita khama kuti mumalise chizolowezi chinango choipa chomwe mudachizolowera? Ayi kuleka kuchita khama. Gwigwilirani Yahova kuti akupaseni mzimu uchena ndipo vimwevi vidzakuthandizeni kuti mupirire chiyeso chofuna kuchita vinthu voipa.

18. Ko chitsanzo cha Monika chingatithandize tani?

¹⁸ Kuti abatizike Monika wa ku Geórgia, adachita khama maninge kuti amalise bvuto yake yoyankhula vinthu voipa, kunyang’anira na kubvesera vinthu vomwe vikondweresalini Yahova. Iye adanena kuti: “Pomwe nenze mulumbwana ni pemphero yomwe idanipasa mphanvu kuti nikwanise kuchinja. Yahova ambadziwa kuti nthawe zose ninkufuna kuchita vinthu vabwino. Ndipomwapa, adanithandiza na kunitsogolera.” Monika adabatizika na magole 16. Manje tani imwepo? Ko munkudekana kusiya vinthu vinango voipa kuti mutumikire Yahova munjira yomwe ni yobvumizika? Pitirizani kumukumbira kuti akupaseni mphanvu zodekana kuti mukwanise kuchinja. Yahova apereka mzimu wake uchena mokoma ntima.—Yoh. 3:34.

CHIKHULUPIRIRO CHANU CHINGACHINJE PHIRI NKUYENDESA PANANGO

19. Ko nchani chingakuthandizeni kuchinja phiri? (Onani pomwe foto.)

¹⁹ Khalani wotsimikizira ivi, viribe basa mabvuto yomwe mungagumane nayo kuti mubatizike. Yahova akukondani ndipo ankufuna kuti imwepo muchite mbali ya banja yake. Yesu adauza opfunzira anango kuti: “Peno mungakhale na chikhulupiriro cholingana na kantsere ka mpiru kuchepa kwake, mudzakwanise kuuza phiri iyi kuti: ‘Choka pano uyende apo,’ ndipo idzachokedi. Palibe chomwe chidzakhale chosakwanisika kwa imwepo.” (Mat. 17:20) Yesu adauza mawu mwaya wanthu omwe enze na magole yang’onong’ono ankumutewera ndipo iwo ambadekana kuingizira chikhulupiriro chawo. Koma iye adawatsimikizira kuti akakhala na chikhulupiriro chokwana, Yahova adzawathandize kulimbana na mabvuto yakulu maninge ninge Phiri. Ndipo Yahova adzakuthandizenimbo imwepo kuchita vimwevi.

20. Ko vitsanzo va wanthu wakalekale na wa manjeuno vomwe vatomolewa mu pfunzilo mweino vingakuthandizeni tani?

²⁰ Peno mwazindikira kuti pa na chinthu chinango chomwe chinkukukangisani kuti mubatizike. Ayi kuchebwa kuyamba kuchita vinthu vomwe vingakuthandizeni kuti muchinje. Vitsanzo va Akhrisitu wakalekale na wa ntsiku zino vingakulimbikiseni. Tinkudikhira kuti vitsanzo mwevi vidzakulimbikiseni kudzipereka kwa Yahova na kubatizika. Chimwechi chidzakhale chosalula chabwino maninge pa moyo wanu.