Mpfumu yoyamba ya Aizirayeli

Yahova adawapasa Oweruza kuti ambawatsogolere, koma iwo ambafuna kukhala na mpfumu. Manje adauza Samueli kuti: ‘Wanthu wamakhaindi yose anayo mafumu, isembo tinkufuna tikhalembo na mpfumu.’ Vimwevi viribe kumukodweresa Samueli pamwapo adapemphera kwa Yahova va nkhani mweyi. Koma Yahova adamuuza kuti: ‘Wanthu mwawa ankulambalini iwepo koma ankulamba inepano, uwauze kuti nivokwanisika kuti akhale nayo mpfumu. Koma adziwe kuti mpfumu mwiyo idzafune vizinji kuchokera kwa iwo.’ Koma wanthu mwawo adadawira kuti: ‘Viribe basa isepano tinkufuna mpfumu basi.’

Yahova adamuuza Samueli kuti Sauli ni yemwe akhale mpfumu yoyamba. Manje Sauli padayenda ku Rama kukaona Samueli iye adadzodza Sauli pakumuthira mafuta mu msolo mwake.

Patsogolo pake Samueli adachemera Aizirayeli wose kuti awawonese mpfumu yawo. Koma Sauli ambagumanikalini. Ko unkudziwa komwe wenze? Iye wenze adabishala pakati pa katundu. Manje padamugumana adamuimirisa pakati pa wanthu. Sauli wenze wokhuza maninge komasoti wenze ntali kuposha aliyese. Samueli adalewa kuti: ‘Yahova wasankhula moyu.’ Ndipo wanthu mwawo adakuwa kuti: ‘Mpfumu ikhale na moyo utali!’

Pakuyamba Sauli ambabvera Samueli komasoti Yahova koma patsogolo pake adaleka. Mwakulinganiza, mpfumu imbafunikalini kupereka ntsembe, koma nthawe inango podiya kuti Samueli wenze adauza mpfumu Sauli kuti amudikhire, iye adaona kuti ankuchebwa. Pamwapo adapereka ntsembe. Manje ko Samueli adachita tani? Iye adamuuza kuti: ‘Mulibe kuchita bwino, pamwapa munkubveralini Yahova.’ Koma Sauli alibe kupfunzirapo kanthu.

Nthawe inango Sauli adayenda kukamenyana na Aamaleki. Samueli adamuuza kuti ukadzonge chirichose cha mu dziko mwiyo, koma iye adasiya mpfumu ya kumuko dzina yake Agagi ndipo alibe kuipha. Yahova adauza Samueli kuti: ‘Sauli wasiya kunitewedza ndipo ankunibveralini.’ Samueli padabva vimwevi adakhumudwa maninge ndipo adayenda kukauza Sauli kuti: ‘Ndawa unkubveralini Yahova iye asankhule mpfumu inango.’ Pamwapo Samueli padachungunuka kuti ambayende, Sauli adaphata Malaya yake yakunja ndipo yadang’ambika. Patsogolo pake Samueli adamuuza kuti: ‘Yahova wang’amba ufumu na kuuchosa kwa imwepo.’ Mwevi vinkutanthauza kuti Yahova adzapereke ufumu muyo kwa munthu yemwe amukonda komasoti amubvera.