Yesu ambalalikira ntontholo wa Ufumu

Yesu padandobatiziwa, adayamba kulalikira kuti: ‘Ufumu wa Mulungu wafendera.’ Iye ambalalikira mu Yudeya na mu Galileya mose ndipo opfunzira wake ambayenda naye pabodzi. Yesu padabwerera kwawo ku Nazareti, adayenda ku sunagoge, nkuyamba kuwerenga mokuwa mpukutu wa Yesaya. Iye adanena kuti: ‘Yahova wanipasa mzimu uchena kuti nilalikire ntontholo wabwino.’ Wanthu wa ku Nazareti ambafuna kuwona Yesu ankuchita vodabwisa, koma vomwe adawerenga ivi, vinkuwonesa kuti chifukwa chikulu chomwe Mulungu adamupasira mzimu uchena chenze chakuti ambalalikire ntontholo wabwino. Patsogolo pake, Yesu adauza wanthu mwawo kuti: ‘Lero ulosi moyu wakwanirisiwa.’

Yesu padachoka kumuku, adayenda ku nyanja ya ku Galileya, komwe adagumana opfunzira wake 4 ankumedza ntsomba. Iye adawauza kuti: ‘Nitewereni, ndipo nikuchinjeni kuti mukhale asodzi wa wanthu.’ Opfunzira mwawa enze Petulo, Andireya, Yakobo na Yohani. Nthawe mwiyo iwo adasiya bizi yawo yakupha ntsomba nkuyamba kumutewera. Adayenda naye ku Galileya kose, nkumbalalikira va Ufumu wa Mulungu. Ambalalikira m’masunagoge, m’mabazali komasoti m’misewu. Kulikose komwe ambayenda, wanthu azinji ambawatewera. Nkhani yonena va Yesu yenze nkamwankamwa, mwakuti yenze idafika ku Siriya kose.

Nthawe zinango, Yesu adapasa ateweri wake mphanvu zopolesa komasoti kubulisa viwanda. Iye ambalalikira m’mathaundi komasoti m’mamiyi na opfunzira wake anango. Azimayi anango wokhulupirika ambathandiza Yesu na ateweri wake. Anango mwa azimayi mwawa enze Mariya Magadara, Jowana komasoti Suzana.

Patsogolo pake, Yesu adawapfunzisa ateweri wake mwawa na kuwatumiza kuti akalalikire. Iwo adalalikira ku Galileya kose, ndipo wanthu azinji adakhala opfunzira wa Yesu ndipo adabatiziwa. Azinji ambafuna kupfunzira mwakuti Yesu adawalinganiza na munda yemwe ukufunika kukololewa. Iye adanena kuti: ‘Kumbirani Yahova kuti atumize anyabasa wodzakolola.’ Patsogolo pake adasankhula opfunzira 70 nkuwatumiza awiriawiri kuti akalalikire ku Yudeya kose. Iwo ambapfunzisa wanthu wose va Ufumu. Opfunzira mwawa padabwererako, adafotokozera Yesu vinthu vokomedza vomwe vidawachitikira. Mdyerekezi alibe kukwanisa kukangisa basa yolalikira mweyi.

Yesu adalimbikisa opfunzira wake mwawo kuti apitirize kuphata basa yofunika mweyi, iye akadzayenda kudzulu. Iye adawauza kuti: ‘Mumbalalikire ntontholo wabwino padziko yose komasoti mumbapfunzise wanthu Mawu ya Mulungu na kuwabatiza.’