Alibe kusiya kulalikira

Munthu munango yemwe ambafambalini ambakhala pa nsuwo wa kachisi nkumbakumbirakumbira. Ntsiku inango m’maulo, adaona Petulo na Yohani ankungena mu kachisi mumo. Iye adanena kuti: ‘Pulizi nithandizeni.’ Petulo adamudawira kuti: ‘Nikupase chinthu chabwino maninge kuposha kobiri. Mu dzina ya Yesu, imirira uyambe kufamba!’ Patsogolo pake Petulo adamuphata nkumuimiririsa ndipo adayambiratu kufamba! Wanthu adakondwa maninge mwakuti azinji adakhala opfunzira.

Koma antsembe na Asaduki adakalipa maninge. Iwo adaphata atumi mwawo nkuyenda nawo ku tiribunali, ndipo adawabvunza kuti: ‘Mphanvu yopolesera munthu moyu mwaitenga kuponi?’ Petulo adanena kuti: ‘Yesu yemwe mudamupha ule, ni yemwe watipasa.’ Manje atsogoleri wa chipembedzo adanena mokalipa kuti: ‘Mulekeretu kunena va Yesu!’ Koma atumi mwawo adadawira kuti: ‘Isepano tingasiyelini ndipo tipitirize kunena.’

Petulo na Yohani padandomasuliwa, adayenda kwa opfunzira anango kukawauza vomwe vidachitika. Iwo adapemphera pabodzi kuti: ‘Pulizi Yahova, tithandizeni kuti tikhale olimba ntima kuti tipitirize kulalikira.’ Yahova adawapasa mzimu uchena ndipo ambapitiriza kulalikira na kupolesa wanthu. Wanthu azinji adakhala opfunzira. Koma Asaduki vidawawawa maninge mwakuti adamanga atumi mwawo nkuwafungira mudjeri. Manje Yahova adatumiza mngelo usiku kuti akafungule misuwo ya djeri mwiyo nkuwauza atumi mwawo kuti: ‘Bwererani mukachisi, mumbakapfunzise wanthu.’

Mangwana yake, Tiribunali Ikulu ya Ayuda idauziwa kuti: ‘Misuwo ya djeri ni yofunga, koma wanthu wale ayenda! Pano manje ali mukachisi ndipo akupfunzisa wanthu!’ Wanthu adayenda kukawamanga pomwe, nkuyenda nawo ku Tiribunali Ikulu ya Ayuda. Padafika, nkulu wa antsembe adanena kuti: ‘Ko tiribe kukuuzani kuti muleke kunena va Yesu?’ Koma Petulo adadawira kuti: “Ise tifunika kubvera Mulungu ninge wolamulira, osati wanthu.”

Atsogoleri wachipembedzo adakalipa maninge mwakuti ambafuna kupha atumi mwawo. Koma Mfalisi munango dzina yake Gamaliyeli adaimirira nkunena kuti: ‘Wanthu imwe samalani! Panango akuthandiziwa na Mulungu. Ko mukufuna kulimbana na Mulungu?’ Wanthu mwawo adabvera mawu yake, mwakuti adandowakwapula nkuwauza kuti ambayende koma ayi kuti adzalalikire pomwe. Koma atumi mwawo alibe kusiya kulalikira. Iwo ambalalikira mwakhama ntontholo wabwino, mukachisi komasoti muyi na muyi.