Kukhala wokondwa na vomwe napfunzira pakutumikira Yahova

Azibereki wangu adachoka ku Estônia kuyenda ku Alemanha pa nkhondo yachiwiri yapadziko yose. Ndipo kumuku ndiko nidabadwira. Iwo adafuluka pomwe kuyenda ku Canadá. Nyumba yathu yoyambirira ku Ottawa, Canadá, pambandokhala zungo ndawa yakuti penze khola ya nkhuku. Tenze osauka maninge koma timbakwanisa kutenga mazayi nkumbamwa na thiyi.

Ntsiku inango wa Mboni za Yahova adabwera kumuyi kwathu ndipo adalewengera mayi wangu lemba ya Chivumbulutso 21:3, 4. Iwo adakhudziwa maninge ndipo adayamba kulira. Mbewu yachonadi idayamba kukula, ababa komasoti amayi wose adapita patsogolo mpaka kubatiziwa.

Azibereki wangu ambadziwalini bwinobwino chingelezi, koma chonadi ambachitengera siriyasi. Satade iliyose olo kuti aphate basa usiku basa yawo yosungunula vinthu ku Sudbury ku Ontário ababa wangu abatenga ine na mulongosi wangu ng’ono Sylvia, kuti tikaphate basa. Ndipo sondo iliyose timbapfunzira Ntsanja ya ulonda ninge banja. Ababa na amayi adakulisa chikondi changu kwa Mulungu. Vimwevi vidanichitisa kuti nipereke moyo wangu kwa Yahova mu 1956 nina magole 10. Chikondi chawo kwa Yahova chidanilimbikisa moyo wangu wose.

Pomwe nidamaliza shikola, nidasokonezeka pang’ono. Nimbakumbuka kuti nikakhala mpainiya nikwaniselini chakulinga changu chire chakuti nikhale nakobili zizinji zakuti zinithandize kuzungira pa dziko yose. Nidagumana basa pawairesi inango. Ndipo yenze basa yomwe nidaikonda maninge. Koma basa yangu mweyi nimbaiphata usiku. Mwevi vimbachitisa kuti nimbashote ku misonkhano komasoti nimbakhala na wanthu womwe ambakondalini Mulungu, koma pakumalizira chikumbuntima changu chopfunzisiwa na Baibolo chidayamba kuniuza kuti nichinje.

Nidafuluka nkuyenda ku Oshawa, Ontário. Muko nidadziwana na Ray Norman, na mulongosi wake Lesli, na apainiya anango. Ose mwawa ambanikonda. Kuona momwe wenzere wokondwa kudanichitisa kuti nikonze pomwe vinthu pamoyo wangu. Iwo adanilimbikisa kuti nikhale mpainiya ndipo ni vimweviretu vomwe nidachita mu Setembro 1966. Inepano nenze wokondwa ndipo moyo ambawoneka kuti niwabwino. Koma penze vinthu vinango vomwe vidanichitikira vomwe nimbavidikhiralini.

YAHOVA AKAKUKUMBIRA KUTI UCHITE CHINTHU CHINANGO YESERA KUCHICHITA

Navose vimwevi nidasaina fomu ya ku Beteli ku Toronto, Canadá, patsogolo pake pomwe nenze mpainiya nidachemerewa kuti nikatumikire ku Beteli kwamagole yanayi. Koma inepano nimbamukonda maninge Lesli, ndipo nimbabva mantha kuti nikandobvuma kuyenda ku Beteli nidzamuwonelini pomwe. Nidayipempherera maninge nkhani mweyi, ndipo patsogolo pake nidabvuma kuyenda ku Beteli. Pamwapo nidayenda kamulawira Lesli nili okwinyilira maninge.

Ningaphata basa yowatcha vovala ku Beteli patsogolo pake ninge mulembi. Panthawe mweyi Lesli, adakhala mpainiya wapadera ku Gatineau, Quebec. Nthawe zizinji nimbadzibvunza vomwe iye ambachita ndipo nimbakayikira peno inepano nenze nidasalula bwino. Padadzabwera chinthu chodabwisa maninge chomwe inepano nimbachidikhiralini pa moyo wangu. Ray,mulongosi wake wa Lesli adachemerewa kubwera pa Beteli. Iye adakhala munzangu wakuchipinda! Vimwevi vidachitisa kuti ushamwali wangu na Lesli ubwelere pomwe. Tidalowolana pa ntsiku yomwe nidamaliza utumikiwangu kwa magole 4—pa 27 Fevereiro mu 1971.

