Opfunzira wa Yesu adatambira mzimu uchena

Pazidapita ntsiku 10 kuchokera pomwe Yesu adayenda kudzulu, opfunzira wake adatambira mzimu uchena. Yenze ntsiku ya mwambo wa Pentekosite mu gole ya 33 Yesu wayenda kale kudzulu, ndipo mu Yerusalemu mwenze wanthu azinji wosiyanasiyana omwe adabwera ku mwambo moyu. Opfunzira wa Yesu okwana 120, adasonkhana mu chipinda chinango cha m’dzulu. Mwadzidzidzi padachitika vinthu vodabwisa. Patsogolo pake, adawona malilimi yowoneka ninge moto ndipo yadawoneka pa msolo pa aliyese ndipo ose mwawo adayamba kuyankhula viyankhulo vosiyanasiyana. Patsogolo pake, padabveka kuunga ninge mphepo yamphanvu mwakuti idabveka m’nyumba yose mwiyo.

Wanthu omwe adabwera ku Yerusalemu wale, adabva kuunga moku ndipo adathamangira kunyumba yomwe kwenze opfunzira mwawo kuti akawone chomwe chikuchitika. Adadabwa maninge padabva kuti opfunzira mwawo ankuyankhula viyankhulo vosiyanasiyana. Wanthu mwawo adanena kuti: ‘Koma wanthu mwawa ni wa ku Galileya, manje vinkukwanisika tani kuti ambayankhule viyankhulo vathu?’

Patsogolo pake Petulo na atumi anango adaimirira, nkuyamba kuyankhula na wanthu mwawo. Petulo adawafotokozera kuti Yesu adaphewa ndipo Yahova adamumukisa. Ndipo Petulo adanena kuti: ‘Manje Yesu ali kudzulu ku djanja ya makulu ya Mulungu ndipo watipasa mzimu uchena moyu womwe adatipolomisa, ndawa yake mukuwona vodabwisa vimwevi.’

Vomwe Petulo adayankhula vidawafika pamoyo maninge ndipo adabvunza kuti: “Manje tichite chani pamwapa?” Iye adawauza kuti: ‘Lapani machimo yanu ndipo mubatiziwe mu dzina ya Yesu. Mukachita teno imwembo mutambire mzimu uchena.’ Pantsiku mweyi wanthu pafupifupi 3000 adabatiziwa. Patsogolo pake, opfunzira adayamba kuingizirika maninge mu Yerusalemu. Mzimu uchena umbathandiza maninge atumi ndipo adakhazikisa mipingo kuti ambapfunzise wanthu vose vomwe Yesu adawalamula.