Vomwe mungachite kuti muzolowere mpingo unyowani

KO IMWEPO nthawe inango mudachinja kale mpingo? Peno m’dawiro ni wakuti inde, mungabverane navo vomwe adalewa m’bale munango dzina yake Jean-Charles. Iye adanena kuti: “Ni voshupa kuzolowera mpingo unyowani, nthawe ibodzibodzi mweyo unkusamalira uzimu wa banja.” Kuingizira pakufaga basa, nyumba panango kufaga shikola komwe wana akapfunzire, omwe achinja mpingo ashupika pomwe kuti azolowere nyengo, chikhalidwe na dera inyowani yolalikira.

Nicolas na Céline adalimbana na bvuto yosiyana. Beteli ya ku França idawatumiza kuti ayende ku mpingo munango. Iwo adanena kuti: “Pakuyamba tenze okondwa, koma patsogolo pake tidayamba kusuwa azishamwali wathu. Tenze tikalibe azishamwali azinji mumpingo unyowani.”a Na mabvuto yose mwaya, ko mungachite chani kuti mukhale okondwa mumpingo unyowani? Ko anango angachite chani kuti athandize ndipo ni madaliso yaponi yomwe mungapereke na kutambira mumpingo wanu unyowani?

VINTHU VINAYI VOMWE VINGAKUTHANDIZENI KUZOLOWERA

Mulongo ankupuma pa basa yake yofungula makasha ndipo ankuwerenga Baibolo. — Thembani Yahova

1. Thembani Yahova. (Sal. 37:5) Mulongo munango wa ku Japão dzina yake Kazumi, wenze adakhala magole 20 mumpingo wawo pomwe mwamuna wake adachinjiwa kuti akaphate basa kunango. Ko iye adabvuma tani kuti Yahova amutsogolere? Iye adanena kuti: “Nidapemphera maninge kwa Yahova ndipo nidamuuza momwe nimbabvera. Nenze na mantha, nimbadzibva kuti nili nekha ndipo nenze na nkhawa maninge. Koma nthawe iriyose yomwe nimbapemphera, Yahova ambanipasa mphanvu zomwe nimbadekana.”

Ko chani chomwe imwepo mungachite kuti mumbathembe maninge Yahova? Ninge muti womwe uchathemba madzi na dzuwa kuti ukule, nchibodzibodzimbo, chikhulupiriro chathu tichadekana kuchipfunzisa kuti tikhale olimba. Na thandizo ya Yahova, Nicolas yemwe tamutomola kumayambiriro ule adalimbisa chikhulupiriro chake pakuganizira chitsanzo cha Abulahamu, Yesu na ntumi Paulo omwe adadzimana vinthu vizinji kuti achite chifuniro cha Yahova. Ndandanda yabwino ya pfunziro ya pamwekha ithandizalini imwepo mwekha pakulimbana na mabvuto ya moyo, koma idzakulimbiseni kuona njira ya momwe mungalimbikisire anango mumpingo wanu unyowani.

Nkulu ankubvesera pomwe abale awiri wachilumbwana ankufotokoza momwe aphatisirira basa vipangizo vokuzira mawu na kuwonesera mavidiyo mu Nyumba ya Ufumu. — Ayi kumbalinganiza

2. Ayi kumbalinganiza. (Mla. 7:10) Jules Adafuluka kuchoka ku Benin komwe ni ku África nkuyenda ku Estados Unidos ndipo adaona kuti chikhalidwe chenze chosiyana maninge. Iye adanena kuti: “Inepano nimbaona kuti nimbadekana kuuza anango va mbiri yangu.” Ndawa ya kusiyana chikhalidwe kumoku iye adayamba kudzipatula na abale. Patsogolo pakuti awadziwa bwinobwino abale adachinja momwe angachitira vinthu. Iye adanena kuti: “Ninkukhulupirira kuti viribe basa komwe tichakhala, tose ndise olingana, kundoti tichita vinthu mosiyana. Koma chodekana ni kubvuma momwe wanthu wa kudera mweyo aliri.” Ni vosafunika pomwe kulinganiza mpingo unyowani na mpingo womwe tidachoka. Mpainiya munango dzina yake Anne-Lise adanena kuti: “Niribe kuchinja mpingo kuti nimbalinganize na vomwe nidasiya kumbuyo. Inepano nidachinja kuti nipfunzire vinthu vinango.”

