Pewani kukhala na ntima wodzikuza womwe wanthu wa ndziko iyi anawo

KO IMWEPO munkukwanisa kuona kuti wanthu azinji ndziko iyi adziona kuti ni odekana kupasiwa ulemu panango kutambira udindo wapadera? Olo kuti iwo achitiriwa kale vinthu mwapadera koma awona kuti vinkuwachepera. Wanthu ninge mwawa ni odzikonda ndipo atembejalini vinthu vomwe anavo. Ndipo Baibolo inena kuti makhalidwe mwaya yadzakule maninge mu ntsiku zomalizira.—2 Tim. 3:2.

Ni shuwandi kuti kudzikuza ni nkhanilini yachilendo. Mwakulinganiza, Adamu na Hava adafuna kusalula okha chabwino na choipa ndipo ndawa ya vimwevo tose ntsiku zino tibonera. Magole yazinji patsogolo pake Mpfumu Uziya ya ku Yuda imbaganiza kuti inaudindo wopereka ntsembe mu kachisi koma kunena shuwa iyo imbadzinamiza. (2 Mbiri 26:18, 19) Afalisi na Asaduki ambaganiza kuti kwa Mulungu iwo enze odekana maninge ndawa yakuti enze m’bandwa za Abulahamu.—Mat. 3:9.

Isepano tinkukhala ndziko yomwe wanthu azinji ni wodzikuza ndipo makhalidwe yawo tingayatengerembo. (Agal. 5:26) Tingayambe kukumbuka kuti isepano ndise woyenerera maudindo yanango panango vinthu vinango va bwino olo panango kuchitiriwa vinthu vinango vapadera. Ko tingachite tani kuti tileke kutengera maganizo mwaya? Chakuyamba, tidekana kubvesa vomwe Yahova aganiza pa nkhani mweyi. Mpfundo ziwiri za m’Baibolo zitithandize.

Yahova ni yemwe adziwa vomwe tinkudekana kutambira. Onani vitsanzo vinango.

Yahova adakodza vakuti m’banja mwamuna ambapasiwe ulemu na nkazi wake nakuti nkazi andekana kumbadzibva kuti mwamuna wake amukonda. (Aef. 5:33) Munthu wolowodwa adikhirira kuti munzake ambakhale na maganizo ya chikondi kwa iye yekha. (1 Akor. 7:3) Pomwe azibereki angafune kuti wana wawo akhale obvera ndipo wana adekana kutambira chikondi na thandizo ya azibereki wawo.—2 Akor. 12:14; Aef. 6:2.
Yahova adakonza pomwe vakuti akulu ambalemekezewe ndawa ya basa zomwe achita. (1 Ates. 5:12) Koma nthawe imbodzibodzi mweyo iwo alibe ulamuliro wakuti ambanyang’anire chirichose chomwe abale na alongo achita.—1 Pet. 5:2, 3.
Yahova adapereka ufulu wakuti maboma yambakhomese ntsonkho komasoti na kulemekezewa na wanthu wake.—Aro. 13:1, 6, 7.

Ndawa ya chikondi Yahova atipasa vinthu vizinji kuposha vomwe isepano tingadekane kutambira. Ndawa yakuti ndise ochimwa chinthu chomwe tingayenerere ni impfa basi. (Aro. 6:23) Olo nteno Yahova atipasa madaliso yazinji maninge ndawa ya chikondi chake chokhulupirika kwa isepano. (Sal. 103:10, 11) Mphaso iliyose panango utumiki womwe tidatambira vidakwanisika ndawa ya kukoma ntima kukulu kwa Yahova.—Aro. 12:6-8; Aef. 2:8.

KO MUNGACHITE TANI KUTI MULEKE KUKHALA ODZIKUZA NA KUDZIONA KUKHALA WOFUNIKA MANINGE KUPOSHA ANANGO?

Khalani osamala kuti muleke kumbaganiza ninge momwe aganizira wanthu wa ndziko ya Satana iyi. Mosazindikira tingayambe kuganiza kuti ndise woyenerera kutambira vinthu vizinji kuposha anango. Nthawe inango, Yesu adafotokoza chitsanzo chomwe chionesa kuti ni vosashupa kuyamba kutengera kaganizidwe mwaka. Iye adafotokoza va azinyabasa anango omwe adabvuma kuphata basa ntsiku ibodzi kuti atambire kobiri ibodzi ya dinari. Patsogolo pake bwana wawo adanemba pomwe basa azinyabasa anango. Koma kufika maulo azinyabasa ose adatambira malipiro yabodzibodzi olo wale omwe adandophata basa kwa ora ibodzi basi. Koma azinyabasa omwe adayamba kuphata basa machibese ambaganiza kuti ni woyenerera kutambira malipiro yazinji ndawa yakuti enze adaphata basa ntsiku yose padzuwa. (Mat. 20:1-16) Na chitsanzo mwechi Yesu adaonesa kuti ateweri wake adekana kukhala okhutira na vomwe Mulungu wasalula kuwapasa.

Anango mwa azinyabasa wa mu fanizo ya Yesu ankudandaula kwa bwana wawo. — Azinyabasa omwe aphata basa ntsiku yose ambaganiza kuti ni oyenerera kutambira malipiro yazinji

Khalani otembeja ndipo ayi kufuna vizinji. (1 Ates. 5:18) Tewedzerani chitsanzo cha ntumi Paulo yemwe alibe kukumbira thandizo yakuthupi kwa abale wake wa ku Korinto olo kuti wenze na udindo wochita vimwevi. (1 Akor. 9:11-14) Tichadekana kukhala otembeja madaliso yose yomwe tatambira ndipo ayi kumbafuna vinthu va anango.

Paulo na amuna anango awiri ankukonza matenti pabodzi. — Ntumi Paulo alibe kukumbira thandizo yakuthupi abale wake

Khalani odzichepesa. Munthu akambaganiza kuti ni wodekana maninge kuposha anango, kazinjikazinji iye ayamba kuganiza kuti ni woyenerera kutambira vizinji kuposha vomwe anavo. Kudzichepesa ni mankhwala ya kaganizidwe kamwaka komwe kafalikira.

Mafoto: 1. Mneneri Danieli pomwe wakalamba. 2. Thaundi ya Babulo. 3. Danieli ali mulumbwana pabodzi na alumbwana anzake atatu wa Chiheberi. — Kukhulupirika kwa Danieli kudachitisa kuti akhale ntumiki wodekana maninge kwa Yahova

Mneneri Danieli ni chitsanzo chabwino cha kudzichepesa. Iye wenze wochokera m’banja yolemekezeka, wenze nkhuzi, wenze wodziwa vinthu ndipo wenze na maluso yazinji. Ndipomwapa, iye adakaganiza kuti ni woyenerera kutambira ulemu wapadera pa maudindo yomwe iye adapasiwa. (Dan. 1:3, 4, 19, 20) Koma Danieli adapitiriza kukhala wodzichepesa ndipo makhalidwe mwaya yadamuchitisa kuti akhale munthu wofunika kwa Yahova.—Dan. 2:30; 10:11, 12.

Tichadekana kukhala otsimikiza kudziteteza ku mzimu wodzikuza na wodzikonda womwe wafala ndziko iyi. M’malo mwa vimwevi tichadekana kukhala wokondwa na madaliso yose yomwe Yahova watipasa ndawa ya kukoma ntima kwake kukulu.