“Niribe kukhala nekha”

CHITSANZO CHA AZIBEREKI WANGU

Ababa na Amayi, enze Akatolika wakhama. Koma pomwe adapfunzira m’Baibolo kuti dzina ya Mulungu ni Yahova, ose adakhala Mboni za Yahova za khama. Ababa adasiya kusema vifanizo va Yesu. M’malo mwa vimwevi, adaphatisa basa luso yawo yosema vinthu pa kukonza nyumba yathu ya pasi kukhala Nyumba ya Ufumu yoyamba ku San Juan del Monte, ku thaundi ya Manila, kulikulu ya dziko ya Filipinas.

Pomwe nidabadwa mu 1952, azibereki wangu adayambambo kunipfunzisa vokhudza Yahova pabodzi na azibale wangu amuna anayi na azilongosi wangu atatu. Pomwe nimbakula ababa wangu adanilimbikisa kuti nimbawerenge msolo m’bodzi wa m’Baibolo ntsiku iriyose ndipo ambapfunzira nane mabukhu yazinji maninge ya gulu yathu. Nthawe zinango azibereki wangu ambachemera wonyang’anira dera na woyimila Nthambi kuti adzafikire kumuyi kwathu. Ninge banja timbakondwa maninge na kulimbikisiwa na vitsanzo vabwino maninge vomwe abale mwawa ambatifotokozera pa vomwe adagumana navo. Ni vomwe vidatilimbikisa tose kuikha utumiki pa malo ya kuyamba pa moyo wathu.

Azibereki wangu adanisiyira chinthu chodekana maninge chomwe ni chikhulupiriro. Patsogolo pakuti amayi wangu amwalira ndawa ya kudwala, inepano na ababa tidayamba kutumikira ninge apainiya mu 1971. Koma mu 1973 pomwe nenze na magole 20 ababa wangu adamwalira. Kuluza azibereki wangu kudanichitisa kuti nimbadzibve kuti niri nekhanekha. Chidikhiro chathu chomwe ni “chotsimikizirika komasoti chokhazikika” chomwe chigumanika m’Baibolo chidanithandiza maninge kukhala wodekha maganizo na wolimba mwauzimu. (Aheb. 6:19) Ababa wangu pomwe adandomwalira nidabvuma kuchita upainiya wapadera pa ntsuwa ya kutali ku Coron, ku província ya ku Palawan.

NEKHANEKHA PA MABVUTO YOSHUPA

Nenze na magole 21 pomwe nidafika ku Coron. Ndawa kuti nidakulira ku thaundi nidadabwa maninge kubva kuti pa ntsuwa mwapa penze palibe magetsi yazinji, penze palibe madzi ya patrunera ndipo kwenze karo zing’onong’ono na mimota. Olo kuti penze abale, nenze nilibe munthu wochita naye upainiya ndipo nthawe zinango nimbayenda nekha mu umboni. Mwezi wakuyamba nimbasuwa maninge azibale wangu komasoti azishamwali. Usiku nimbanyang’ana kudzulu komwe kuna nyenyezi uku ninkulira nimbandowona kuti nisiye basa yangu basi nkubwerela kumuyi.

Pa nthawe mweyire yomwe nimbadzibva nekhanekha nidapemphera kwa Yahova. Nimbakumbukira mpfundo zomwe nidawerenga m’Baibolo na m’mabukhu yathu. Salimo 19:14 imbanibwerera maninge m’maganizo mwangu. Nidazindikira kuti Yahova angakhale “Dwale yangu na wonipulumusa” peno ningaganizire vinthu vomwe vingamukodwerese ninge basa zake na makhalidwe yake. Nkhani ya mu Ntsanja ya ulonda yakuti: “Murilini mwekha”a idanithandiza maninge, nidayiwerenga mobwerezabwereza mwanjira inango ninganene kuti pa nthawe mweyi nenze pabodzi na Yahova. Vimwevi vidanipasa mwayi wabwino wakuti nimbapemphere, kupfunzira na kuganizira vomwe nimbapfunzira.

Pomwe nidandofika ku Coron, nidayikhiwa kukhala nkulu. Ndawa yakuti nkulu nenze nekha, sondo iriyose nidayamba kuchitisa shikola ya utumiki, nsonkhano wokonzekera mu umboni, kuchitisa pfunziro ya Baibolo ya mpingo na Ntsanja ya ulonda. Komasoti nimbakamba nkhani za ose sondo iriyose. Chinthu chibodzi chenze chotsimikizirika, ndawa ya vochitika vizinji mwevi nimbadzibvalini kuti niri nekhanekha.

