Paulo adatumiziwa ku Roma

Ulendo wachitatu wa Paulo udakamalira ku Yerusalemu. Padafika kumuko, adamangiwa. Manje usiku adawona masomphenya, Yesu padamuuza kuti: ‘Udzayende ku Roma ndipo udzalalikire kumuko.’ Paulo adatengewa ku Yerusalemu, nkuyenda ku Kaisareya komwe adakhala mu djeri magole yawiri. Pa nthawe yomwe mulandu wake umbatongewa na governadori munango dzina yake Fesito, Paulo adanena kuti: ‘Ninkukumbira kuti mulandu wangu uyu ukatongerewe kwa Kaisara.’ Manje Fesito adati: “Pakuti wakumbira kuyenda kwa Kaisara, uyende.” Poyenda ku Roma muko, Paulo atengewa pa barko ndipo abale awiri Luka na Arisitako adayenda nawo.

Ali panyanja, kudachitika chimphepo champhanvu kwa ntsiku zizinji. Aliyese ambaganiza kuti apulumukelini. Koma Paulo adati: ‘Wanthu imwe mngelo waniuza m’maloto kuti: “Ayi kugopa Paulo, tikafike ku Roma ndipo aliyese mu barko mweyi afelini.” Ndipomwapa ayi kuchita mantha! Palibe wati afe.’

Chimphepo mwicho chidapitiriza kwa ntsiku 14, pamwapo adayamba kuwona ntsuwa ya Melita. Koma barko mwiyo idayamba kutcherera mu nchenga ndipo idayamba kuphwasuka ndawa ya mabimbi. Olo kuti venze teno, wanthu wose okwana 276 omwe enze mumo adakafika kuntunthu. Anango adanyaya, pomwe anango adaphatisira basa tuvipitsi twa barko mwiyo tomwe tumbayangalala. Pomwe adafika, wanthu wa pa ntsuwa mwapo adawatambira bwino ndipo adawagasira moto kuti awothe.

Payadapita minyezi yatatu, masocha yadatenga Paulo pa barko inango nkuyenda naye ku Roma. Pomwe adafika, abale adabwera kudzamuwona. Paulo padawawona adatembeja Yahova ndipo adalimba ntima. Podiya kuti wenze womangiwa, ambabvumiziwa kukhala mu nyumba inango ya lendi ndipo ambanyang’aniriwa na nsocha. Iye adakhala kumoku magole yawiri. Wanthu akabwera kudzamuwona, ambawalalikira va Ufumu wa Mulungu komasoti va Yesu. Iye adanemba pomwe makalata yoyenda kumipingo ya ku Ásia Minor na ku Yudeya. Pamwapa Yahova adaphatisira basa Paulo kuti ntontholo wabwino ufike kwa wanthu wamakhaindi yanango.