“Ufumu wanu ubwere”

Yahova adapolomisa kuti: ‘Nidzapukuse misozi yose m’maso mwa wanthu ndipo impfa idzakhalekolini pomwe. Kudzakhalelini pomwe kulira, kubuula panango kuwawiwa, vinthu vakalekale vapita.’

Yahova adaikha Adamu na Hava m’munda wa Edeni kuti ambakhale mobverana komasoti mokondwa. Iwo ambafunika kutumikira Ababa wawo wa kudzulu komasoti kubereka wana mpakana wanthu kudzadza dziko yose yapasi. Adamu na Hava alibe kubvera. Koma cholinga cha Yahova chiribe kuchinja. Pale Baibolo inena kuti Mulungu akapolomisa chinthu chikangalini. Yahova adapolomisa Abulahamu kuti adzabwerese madaliso yazinji pa dziko yapasi ndipo Ufumu wa Mulungu ndiwo wati udzabwerese madaliso mwaya.

Manjemanje apa, Satana na viwanda vake komasoti wanthu wose woipa adzadzongewe. Wanthu omwe adzapulumuke ambadzatumikire Yahova. Padzakhalelini pomwe kudwala panango kufa, ntsiku iriyose timbadzamuke na mphanvu komasoti okondwa. Dziko yose idzakhale paradaiso. Aliyese adzakhale na chakudya chizinji komasoti nyumba yabwino. Aliyese adzakhale wobvera ntsisi munango, wosati wankhanza panango wandewo. Wanthu ambadzakhale bwinobwino na vinyama ndipo ambadzachitelini mantha.

Tidzakhale wokondwa maninge kuwona Mulungu ankumukisa omwe adamwalira.Tidzagumane na wanthu ninge Abele, Nowa, Sara, Mose, Rute, Esitere, komasoti Davide. Tidzathandizane nawo kuchinja dziko kuti ikhale yokhuza maninge. Tidzaphate basa zizinji zokodweresa.

Yahova ankufuna kuti imwepo mudzakhale mparadaiso. Ndipo tidzadziwe vizinji va Yahova kuposha vomwe tinkudziwa manjeuno. Ndipomwapa naboni tilimbise ushamwali wanthu na Yahova ntsiku iriyose mpakana kalekale!