Lesli na inepano adatitumiza kuti tikatumikire ku mpingu munango wa Québec wa chiyakhulo cha chi Francês. Magole pang’ono nidadabwa maninge pomwe adanichemera kuti nikatumikire ninge onyang’anira dera ni na magole 28. Inepano nimbadzibva kuti ndine mwana ndine wosayenerera, koma mawu ya pa Yeremiya 1:7, 8 yadanilimbikisa. Koma Lesli wenze adachita ngozi na caro ndipo ambabonera kuti agone bwinobwino. Manje tidakakwanisa tani kuphata basa mweyi ya onyang’anira dera? Koma iye adati peno “Yahova watichemera kuti tichite chinthu chinango, tingaleke kuyesa?” Tidabvuma utumiki wa wonyang’anira dera ndipo tidakondwa naye kwa magole 17.

Basa ya onyang’anira dera imbanichitisa kuti nimbakhale wopanikizika maninge ndipo nthawe zinango nenze nilibe nthawe yocheza na Lesli. Pamwapo nimbafuna kuti nipfunzirepo chinthu chinango. Ntsiku inango pa chiposi machibesebese bero idalira. Pomwe nidayenda nilibe kuona chilichose koma nidaona cesto ya vinthu va kuphwando, lenda ya pa meza, vipaso, queijo na botolo ya vinyu, na kapepa kanangombo konemba kuti “tenga nkazi wako uyende naye ku phwando.” Enze ntsiku yabwino ndawa yakuti kwenze dzuwa. M’malo mwake nidamuuza Lesli kuti niyendelini ndawa yakuti ninankhani yakuti nikonzekere. Iye adabvesa koma adakwinyilirako. Pomwe nidakhazikika pa mpando. Chikumbuntima changu chidayamba kunigunda pamwapo nidayamba kuganizira lemba ya Aefeso 5:25, 28. Mawu yali pamwapa ya Yahova yadanilimbikisa kuganizira vinthu vomwe nivofunika kwa nkazi wangu. Pomwe nidapemphera nidamuuza Lesli kuti “nabo” iye adakomedzewa maninge, tidayenda kumalo yanango yabwino mphepete mwa madzi. Tidayanza lenda yathu ya pa meza ndipo ntsiku yokomedza idatipitira pa mwapo. Koma nimbakonzekera basi nkhani yangu.

Madera yathu yomwe timbafambira yenze yokomedza maninge, kwenze ku Colômbia Britânica mpakana Terra Nova. Cholinga changu chire chakuzunga pamwapa chimbakwanilisika. Nenze nidaganizilako kale va Shikola ya Giliadi koma nimbafunalini kuti nikhale Mishonale kuyenda ku dziko inango. Ndawa amishonale wenze wapadera maninge ndipo inepano nimbadziona kuti ndinelini oyenerera. Komasoti, nimbachita mantha kuti anganitumize ku dziko ya ku África komwe kwenze matenda yazinji komasoti nkhondo ndipo nimbaona kuti nilikale bwino kwenenze.

KUCHEMEREWA KUCHOKA KU ESTÔNIA KUYENDA KU BÁLTICO

Mu 1992 pomwe basa zimbayamba mumadziko ya União Soviética, adatibvunza peno tingakwanise kuti tifuluke kuyenda ku Estônia kukatumikira ninge Amishonale. Tidayipempherera maninge nkhani mweyi, pamwapo tidakumbuka pomwe kuti ‘peno Yahova watikumbira kuti tichite chinthu nabo tiyese’. Tidabvuma ndipo nidati basi tinkuyendalini ku África.’

Nidayambiratu kupfunzira chiyankhulo cha ku Estônia. Minyezi pang’ono nidayamba kutumikira ninge onyang’anira dera. Nimbafunika kuzungira mipingu yokwana 46 kuphatanidzapo magulu ya madziko yatatu ya Báltico Kaliningrano na Rússia. Vimwevi vimbatanthauza kuti timbafunika kupfunzirako pang’ono Chilentao, Chilutuano na Chirusso. Yenzelini nkhani yamasenzeka koma azishamwali wathu adaona khama yomwe tenze nayo ndipo adayesesa kutithandiza. Mu 1999, pomwe ofesi ya nthambi indafunguliriwa ku Estônia nidayikhiwa kuti nikatumikire mu komiti ya nthambi pabodzi na Toomas Edur, Lembit Reile, na Tommi Kauko.

