Angelo adalengeza va kubadwa kwa Yesu

Pa nthawe inango mu ulamuliro wa Kaisara Augusito, padaperekewa lamulo yakuti Ayuda wose abwerere m’mathaundi ya kwawo kuti akanembese. Yosefe na Mariya adayenda ku Betelehemu komwe kwenze kwawo kwa Yosefe. Pa nthawe mweyi nkuti Mariya wakhala pang’ono kubeleka.

Padafika ku Betelehemu, adagumana kuti nyumba zose zadzala moti adagona n’khola. Mwevi ndivo vidachitisa kuti Yesu abadwire n’khola mumo. Mariya adatenga mwana muyo nkumufunikiza na nguwo zabwino, nkumugonesa modyesera vipfuwo.

Pa nthawe mwiyo, anyakabusa anango ambagona kuthengo kufupi na Betelehemu nkumbanyang’anira nkhosa zawo. Mwadzidzidzi mngelo adafika ndipo pa malo yose mwayo padagaka kuwonesa ulemerero wa Yahova. Anyakabusa mwawo adachita mantha koma m’ngelo muyo adawauza kuti: ‘Ayi kugopa. Nabwera na ntontholo wokomedza. Lero Mesiya wabadwa ku Betelehemu.’ Pa nthawe mweyo, angelo azinji adawonekera m’dzulu ndipo ambanena kuti: ‘Alemekezeke Mulungu kudzulu ndipo ntendere ukhale padziko yapasi.’ Patsogolo pake, angelo mwawo alibe kuwoneka pomwe. Ko ukudziwa vomwe anyakabusa mwawa adachita?

Adauzana kuti: ‘Naboni ku Betelehemu manjemanje apa.’ Nthawe mweyo adanyamuka ndipo padafika adawona Yosefe na Mariya anakacheche wawo n’khola.

Wose omwe adabva vomwe angelo mwawo adauza anyakabusa wale, adadabwa maninge. Mariya adaganizira maninge mawu ya angelo mwawo ndipo alibe kuyayebwa. Anyakabusa wale adabwerera kuthengo kule uku ankutembenja Yahova ndawa ya vose vomwe adawona.