Nidakondwa maninge na utumiki ku Coron ndawa yakuti yanango mwa mapfunziro yangu yadabatizika. Koma penze mabvuto yanango. Nthawe zinango nimbadekana kufamba pafupifupi ntsiku ya ntero kuti nikafike ku gawo. Ne nimbadziwalini kuti nikagone kuponi nikafika. Gawo ya mpingo muyo yenze pomwe na ntsuwa zinango zing’onozing’ono. Nthawe zizinji nimbafamba pa barko kunkuchita chonzi kuti nikafike kumoku olo kuti nimbadziwalini kunyaya. Pa mabvuto yose mwaya Yahova adaniteteza ndipo adanisamalira. Patsogolo pake nidazindikira kuti Yahova ambanikonzekeresa kuti nikakwanise kulimbana na mabvuto yanango yakulu maninge pa utumiki wangu unango.

PAPUA-NOVA GUINÉ

Mu 1978, nidatumiziwa ku Papua-Nova Guiné, ku norte kwa Austrália. Papua-Nova Guiné ni dziko ya maphiri pafupifupi kukula kwa dziko ya Espanha. Nidadabwa maninge pakuzindikira kuti wanthu pafupifupi 3 midyau ambayankhula viyankhulo voposha 800. Chokomedza ni chakuti wanthu azinji ambayankhula chiyankhulo chachi Melanesian Pidgin, chomwe chidziwika kuti Tok Pisin.

Nidayikhiwa kwa ka nthawe ku mpingo wa Chingelezi ku likulu ya Port Moresby. Koma patsogolo pake nidachinja nkuyenda ku mpingo wa chiyankhulo cha Tok Pisin ndipo nidapfunzira pomwe chiyankhulo mwechi. Mu umboni nimbaphatisa basa vomwe nimbapfunzira. Vimwevi vidanithandiza kuti nizolowere mwakankulumize chiyankhulo mwechi. Nthawe pang’ono patsogolo pake nidakwanisa kukamba nkhani yangu ya wose mu chiyankhulo cha Tok Pisin. Nidadabwa maninge kuona kuti pomwe nikalimbe kukwanisa gole ku Papua-Nova Guiné, nidayikhiwa kukhala wonyang’anira dera wa mipingo ya chiyankhulo cha Tok Pisin m’ma província yosiyanasiyana.

Ndawa yakuti mipingo yenze kutali na kutali nimbafunika kukonza misonkhano ya padera yazinji na kufamba malo yosiyanasiyana. Pakuyamba nimbadzibva nekhanekha ku dera yachilendo, dziko inyowani, chiyankhulo chinyowani na vikhalidwe vinyowani. Ndawa ya maphiri venze voshupa kukazungira mipingo. Ndipomwapa, nimbadekana kuchita maulendo pa ndeke sondo iriyose. Nthawe zinango nimbakhaliratu nekhanekha mu ndeke yosathembeka. Maulendo mwaya yenze yoshupa maninge ninge kufamba pa barko!

Kwenze wanthu ang’onong’ono okha omwe enze na mafoni ndipo kuti nikwanise kumbayankhulana na mipingo nimbachita kutumiza makalata. Nthawe zizinji nimbafika kumipingo makalata yangu yakanati yafika ndipo nimbadekana kuchita kubvunza kuti: Ko wa Mboni za Yahova ni waponi? Ndipo nthawe zizinji nikagumana nawo abale mwawa ambanitambira mwachikondi ndipo vimwevi vimbanichitisa kukumbukira khama yose yomwe nachita. Nimbabva kuti Yahova ankunithandiza munjira zizinji maninge ndipo ushamwali wangu na iye udakula maninge.

Pa ulendo wangu wakuyamba pa ntsuwa inango yochemerewa kuti Bougainville, banja inango idanifenderera nkunibvunza kuti: “Ko unkutikumbukira?” Ninkukumbukira kuti nidalalikira banja mweyi pomwe nidandofika ku Port Moresby. Nenze nidayamba kupfunzira nawo Baibolo nikalibe kuuza m’bale munango kuti ambapfunzire nawo. Pamwapa ose awiri enze adabatizika. Mwaya ni yabodzi mwa madaliso yomwe nidatambira pa magole yatatu yomwe nidamala ninkutumikira ku Papua-Nova Guiné.

