Vomwe Yesu adachita ali mng’ono

Yosefe na Mariya, ambakhala ku Nazareti na wana wawo anango amuna na akazi. Yosefe ambaphata basa yopala matabwa kuti agumane kobiri zothandizira banja yake. Iye ambapfunzisa banja yake va Yahova komasoti chilamulo chake. Yosefe nthawe zose ambayenda ku sunagoge na banja yake kukatumikira Yahova. Komasoti gole iriyose, banja mweyi imbafamba ulendo utali woyenda ku Yerusalemu kukachita nawo chikondwerero cha Pasika.

Yesu pewenze na magole 12, banja yawo idayenda pomwe ku Yerusalemu ninge momwe imbachitira gole iriyose. Ku Yerusalemu muko, kwenze wanthu azinji womwe ambabwera kudzachita chikondwerero mwechi cha Pasika. Chikondwerero mwechi pachidamala, Yosefe na Mariya na wanthu anango adayamba ulendo wobwerera kumuyi. Ndipo ambaganiza kuti Yesu anaye pabodzi. Patsogolo pake, adazindikira kuti Yesu palibe. Adamufagafaga kose komwe kwenze azibale wawo koma alibe kumugumana.

Yosefe na Mariya adabwererapomwe ku Yerusalemu, ndipo adamufagafaga kwa ntsiku zitatu koma alibe kumugumana pomwe. Iwo adakhala na nkhawa maninge na vimwevi. Patsogolo pake, adayenda kukamufagafaga kukachisi. Adamugumana ali pabodzi na apfunzisi anganani ndipo ambawabvesera vomwe iwo ambanena komasoti ambawabvunza mibvunzo. Apfunzisi mwawo, adadabwa maninge na Yesu, mwakuti nawombo adayamba kumubvunza mibvunzo. Iwo ambadabwa na momwe iye ambawadawirira. Adazindikira kuti Yesu ambachidziwa bwino Chilamulo cha Yahova.

Yosefe na Mariya padamugumana Yesu, Mariya adabvunza Yesu kuti: ‘Takhala tinkukufagafaga kwa nthawe itali. Ko wenze kuponi?’ Koma Yesu adawadawira kuti: ‘Ko munkudziwalini kuti nifunika kugumanika mu nyumba ya Ababa wangu?’

Yesu adanyamuka na azibereki wake mwawo nkuyenda ku Nazareti. Yosefe ambapfunzisa Yesu basa yopala matabwa. Ko unkuganiza kuti Yesu pewenze mng’ono, wenze munthu wotani? Pomwe iye ambakula, nzeru zake zimbaingizirakaingizirika, ndipo ambakondewa na Mulungu komasoti na wanthu.