Ulaliki wa paphiri

Yesu padasankhula Atumwi 12, adabuluka m’phiri nkuyenda pa malo pomwe penze padasonkhana wanthu azinji. Wanthu mwawo enze adachokera ku Galileya, Yudeya, Turo, Sidoni, Siria komasoti ku tsidya kwa kamadzi ka Yorodano. Adamubweresera wanthu omwe ambadwala matenda yosiyanasiyana komasoti omwe ambashupisiwa na viwanda. Wanthu wose mwawo Yesu adawapolesa. Patsogolo pake, adakhazikika nkuyamba kuyankhula. Adafotokoza vomwe munthu angachite peno ankufuna kuti Mulungu akhale shamwali wake. Yesu adafotokoza kuti tifunika kudziwa kuti tifunika kutsogolerewa na Yahova komasoti kupfunzira va iye kuti timbamukonde. Koma adanena pomwe kuti tingakondelini Mulungu peno tikondalini anzathu. Koma tifunika kuchitira vabwino anzathu podiya azondi wathu.

Yesu adati: ‘Kundokonda azinzanu nkokwaniralini. Mufunika kumbakonda pomwe wanthu omwe akuzondani komasoti mumbawakhululukire kuchokera pasi pa moyo. Peno munzanu wakuphonyerani, mumbayende kukakambirana naye na kumupepesa. Mumbachitire wanthu vomwe imwepombo munkufuna kuti iwo akuchitireni.’

Yesu adaperekapomwe malangizo yanango yabwino yonena va chuma. Iye adati: ‘Kukhala pa ushamwali na Mulungu ni vofunika maninge kuposha kukhala na kobiri zizinji. Munthu angakubereni kobiri, koma angakuberenilini ushamwali wanu na Yahova. Lekani kudandaula kuti tidzadye chani, tidzamwe chani, panango tidzavale chani. Ganizirani va mbalani, Mulungu awonesesa kuti mbalani nthawe zose zina vakudya. Kudandaula kungachitiselini kuti tikhale na moyo utali. Ayi kuyebwa kuti Yahova adziwa vomwe tikufuna.’

Wanthu mwawo enze akanati wabvako munthu ankuyankhula ninge momwe Yesu ambayakhulira. Atsogoleri wachipembedzo enze akanati awapfunzisako vimwevi. Ndawa chani Yesu ambakwanisa kupfunzisa bwino maninge? Ndawa yakuti vose vomwe ambapfunzisa, vimbachokera kwa Yahova.