Akulumbo achadekanalini kulinganiza mpingo unyowani na mpingo womwe adachoka. Peno abale wa mumpingo unyowani akuchita vinthu mosiyana na mpingo womwe adachoka, vinkutanthauzalini kuti iwo ni ophonyeka. Ni nzeru kuyamba taona momwe vinthu viliri mu dera mweyo tikanati talewa maganizo yathu. (Mla. 3:1, 7b) Ni vabwino pomwe kupfunzisa abale na chitsanzo chathu chabwino, m’malo mwakuwachichimiza kuti ambaone vinthu ninge momwe isepano tichavionera.—2 Akor. 1:24.

Abale awiri ankupukuta janera ya Nyumba ya Ufumu. — Khalani otangwanika

3. Mbakhalani otangwanika. (Afil. 1:27) Kuchinja kuchafuna nthawe ikulu na mphanvu. Koma ni vabwino kuti timbagumanike pa misonkhano yose maso na maso ndipo timbafike mwakankulumize misonkhano yakanati yayamba. Peno abale wa mumpingo unyowani ationalini kumisonkhano, ko iwo adzatithandize tani? Mulongo munango dzina yake Lucinda na wana wake awiri adafuluka nkuyenda kukakhala mu thaundi ikulu ku África do Sul. Iye adanena kuti: “Azishamwali wangu adanilimbikisa kuti nimbakachite khama kuti nigumane azishamwali anyowani mumpingo unyowani. Timbaphata nawo basa pabodzi mu umboni, timbagumanika pa misonkhano ndipo tidapereka pomwe ufulu kuti kumuyi kwathu kumbachitikire nsokhano woyenda mu umboni.”

Chomwe chidzakuthandizeni imwepo na kulimbikisa anango ni “kuphata nawo basa pabodzi” mumpingo wanu unyowani. Akulu wa mumpingo wa Anne-Lise yemwe tamutomola pakuyamba adamulimbikisa kuti ambachoke mu umboni na abale ose wa mumpingo. Ko phindu yenze iponi? Iye adalewa kuti: “Kwa nthawe pang’ono nidabvesa kuti mweyi yenze njira yabwino maninge yomwe idanithandiza kuti nidzibve kuti ninkuchita mbali ya mpingo unyowani moyu.” Kuingizira mwapa, mukambagumanika pa basa yosamalira Nyumba ya Ufumu, imwepo mudzaonese kuti mpingo unyowani, manje ni mpingo wanu. Mukambadzipereka maninge pa basa mwezi abale adzakhale omasuka namwe ndipo imwepo mudzadzibve kukhala mbali ya banja inyowani yauzimu mweyi.

Mabanja yawiri yankukondwa pomwe ankudya pabodzi. — Yesesani kukhala na azishamwali anyowani

4. Khalani na azishamwali anyowani. (2 Akor. 6:11-13) Njira yabwino yogumanira azishamwali ni kuchita nawo chidwi abale. Ndipomwapa mbafikani mwakankulumize pa misonkhano ndipo misonkhano yakamala ayi kuchokeratu mwakankulumize kuti mucheze na abale na kuwadziwa bwinobwino. Chitani khama kuti mudziwe madzina yawo. Mukambakumbukira madzina ya abale, kukhala okoma ntima na ofatsa kudzachitise kuti abale ambadzibve omasuka kukufendererani ndipo vidzakhale vosashupa kuti mukhale na azishamwali.

Ayi kudera nkhawa na momwe abale angambakuonereni koma bvumani kuti akudziweni ninge momwe muliri. Chitani vinthu ninge momwe Lucinda adanenera kuti: “Isepano tingakhale na azishamwali wabwino tikambawachemera kuti abwere kumuyi kwathu.”

“MBATAMBIRANI ANANGO”

Anango akhala na mantha yongena mu Nyumba ya Ufumu momwe mu na abale azinji omwe ankuwadziwalini. Manje mungathandize tani wanthu anyowani omwe abwera mumpingo wanu kuti azolowere? Ntumi Paulo adanena kuti: “Timbatambirane ninge momwe Khrisitu adatitambirira.” (Aro. 15:7) Akulu angathandize pomwe abale anyowani kudzibva kuti atambiriwa. Mwanjira mweyi, iwo akhala ankutewedzera Yesu. (Onani bokosi yakuti: “Ko tingachite chani kuti kuchinja mpingo kukhale kosashupa?”) Abale ose mumpingo kuphatanidza pomwe wana angathandize abale anyowani kuti ambadzibve ninge ali kumuyi.

Ko tingachite chani kuti kuchinja mpingo kukhale kosashupa?

