Elizabeti adabereka mwana

Payapita magole yoposha 400 kuchokera pomwe mpanda wa Yerusalemu udakonzewa, wantsembe munango ambakhala pafupi na thaundi ya Yerusalemu. Dzina yake wenze Zekariya ndipo nkazi wake wenze Elizabeti, adakhala m’banja kwa magole yazinji koma wenze alibe mwana. Ntsiku inango Zekariya ankupereka ntsembe m’nyumba yopatulika, adawona mngelo Gabrieli. Zekariya adagopa maninge, koma Gabrieli adamuuza kuti: ‘Ayi kugopa nakubweresera ntontholo wabwino wochokera kwa Yahova. Nkazi wako adzakhale na mwana ndipo dzina yake adzakhale Yohani. Yahova ankufuna kuti Yohani muyo adzaphate basa yapadera.’ Iye adabvunza kuti: ‘Ningakhulupirire tani vimwevi? Inepano na nkazi wangu ndise okalamba ndipo vingakwanisikelini kukhala na mwana.’ Gabrieli adalewa kuti: ‘Mulungu ndiye wanituma kuti nidzakuuze vimwevi. Koma pakuti unkukhulupiriralini, ukhale bewewe mpakana mwana muyo adzabadwe.’

Zekariya adakhala m’nyumba yopatulika mwiyo kwa nthawe itali. Ndipo pomwe adabula, wanthu ambafuna kudziwa chomwe chidamuchebwesa. Koma Zekariya ambakwanisalini kuyankhula, pamwapo adayamba kuyankhula pakuphatisira basa manja. Wanthu mwawo adazindikira kuti iye watambira nthontholo wa Mulungu.

Paidapita nthawe, vomwe mngelo ule adanena vidachitika. Elizabeti adakhala na mimba ndipo patsogolo pake adabereka mwana mwamuna. Anzake wa Elizabeti komasoti azibale wake, adabwera kudzaona mwana muyo ndipo adakondwa maninge. Pamwapo Elizabeti adawauza kuti: ‘Dzina ya mwana moyu ni Yohani.’ Wanthu mwawo adati: ‘Koma m’banja mwanu mulibe aliyese yemwe ana dzina mweyi. Tani atenge dzina ya ababa wake yakuti Zekaria?’ Pavidateno, Zekariya adanemba kuti: ‘Dzina yake ni Yohani.’ Padanemba vimwevi, Zekariya adayamba kuyankhula. Nkhani ya mwana muyo idabvekera mu Yudeya mose ndipo wanthu ambadabwa nkumbanena kuti: ‘Ko mwana muyu adzakhale tani akadzakula?

Zekariya adadzadziwa na mzimu uchena. Pamwapo adanena kuti: ‘Yahova atamandike. Adapolomisa Abulahamu kuti adzatumize Mesiya kuti atipulumuse. Yohani adzakhale mneneri ndipo adzakonze njira ya Mesiya.’

Pa nthawe mweyi, vinthu vinango vopasa chidwi vidachitikira Maria m’bale wake wa Elizabeti. Misolo ya kutsogolo tidzakambirane nkhani yake.