BANJA ING’ONO KOMA YOPANIKIZIKA NA VINTHU VAUZIMU

Nikalibe nachoka ku Coron mu 1978, nidadziwana na mulongo munango nkhuzi maninge komasoti wakhama nzina yake Adel. Wenze mpainiya wokhazikika uku ankulera wana wake awiri, Samuel na Shirley. Nthawe ibodzibodzi mweyo ambasamalira amayi wake wokalamba. Mu Maio 1981, nidabwerera ku Filipinas kuti nikalolane na Adel. Pomwe tidandololana tidayamba kutumikira ninge apainiya okhazikika uku tinkusamalira banja yathu.

Olo kuti nenze na banja, mu 1983, nidaikhiwa pomwe kukhala mpainiya wapadera ndipo adanitumiza ku ntsuwa ya Linapacan, província ya Palawan. Banja yathu yose idafuluka nkuyenda kudera mweyi olo kuti kwenze kulibe wa Mboni za Yahova. Amayi wake wa Adel adamwalira pomwe padandopita gole ibodzi. Olo nteno, tidapitiriza kuchita khama maninge mu umboni vimwevi ndivo vidatilimbikisa maninge pa nthawe mweyire. Tidayambisa mapfunziro yazinji ya Baibulo ku Linapacan yomwe yambayenda patsogolo, mwakuti pakanthawe kang’onong’ono pambadekana Nyumba ya Ufumu. Ndipomwapa tidamanga tekha Nyumba mwiyo. Pomwe padapita magole yatatu isepano tafika pa ntsuwa mweyi, tidakondwa maninge kuona wanthu 110 agumanika pa Chikumbuso. Pomwe isepano tidachoka, azinji mwa iwo adapita patsogolo mpakana kubatiziwa.

Mu 1986, nidatumiziwa kuyenda ku ntsuwa ya ku Culion, komwe kwenze na matenda ya khate. Patsogolo pake Adel, adaikhiwambo kukhala mpainiya wapadera. Pakuyamba timbabva mantha kulalikira wanthu omwe ambadwala khate. Ofalisa wakumoku adatitsimikizira kuti wanthu omwe ambadwala khate adatambira chithandizo chamankhwala mwakuti vingakhale voshupa kupasira anango. Anango mwa wanthu mwawo omwe ambadwala khate, ambanyang’anira misonkhano ku nyumba kwa mulongo munango. Mwakanthawe pang’ono tidanjaira mwakuti tidaona kuti ni mwayi wathu kulalikira va chidikhiro kwa wanthu mwawo omwe ambadzibva kuti niosafunika kwa Mulungu komasoti kwa wanthu anango. Venze vokomedza kuona wanthu omwe ambadwala maninge ankukondwa nachidikhiro chakuti ntsiku inango adzakhale na thanzi yabwino.—Luka 5:12, 13.

Ko wana wathu adazolowera tani moyo wa ku Culion? Inepano na Adel tidakumbira atsikana anango awiri kuti ambakhale nase pabodzi kuti wana wathu akhale na anzawo wabwino osenzeka nawo. Samuel, Shirley na atsikana awiri mwawo adakondwa maninge na utumiki wawo wakupfunzisa wana azinji pomwe inepano na Adel timbapfunzira na azibereki wa wana mwawa. Shuwadi, mpakana nthawe zinango timbapfunzira na mabanja yokwana 11. Nthawe pang’ono tidayamba kuchitisa mapfunziro yazinji ya Baibolo yopita patsogolo ndipo tidakhazikisa mpingo unyowani!

Pakuyamba nkulu nenze nekha basi muko, ndipomwapa Ofesi ya Nthambi idanikumbira kuti nimbachitise misonkhano ofalisa 8 waku Culion nkukachita pomwe misonkhano na ofalisa 9 waku dera ya Marily komwe ni nsenga wamaora 6 pa ulendo wa barko. Ndipo misonkhano ikamala, ninge banja timbafamba maora yazinji maninge kuyenda kukachitisa mapfunziro kudera inango yamaphiri yochemerewa Halsey.

Patsogolo pake tidaona kupita patsogolo kwa wanthu wa ku Marily na ku Halsey mwakuti tidamanga Nyumba za Ufumu kumalo yose yawiri mwaya. Ninge ku Linapacan, abale na wanthu anango wachidwi adapereka vipangizo vizinji vomangira na kudzipereka kuphata basa. Nyumba ya Ufumu ya ku Marily imbakwana wanthu 200, ndipo vimwevi vidatithandiza kuti timbachitire pomwe misonkhano yadera.

