Mibvunzo yochokera kwa owerenga

Pomwe Yesu adayambisa chakudya chamaulo cha Ambuya, ko opfunzira 70 omwe iye adawatuma kukalalikira enze kuponi? Ko enze adamuthawa?

Nishuwadi kuti opfunzira 70 enzepolini pomwe Yesu adayambisa chakudya chamaulo cha Ambuya. Vimwevi vinkutanthauzalini kuti iwo enze adamuthawa Yesu panango enze osabvumizika. Koma Yesu ambandofuna kukhala na atumi wake pa nthawe mweire.

Amuna 12 na 70 wale ose enze opfunzira wa Yesu. Pakuyamba Yesu adasalula amuna 12 pa opfunzira azinji omwe wenze nawo. Ndipo iye adachemera amuna 12 mwawa kuti atumi. (Luka 6:12-16) Iye wenze ku Galileya pomwe “adasonkhanisa atumi 12” ndipo “adawatumiza kuti ambakalalikire va Ufumu wa Mulungu komasoti kupolesa wanthu.” (Luka 9:1-6) Patsogolo pake ku Yudeya “adasankhula pomwe wanthu anango 70 nkuwatumiza awiriawiri.”(Luka 9:51; 10:1) Ndipomwapa, Yesu wenze na opfunzira m’madera yosiyanasiyana komwe ntontholo wake umbalalikiriwa.

Ayuda omwe adakhala opfunzira wa Yesu ambafunika kupitiriza kukumbukira Pasika wa pagole ndipo ambachita vimwevi pabodzi na mabanja yawo. (Eks. 12:6-11, 17-20) Wasala pang’ono kufa, Yesu na opfunzira wake adayenda ku Yerusalemu. Koma alibe kuchemera opfunzira wake ose ochokera ku Yudeya, Galileya na Kupereya kuti adzachite nawo pabodzi chikondwerero chikulu cha Pasika. Pamwapa vinkuonekeratu kuti Yesu ambafuna kukhala na atumi wake pa nthawe mweire. Iye adawauza atumi 12 wale kuti: “Nakhala ninkufunisisa maninge kuti nidye Pasika muyu pabodzi na imwepo nikalibe kuyamba kudzudzika.”—Luka 22:15.

Yesu wenze na vifukwa vobveka vochitira vimwevi. Iye wenze pafupi kufa ninge “mwana wankhosa wa Mulungu yemwe ankuchosa uchimo wa dziko.” (Yoh. 1:29) Wenze kudzafera ku Yerusalemu komwe wanthu ambapereka ntsembe kwa Mulungu kwa magole yazinji. Pasika ambakumbusa Aizirayeli vomwe Yahova adachita pa kuwachosa ku Iguputo. Koma Ntsembe ya Yesu imbadzakhala ikulu maninge, imbadzamasula wanthu ose ku uchimo na impfa. (1 Akor. 5:7, 8) Impfa ya Yesu idachitisa kuti atumi 12 wale akhale obvumizika kukhala fundasau ya mpingo wa Chikhrisitu. (Aef. 2:20-22) Ni vokomedza maninge kuti Yerusalemu wakudzulu ana ‘minyala yokwana 12 yomangira fundasau’ ndipo paminyala mwayo padanembewa ‘madzina 12 ya atumi 12 wa Mwanawankhosa.’ (Chiv. 21:10-14) Vimwevi vinkuonesa kuti atumi enze kudzakhala na udindo ukulu pakukwanirisa cholinga cha Mulungu. Ndipomwapa, ni vobveka kuti Yesu adafuna kuti akhale nawo pa Pasika womalizira ule na pa chochitika chapadera chomwe iye adayambisa patsogolo pake. Chomwe ni chakudya chamaulo cha Ambuya.

Opfunzira 70 na opfunzira anango enzelini pabodzi na Yesu pa chakudya mwechi. Olo viri teno, opfunzira ose omwe adakhala okhulupirika aphindula na mwambo womwe Yesu adauyambisa womwe ni chakudya chamaulo cha Ambuya. Akhrisitu ose omwe adadzakhala odzodzewa patsogolo pake, angena mu pangano ya Ufumu womwe Yesu adatomola kwa atumi wake usiku moule.—Luka 22:29, 30.