Yesu adachita vodabwisa vizinji

Yesu adabwera padziko iyi kuti adzalalikire ntontholo wabwino wa Ufumu wa Mulungu. Yahova adamupasa mzimu uchena kuti ambakwanise kuchita vodabwisa. Adachita vimwevi, pakufuna kuwonesa vomwe Yesu adzachite akambadzalamulira dziko yapasi iyi. Yesu ambakwanisa kupolesa matenda yaliyose. Akayenda kulikose, wanthu ambamukumbira kuti awapolese ndipo ambawapolesadi. Ambapolesa alombe, agonthi, ozizira vidzo komasoti ambachosa viwanda. Olo kundophata chovala chake munthu ambakwanisa kupola. Kulikose komwe Yesu wayenda, wanthu ambamutewera. Nthawe zinango Yesu ambafuna kukhala payekha koma wanthu ambamutewera basi ndipo iye ambawathamangisalini.

Ntsiku inango wanthu adabwera na munthu ozizira vidzo kumuyi komwe Yesu wenze. Koma alibe kukwanisa kungena ndawa m’nyumba mumo mwenze wanthu azinji. Patsogolo pake, wanthu mwawo adabowola pantsodzi nkupitisa munthu muyo nkati. Yesu padamuona munthu muyo adati: ‘Imilira famba.’ Munthu muyo adayambadi kufamba ndipo wanthu adadabwa maninge.

Yesu pangangena m’muyi unango, wanthu 10 omwe enze na khate, adaima patali nkukuwa kuti: ‘Yesu, tithandizeni!’ Panthawe mweyo munthu odwala khate ambabvumiziwalini kukhala pafupi na wanthu. Yesu adauza wakhate mwawo kuti ayende kukachisi. Chilamulo cha Yahova chimbalewa kuti munthu wa khate akapola, ambayende ku kachisi kukadziwonesa kwa wantsembe. Pawenze munjira, wose adazindikira kuti apola. Patsogolo pake m’bodzi adabwelera nkuyenda kukatembeja Yesu ndipo adatamanda Mulungu. Pa wanthu wakhate 10 mwawo ni m’bodzi yekha yemwe adayenda kukatembeja.

Penze pomwe mayi munango yemwe ambadwala kwa magole 12 ndipo ambafunisisa kupola. Koma padaona Yesu, adayamba kumutewera ndipo patsogolo pake adaphata m’mphepete mwa malaya yake yakunja. Nthawi mweyo adapola. Pamwapo Yesu adabvunza kuti: “Nimbani waniphata?” Mayi muyo adachita mantha, koma adabwera pafupi nkumuuza Yesu ndawayake wamuphata. Yesu adamulimbikisa pakumuuza kuti: ‘Mwanaiwe, yenda mu mtendere.’

Komasoti tsogoleri munango wa sunagoge dzina yake Yairo adakumbira Yesu kuti: ‘Naboni tiyende kumuyi kwangu kuti mukapolese mwana wangu nkazi yemwe ankudwala maninge.’ Yesu akalibe wafika kumuyi kwa Yairo, mwanaule adamwalira. Yesu padafika, adaona wanthu azinji omwe adabwera kudzanyamalisa banja mweyi, panthawi yoshupa mweyi. Yesu adawauza kuti: ‘Ayi kulira, mwana moyu alibe kumwalira koma ankugona.’ Patsogolo pake adaphata djanja ya mwana ule ndipo adanena kuti: “Kamtsikana iwe, ninkulewa na iwepo, muka!” Nthawe mwiyo adamuka nkukhazikika ndipo Yesu adauza azibereki wake kuti amupase chakudya! Ko unkuganiza kuti azibereki wake adabva tani padawona kuti mwana wawo anamoyo?