Vomwe mungachite: Padakali nthawe, mungadziwise abale wa mumpingo womwe muli na akulu wa mpingo womwe munkuyenda, ndipo auzeni nthawe yomwe mudzachoke, komwe mukakhale na kuwapasa namba ya foni yanu. Fufudzani kuti mudziwe komwe kuli Nyumba ya Ufumu na nthawe ya misonkhano. Pa nsonkhano wanu woyamba ku mpingo unyowani, dzidziwikiseni kwa akulu na abale.

Vomwe akulu angachite: Mulembi wa mpingo wanu wakale achadekana kutumiza kalata yokudziwikisani na cholembera cha ofalisa mwakankulumize. Wonyang’anira utumiki achadekana kuikha abale anyowani m’magulu ya utumiki akandofika mumpingo ndipo vingakhale pomwe bwino kuti wonyang’anira kagulu achite ulendo wa ubusa abale omwe andofika kumene mumpingo kukawalimbikisa na kuwaonesa kuti atambiriwa.

Kutambira anango, kuphatanidza pomwe kukhala ochereza komasoti kuwathandiza mwakuthupi. Mwakulinganiza, mulongo munango adathandiza mulongo yemwe wenze adandofika kumene mumpingo pakumuonesa thaundi na vomwe angachite akafuna kupakira karo zotakura wanthu. Mulongo yemwe wenze adandofika kumene mumpingo adachita chidwi na vomwe mulongo moyu adachita. Vimwevi vidamuthandiza kuti azolowere mpingo unyowani.

MWAYI UNANGO WOMWE UNGATITHANDIZE KUKULA MWAUZIMU

Kuti bombo akwanise kufuthula maphaphiro kumbululuka, achagundula maulendo yazinji. Nchibodzibodzimbo, imwepo mukachinja nkuyenda mumpingo unango, muchadekana kumalisa mantha yaliyose yomwe munayo yomwe yangakukangiseni kufuthula maphaphiro nkumbululuka panango kuti kuchita vizinji pa basa ya Yahova. Nicolas na Céline omwe tawatomola pakuyamba wale adalewa kuti: “Kuchinja mpingo ni thereno yabwino, kuti tikwanise kuzolowera malo yanango na kudziwana na abale osiyanasiyana tichadekana kukhala na makhalidwe yanyowani.” Jean-Charles yemwe tamutomola pakuyamba ule adanena momwe iye na banja yake adaphindulira. Iye adanena kuti: “Mumpingo wathu unyowani, wana wathu adakula mwauzimu ndipo adakhala pa ushamwali wolimba na Yahova. Minyezi pang’ono mwana wathu wachikazi adayamba kukamba nkhani pa misonkhano ya pakati pa sondo ndipo mwana wathu mwamuna adakhala wofalisa wosabatizika.”

Peno imwepo munkufuna kuyenda komwe kunkufunika ofalisa azinji, koma mungakwaniselini ndawa ya momwe vinthu viliri pa moyo wanu, mungaphatise basa malangizo yomwe yali mu nkhani mweino mumpingo womwe muli manjeuno. Mwanjira mweyi imwepo mungadzibve ninge mwafuluka nkuyenda ku mpingo unango. Manje thembani Yahova ndipo khalani otangwanika na basa za mumpingo, pakuphata basa zosiyanasiyana na abale, kukhala na azishamwali anyowani na kulimbikisa azishamwali omwe munawo kale. Komasoti mungathandize mwakuthupi abale anyowani mumpingo na wale omwe ankudekana thandizo. Kuchita vimwevi kudzakuthandizeni kuti mukhale olimba mwauzimu ndawa yakuti chikondi ni khalidwe ya Akhrisitu chaiwo. (Yoh. 13:35) Ndipo tsimikizirani kuti ‘Yahova akhala wokondwa na mphaso zimwezi.’—Aheb. 13:16.

Olo kuti pali mabvuto yazinji, abale azinji akwanisa kuzolowera mpingo unyowani ndipo imwepombo mudzakwanisembo. Anne-Lise adanena kuti: “Kuchinja mpingo kudanithandiza kuti nikhale na azishamwali anyowani.” Kazumi manjeuno ni wokondwa “kuona momwe Yahova wamuthandizira munjira yomwe iye ambayiganiziralini.” Tingalewe chani va Jules? Iye adanena kuti: “Azishamwali omwe nakhala nawo anithandiza kudzibva kuti niri kumuyi. Manje nidzibva kuti niri mbali ya mpingo unyowani moyu ndipo vingakhale voshupa maninge kuchoka.”

a Onani nkhani yakuti: “Kulimbana ndi Malingaliro a Kulakalaka Kumudzi Kwanu mu Utumiki wa Mulungu,” mu Nsanja ya Olonda ya 15 Maio 1994.