Yahova adateteza Yesu

Mu dziko inango ya kumachibese kwa Izirayeli, kwenze wanthu omwe ambakhulupirira kuti nyenyezi zingawathandize kudziwa vinthu. Ntsiku inango, wanthu anango wochokera ku dziko mweyi adawona chinthu chinango chowoneka ninge nyenyezi chinkufamba m’dzulu ndipo adayamba kuchitewera. Adachitewera mpakana kukafika ku Yerusalemu. Padafika adayamba kubvunza wanthu kuti: ‘Ko mwana yemwe adzakhale mpfumu ya Ayuda ali kuponi?’ Isepano tabwera kuti tidzamugwadire.’

Herode padabva vimwevi adakhala na nkhawa. Iye adabvunza wa ntsembe akulu kuti: ‘Pale, ko mpfumu mweyi ifunika kubadwira kuponi?’ Wantsembe mwawo adamudawira kuti: ‘Aneneri adanena kuti idzabadwire ku Betelehemu.’ Pamwapo Herode adauza wanthu wochokera kumachibese mwawo kuti: ‘Yendani ku Betelehemu mukafagefage mwana muyo. Mukakamugumana mubwere mudzaniuze, inembo ninkufuna kuti nikamugwadire.’ Koma sikuti Herode ambafuna kuti akamugwadire mwana muyo.

Chinthu chooneka ninge “nyenyezi” chire chidayambapomwe kufamba ndipo wanthu wale adapitiriza kuchitewera. Ndipo chidakayima pa nyumba inango. Padangena m’nyumba mumo, adagumana Yesu na amayi wake. Iwo adamujolimira mwana muyo ndipo adapereka mphaso za golide, lubani na mule. Koma sikuti ni Yahova yemwe adawatuma wanthu mwawa kuti akawone Yesu.

Usiku muyo, Yahova adayankhula na Yosefe m’maloto. Adamuuza kuti: ‘Herode akufuna kupha Yesu. Tenga nkazi wako na mwana wako muyu ndipo muthawire ku Iguputo. Mukakhale kumuko mpakana nthawe yomwe nidzakuuzeni kuti mubwerere.’ Nthawe mwiyoletu Yosefe adanyamuka na banja yake nkuyenda ku Iguputo.

Pamwapo Yahova adauza wanthu wochokera ku machibese wale kuti osati apitire kwa Herode. Herode padazindikira kuti wanthu mwawo apitira njira inango, adakalipa maninge. Pakuti venze voshupa kuti agumane Yesu, adalamula kuti wana amuna wa nsinkhu ninge wa Yesu ku Betelehemu aphewe. Vimwevi pavimbachitika, nkuti Yesu ali ku Iguputo.

Payidapita nthawe, Herode adafa. Pamwapo Yahova adauza Yosefe kuti: ‘Manje ungabwerere.’ Yosefe, Mariya na Yesu adabwerera ku Izirayeri ndipo adakafikira ku Nazareti.