Tidadziwa Mboni za Yahova zizinji zomwe zenze zidayendesewa ku Sibéria. Podiya kuti ambachitiwa vinthu vizinji maninge, iwo enze kutali maninge na mabanja yawo ndipo alibe kukhala wanthu oipa koma adapitiliza kukhala okondwa komasoti wakhama polalikira. Vimwevi vidatithandiza kudziwa kuti tingakwanise kupirira tili okondwa olo panthawe yoshupa.

Magole patsogolo pake, pakuti Lesli ambapumulalini maninge adayamba kukhala woneta maninge. Timbadziwalini kuti kuneta kumoku kwenze kuyamba kwa matenda yanango yochemerewa fibromialgia. Tidayamba vokumbuka kuti tibwerere ku Canadá. Pomwe tidachemerewa kuti tiyende ku shikola ku Patterson, Nova York, U.S.A., Nimbakaikila peno tidakayenda. Pomwe nidayipempherera maninge, nidabvuma Yahova adadalisa chosalula chimwechi. Penze pa nthawe ya shikola mweyi pomwe Lesli adagumana chithandizo ku shipitali chomwe angadekana. Patsogolo pake tidakwanisa kubwerera kukaphata basa bwinobwino.

VINTHU VINANGO VOSADIKHIRIKA KUYENDA KU DZIKO INANGO

Ntsiku inango tili ku Estônia ku maulo mu 2008, tidatambira foni yochokera ku likulu yapadziko yose akutibvunza peno tingabvume kukatumikira ku Congo. Nidadabwa maninge ndawa nimbafunika kuti niwadawire mwangwana yake. Pakuyamba nilibe kumuuza Lesli ndawa nimbadziwa kuti nikandomuuza agonelini usiku moule. M’malo mwake inepano ndine nilibe kugona ndawa nimbapemphera momwe vinthu vikakhalire ku África.

Mangwana yake pomwe nidauza Lesli, tidayamba kukumbuka kuti: “Yahova ankutichemera kuti tiyende ku África. Ko tinkudziwa tani kuti tingakwaniselini pomwe tikanati tayesako?” Pamwapo, pomwe tidamala magole 16 tili ku Estônia, tidayenda ulendo wapa ndeke kuyenda ku Congo Kinshasa. Ku ofesi ya nthambi kwenze ku malo yazii na yokhuza. Chinthu chibodzi chomwe Lesli adayikha mu chipinda chathu ni kakhadi komwe wenze adakasunga pakuchoka ku Canadá. Komwe kenze na mawu yakuti: “Chosa maluwa pomwe ulibzaliwe.” Pomwe tidawadziwa abale na kuchitisa mapfunziro ya Baibolo, tidabva kukhala okondwa kutumikira ninge amishonale ndipo tidayamba kukhala wachimwemwe. Kuyenda kwa nthawe tidakhala pomwe na mwayi wokazugira ma ofesi ya nthambi yokwana 13 ku África. Vimwevi vidachitisa kuti tione wanthu osiyanasiyana komasoti okhuza. Mantha yathu yomwe tenze nayo yadachoka ndipo tidatembeja Yahova ndawa yakutitumiza ku África.

Ku Congo, adatipasa vakudya vomwe vimbaoneka ninge tulombo, ndipo nimbaona kuti ningavidyelini vimwevi. Koma pomwe timbaona abale wathu ankuvidya tidayeserera ndipo tidakondwa navo maninge.

Nimbayenda kukapereka chakudya cha uzimu na kupereka thandizo kwa abale na alongo wathu, komwe kumbachitika vinthu voipa ku malo yanango ya dziko ya Congo komwe kwenze vigananga vomwe vimbapweteka akazi na wana. Azinji mwa abale wathu wenze osauka mwa kuthupi. Podiya kuti venze teno chidikhiro chawo cha kumukisiwa, chenze cholimba. Chikondi chawo kwa Yahova kukhulupirika kwawo mu gulu yake vidatikhudza ntima. Vimwevi vidachitisa kuti tiganizire bwinobwino komasoti kuti tichinje maganizo yathu. Abale anango adadzogerewa manyumba komasoti maminda. Vimwevi vidanikumbusa momwe chuma cha kuthupi chingamalile mwakankulumize komasoti kuganizira va chuma cha uzimu. Podiya kuti ambagumana na mabvuto yoshupa maninge abale ambadandaulalini. Momwe iwo ambachitira vinthu vidatilimbikisa kuti tikhale olimba pa mabvuto yathu komasoti mabvuto ya kuduwala.

