Yesu adapolesa munthu pa ntsiku ya satade

Afalisi ambazonda Yesu ndipo ambafuna kuti amugumanire chifukwa na cholinga chakuti amumange. Iwo ambanena kuti Yesu ambafunikalini kupolesa wanthu pa satade. Pantsiku ya satade, Yesu adagumana na munthu yemwe ambandokhalira kukumbira wanthu vinthu. Iye adauza wopfunzira wake kuti: ‘Dikhirani muone momwe mphamvu za Mulungu zingamuthandizire munthu moyu.’ Pamwapo Yesu adalavulira mata yake pasi nkuyakanyakanya, patsogolo pake adapakasila matope mwayo m’maso mwa munthu muyo nkumuuza kuti: “Yenda ukasambe mu dziwe ya Siloamu.” Munthu muyo adayendadi ndipo adayamba kuona.

Wanthu adadabwa maninge na vimwevi ndipo adati: ‘Ko munthu muyu ni ulelini yemwe ambakumbirakumbira panango wandolingana naye?’ Munthu muyo adati: ‘Ndinepano ndipo nidabadwa wosawona.’ Wanthu mwawo adamubvunza kuti: ‘Ko manje vakhala tani kuti uyambe kuona?’ Padawafotokozera vomwe vidachitika, wanthu mwawo adamutenga nkuyenda naye kwa Afarisi.

Munthu muyo adauza Afalisi mwawo kuti: ‘Yesu adakanyakanya matope nkunipakasira m’maso mwangu ndipo adaniuza kuti nikasambe. Nidayendadi ndipo panidasamba nidayamba kuwona.’ Koma Afalisi mwawo adati: ‘Peno Yesu ankupolesa wanthu pa satade ndiye kuti mphamvu zake zinkuchokeralini kwa Mulungu.’ Koma anango adati: ‘Sembe mphamvu zake zikuchokeralalini kwa Mulungu adakakwanisalini kupolesa wanthu.’

Afalisi adachemera azibereki wa munthu moule nkuwabvunza kuti: ‘Vakwanisika tani kuti mwana wanu ayambe kuwona?’ Koma azibereki mwawo adagopa ndawa Afalisi ambachosa mu sunagoge munthu aliyese wokhulupirira Yesu. Ndipomwapa adandodawira kuti: ‘Tinkudziwalini mubvunzeni munikachiro.’ Afalisi mwawo adabvunza munthu ule mibvunzo yazinji mpakana iye adawadawira kuti: ‘Nakuuzani kale vose manje ndawa chani mukundonibvunza?’ Afalisi mwawo adakalipa na vimwevi ndipo adamugwinyira kunja.

Yesu adayenda komwe kwenze munthu muule ndipo adamubvunza kuti: ‘Ko uchamukhulipirira Mesiya?’ Munthu muyo adadawira kuti: ‘Inde ningamukhulupirire nichikhala kuti nikumudziwa.’ Yesu adamuuza kuti: ‘Inepano ndine Mesiya.’ Pamwapa Yesu adawonesa kuti wenze wokoma ntima. Tinkunena tene ndawa adapolesa munthu muyo komasoti adamuthandiza kuti akhale na chikhulupiriro.