Vomwe Yohani adaona m’masomphenya

Pomwe ntumi Yohani wenze mu djeri pa ntsuwa ya Patimo, Yesu adamuonesa masomphenya yokwana 16. Masomphenya mwayo yambawonesa vomwe vidzachitike kuti dzina ya Mulungu ichenesewe, Ufumu wake ubwere komasoti kuti chifuniro chake chichitike pa dziko yapasi ninge momwe viriri kudzulu.

M’masomphenya yanango, Yohani adaona Yahova ali kudzulu pa mpando wa ulemerero. Alizunguiriwe na akulu 24 ovala vovala vichena komasoti visoti va golide. Yohani adabva kugunda kwa dedza komasoti kugaka kwa kaphaliwali. Akulu 24 wale adagwada nkumbatumikira Yahova. M’masomphenya yanango Yohani adawona pomwe wanthu azinji wochokera m’makhaindi osiyasiyana komasoti viyankhulo vosiyanasiyana ankutumikira Yahova. Mwana wa nkhosa, yemwe ni Yesu, ankuwatsogolera ku madzi ya moyo. Patsogolo pake adaona masomphenya yanango. Adaona Yesu wayamba kutonga ninge Mpfumu ya kudzulu na akulu 24 wale. M’masomphenya yanango Yohani adaona Yesu ankumenyana na chinyoka, chomwe ni Satana ndipo chinyoka mwicho chenze pabodzi na viwanda vake. Satana na viwanda vimwivo adathamingisiwa kudzulu nkuthusiwa pa dziko yapasi.

Patsogolo pake Yohani adaona masomphenya ya Mwana wa nkhosa pabodzi na wanthu wokwana 144,000 ali imirire pa phiri ya Ziyoni. Adaona pomwe mngelo akumbululuka m’dzulu nkumbauza wanthu kuti ambagope Mulungu komasoti ambamupase ulemerero.

Yohani adaona pomwe masomphenya yanango yowonesa nkhondo ya Arumagedo. Pa nkhondo mwiyo, Yesu na gulu yake adawina Satana na dziko yoipa. Patsogolo pake Yohani adaona masomphenya yomalizira yowonesa wanthu wose wa kudzulu komasoti wa pa dziko yapasi ankukhala mobverana. Adaona pomwe kuti Yahova wadzonga Satana na wose omutewera ndipo aliyese kudzulu na pa dziko yapasi ambatumikira Mulungu komasoti kulemekeza dzina yake.