KUKHUMUDWA, KUDZIBVA KUKHALA WEKHA NA CHIMWEMWE CHINYOWANI

Mu 1993 pomwe wana wathu adakula, inepano na Adel tidayamba utumiki wonyang’anira dera ku Filipinas. Mu 2000, nidangena shikola ya wolalikira va Ufumu ndipo nidapfunzisiwa kuti nikhale mpfunzisi wa shikola mweyi. Nimbaona kuti ningakwaniselini basa mweyi koma Adel nthawe zose ambanilimbikisa. Adanikumbusa kuti Yahova adzanipase mphanvu kuti nikwanise kuchita utumiki moyu. (Afil. 4:13) Adel adanifotokozera chitsanzo chake chomwe chimbamuchitisa kukwanirisa utumiki wake pomwe wenze na bvuto ya thanzi.

Mu 2006 pomwe nimbapfunzisa shikola ya wolalikira va Ufumu, Adel adagumanika na matenda ya Parkinson. Nidakhumudwa maninge! Pomwe nidayankhula va maganizo yangu yakuti tibakaime na utumiki wathu kuti tisamalire va thanzi yake, Adel adadawira kuti: “Pulizi nyang’anani mfulumelo yemwe anganithandize, ndipo ninkudziwa kuti Yahova atithandize kuti tipitirize na utumiki wathu.” Magole 6 patsogolo pake, Adel adapitiriza kutumikira Yahova mosadandaula. Pomwe adafika posakwanisa kufamba, iye adapitiriza kulalikira pophatisa basa kanjinga ka wanthu olumala. Pomwe ambakwanisalini bwinobwino kuyankhula ambapereka ndemanga na mawu yabodzi panango yawiri pamisonkhano. Kazinji kazinji, Adel ambatambira mensaje zomutembeja ndawa ya chitsanzo chake chabwino chopirira. Ndipo iye adamwalira mu 2013. Nidamala magole 30 niri pabodzi na munzangu wokhulupirika komasoti wachikondi koma manjeuno nayamba pomwe kunzibva kukhala nekhanekha komasoti wokhumudwa.

Adel ambafuna kuti nipitirize na utumiki wangu ndipomwapa nikali kuchita vimwevi. Kukhala wopanikizika ndiko kwanithandiza kuti nimalise bvuto yangu yakudzibva kuti niri nekhanekha. Kuchoka 2014 mpakana 2017, nidatumiziwa kuti nikafambire mipingo ya chiyankhulo cha Tagalog mu madziko yomwe basa yathu yenze yolambiziwa. Patsogolo pake nidafambira pomwe mipingo ya chiyankhula cha Tagalog ku Taiwan, Etados Unidos, na ku Canadá. Mu 2019, nidapfunzisa shikola ya wolalikira va Ufumu mu Chingerezi ku Índia na ku Tailândia. Nakhala wokondwa maninge pa mautumiki yose mwaya. Nikhala wokondwa nikakhala kuti ninavochita vizinji pa basa yotumikira Yahova.

THANDIZO ILILINI KUTALI

Pa utumuki uliose unyowani, nikonda maninge abale na alongo omwe niwagumana kumoku. Ndipomwapa, nivoshupa maninge kuwasiya. Napfunzira kuthemba Yahova na ntima wose. Nthawe zizinji nakhala ninkuona thandizo yake, vimwevi vanithandiza kuti nimbabvume na ntima wose kuchinja kulikose komwe kungachitike. Pano ninkutumikira ninge mpainiya wapadera ku Filipinas. Nidakhazikika mu mpingo wangu unyowani womwe wakhala banja yachikondi kwa inepano komasoti nikhala wokondwa maninge kuona Samuel na Shirley akutewedza chikhulupiriro cha amayi wawo.—3 Yoh. 4.

Shuwadi, nagumana na viyeso vizinji maninge pa moyo wangu kuphatanidzapo kuona nkazi wangu yemwe nimbamukonda maninge ankubonera na matenda yofokesa mpakana kumwalira. Nimbafunika kuzolowera vinthu vizinji maninge vinyowani. Olo nteno, nakhala ninkuona kuti ‘Yahova alilini kutali na aliyese wa isepano.’ (Mac. 17:27) Djanja ya Yahova ‘ilibe kufupika’ mwakuti ingatazire kuthandiza na kulimbikisa atumiki wake olo kumadera yakutali. (Yes. 59:1) Yahova yemwe ni Dwale yangu wakhala nane moyo wangu wose, ndipo nimutembeja maninge. Nilibe kukhalako nekha.