KUKOMA KWAKU ÁSIA

Kudabwera chinthu chinango pomwe chodabwisa. Adatikumbira kuti tiyende ku ofesi ya nthambi ya ku Hong Kong. Tikanati taganizirako vokakhala ku Orientar! Ndawa yakuti tidaona momwe Yahova angatithandizira mwachikondi pa ma utumiki yathu yose tidabvuma pomwe padatiuza. Koma mu 2013, tinkulira tidasiya abale wathu na azishamwali wathu ku África ndipo timbadziwalini vomwe vimbabwera ku tsogolo.

Kukhala mu thaundi ya Hong Kong, komwe kuna wanthu azinji kwenze kuchinja kukulu. Kupfunzira chiseweredwe cha cantonês enzelini nkhani yamasenzeka. Abale adatitambira bwino maninge ndipo tidakomedzewa maninge na chakudya cha kunkule. Basa yathu imbakula mwakankulumize koma vinthu venze vodula. Ndawa ya vimwevi Bungwe Yotonga idasalula kuti igulise malo yazinji ya ofesi ya nthambi. Kanthawe pang’ono patsogolo pake mu 2015, tidachinjiwa kuyenda ku Coreia do Sul komwe tikupitiriza kutumikira. Kuno tidagumana na bvuto inango ya chiseweredwe koma ndise okondwa kuti podiya tinavizinji vakuti tivichite azishamwali wathu awona kuti tinkupita patsogolo ndipo tikwanisa kuyankhulako chikoreano.

VOMWE TAPFUNZIRA

Kukhala na azishamwali anyowani ni nkhanilini yamasenzeka, koma nidazindikira kuti ukambayesesa kukhala wopasa na kutambira alendo ungakwanise kukhala na azishamwali mwakankulumize. Tidaona kuti abale wathu m’malo mwakuti akhale osiyana ni wolingana, ndawa yakuti Yahova adatisika tose mu njira yakuti timbakhudziwe mu ntima komasoti kumbakonda azishamwali wathu.—2 Ako. 6:11.

Tidaona ubwino wombaona wanthu ninge momwe Yahova achawaonera. Ndawa iye adawabvuma ndipo adawaonesa chikondi ndawa yotewedza malagizo yake pa moyo wawo. Nthawe zose pomwe timbadzibva kuti ndise ofoka tingadzibvunza kuti peno ndise ofunika kwa anango, timbalewenga makalata panango tumakhadi tolimbikisa tochokera kwa azishamwali. Kunena shuwa tidaona momwe Yahova adadawirira mapemphero yathu pa kutipasa chitetezo komasoti mphanvu.

Pa magole yose mwaya Lesli na ine tidapfunzira ubwino wokhala na nthawe yocheza na munango podiya kuti tiripanikiziwe. Tidapfunzira ubwino wakumbadziseka tekha makamaka tikakhala kuti tinkupfunzira chiseweredwe chinyowani. Usiku uliose timbafagafaga chinthu chomwe tingatembeje nacho Yahova.

Kunena shuwa ine nimbaona kuti ningakwaniselini kukhala mishonale kuyenda kukatumikira ku madziko yanango. Koma olo venze teno nidakhala na chimwemwe ndawa ya kupfunzira kuti vose nivokwanisika na thandizo ya Yahova. Mawu ya m’neneri Yeremiya yabwera mu msolo, pomwe pachati: ‘Mwanidabwisa imwepo Yahova ndipo nadabwa.’ (Yer. 20:7) Kunena shuwa iye adatipasa vinthu vizinji vomwe ni vodabwisa madaliso yazinji na yosalinganizika. Ndipo nidakwanirisa cholinga changu chile chombazunga na ndeke. Nidayenda kuzinji maninge na ndeke ku madera yakuti olo pomwe nenze mulumbwana nimbalinganizalini kuti ningakafikeko. Tidazungira Maofesi ya Nthambi mu ma kontinente yokwana 5. Pa ma utumiki yathu yose nimbatembeja maninge na mzimu womwe Lesli ambauwonese kuti tikwanise utumiki moyu.

Isepano timbapitirize kukumbukira kuti, ko basa mweyi tinkuphatira mbani ndipo ndawa ya chani. Madaliso yomwe tinkukondwa nayo ntsiku zino tinkulawiratu va momwe moyo wosapera udzakhalire pomwe Yahova ‘adzathamule djanja yake na kukhutilisa chokhumba cha chamoyo chilichose pa dziko yapasi.’—Sal. 145:16.