Gabrieli adayankhula na Mariya

Elizabeti wenze na m’bale wake ntsikana dzina yake Mariya. Iye ambakhala mu thaundi ya nazareti ku Galileya. Ntsikana muyo wenze pa chibwedzi na wopala matabwa munago dzina yake Yosefe. Ndipo payadamala minyezi 6 Elizabeti anamimba, mngelo Gabrieli adayenda kwa Mariya nkumuuza kuti: ‘Ntendere ukhale nawe Mariya. Yahova wakulemekeza maninge.’ Iye alibe kubvesa vomwe mngelo muyo ambatanthauza. Patsogolo pake, adamuza kuti: ‘Udzakhale na mwana mwamuna ndipo udzamupase dzina yakuti Yesu. Iye adzakhale Mpfumu ndipo Ufumu wake udzamalerini.’

Mariya adati: ‘Ko vimwevi vingakwanisike tani? Inepano nikalibe nagonako na mwamuna.’ Gabrieli adamuuza kuti: ‘Mulungu angakangirelini kuchita chirichose. Mzimu uchena udzakuthandize kuti ukhale na mwana. Ko unkudziwa kuti patinkunena pano Elizabeti anamimba?’ Pavidateno, Mariya adadawira kuti: ‘Ndine kapolo wa Yahova. Vomwe munkunena ivo vichitike kwa inepano.’

Mariya adayamba ulendo woyenda kukawona Elizabeti. Pa nthawe mwiyo, Elizabeti ambakhala mu thaundi inango ya kumapiri. Padafika, nkumumonisa, mwana yemwe wenze m’mimba mwa Elizabeti adayamba kumogamoga. Pamwapo Elizabeti adadzadziwa na mzimu uchena ndipo adayamba kunena kuti: ‘Mariya Yahova wakudalisa. Ni mwayi ukulu kuti mayi wa Mbuya wangu wafika m’nyumba mwangu.’ Mariya adati: ‘Ninkutamanda Yahova na moyo wangu wose.’ Mariya adakhala na Elizabeti kwa minyezi yatatu ndipo patsogolo pake adabwerera kwawo ku Nazareti.

Yosefe padabva kuti Mariya anamimba, ambafuna kumalisa chibwenzi. Ali ntulo, mngelo adamuuza kuti: ‘Ayi kugopa kutenga Mariya kuti akhale nkazi wako. Alibe kuchita choipa chirichose.’ Pamwapo Yosefe adamutenga nkuyenda naye kwawo.