Yesu adasankhula atumi 12

Yesu padalalikira pafupifupi gole na hafu, ambafunika kuchita vinthu vinango vofunika maninge. Ambafunika kusankhula wanthu anango wapadera kuti ambaphate basa yolalikira mweyi. Wanthu mwawa ambafunika kuwapfunzisa kuti akwanise kutsogolera mpingo wa Chikhrisitu iye akadzayenda kudzulu. Yesu adaona kuti pakufunika Yahova amutsogolere pakusankhula wanthu mwawo. Patsogolo pake adayenda kuphiri kwayekhayekha ndipo adapemphera usiku wose. Pakudachena, Yesu adachemera opfunzira wake ndipo adasankhulapo opfunzira 12 kuti akhale atumi. Ko unkukumbukira madzina yawo? Enze, Andereya, Yakobo, Yohani, Filipo, Batolomeyo, Thomasi, Mateyu, Yakobo mwana wa Alifeyo, Tadeyu, Simoni na Yudasi Sikariyoti.

Atumi 12 mwawa ambafamba na Yesu. Patsogolo pakuti wawapfunzisa adayamba kumbayenda wokha kukalalikira. Yahova adawapasa mphanvu ndipo ambakwanisa kubulisa viwanda komasoti kupolesa odwala.

Yesu ambawona kuti atumi 12 mwawa ni azishamwali wake ndipo ambawakhulupirira. Koma Afalisi ambaganiza kuti wanthu mwawo enze wosapfunza komasoti wanthumbo basi. Koma Yesu adawapfunzisa kuti ambaphate bwino basa yawo mweyi. Atumi mwawo adapitiriza kukhala na Yesu panthawe yoshupa. Mwakulinganiza, enzepo pomwe Yesu wenze adasala pang’ono kuphewa komasoti padamukisiwa. Molingana na Yesu, azinji mwa atumi mwawa enze wochokera ku Galileya. Ndipo anango enze wolowola.

Atumi mwawa enze ochimwa ninge isepano ndipo ambaphonyesa vinthu vinango. Nthawe zinango ambayankhulalini vinthu vabwino ndipo nthawe zinango ambasankhulalini bwino vochita. Nthawe zinango pomwe iwo ambawonesalini ntima wodekha komasoti ambagegedzana kuti nkulu ni mbani. Koma atumi mwawa enze wanthu wabwino ndipo ambakonda Yahova. Iwo ni omwe enze wanthu woyamba kukhala mu mpingo wa Chikhrisitu Yesu padayenda kudzulu.