Ufumu womwe udzatonge mpakana kalekale

Ntsiku inango usiku, Nebukadinezara adalota maloto yodabwisa, maloto mwayo yadamushupisa maninge ndipo alibe kukwanisa kugona. Pamwapo adachemera wamatsenga wake nkuwauza kuti: ‘Niuzeni nalota chani inepano?’ Wamatsenga mwawo adalewa kuti: ‘Imwepo mutiuze vamwalota ndipo isepano tikuuzeni tanthauzo yake.’ Koma Nebukadinezara adalewa kuti: ‘Neye imwepo muniuze vanalota, mukaleka kuniuza nikupheni.’ Iwo adamuuza pomwe kachiwiri kuti: Ndotiuzani maloto mwayo ndipo isepano tikuuzeni tanthauzo yake.’ Iye adalewa kuti: ‘Mose imwepo mukundofuna kunipusisa lewani nalota chani.’ Iwo adamudawira kuti: ‘Palibe yemwe angadziwe vomwe mwalota, vimwevi nivosakwanisika.’

Nebukadinezara adakalipa ndipo adalamula kuti amuna wose wanzeru aphewe. Pamwapa Danieli, Mesaki na Abedinego adakaphewambo. Pomwe Danieli adabva vimwevi, adakumbira mpfumu kuti imupase nthawe kuti adziwe vomwe yalota. Patsogolo pake, iye na anzake mwawo adapemphera kwa Yahova kuti amuthandize. Manje ko Yahova adachita chani?

Pakuphatisira basa masomphenya, Yahova adauza Danieli maloto ya Nebukadinezara komasoti tanthauzo yake. Mangwana yake Danieli adayenda kwa atumiki wa mpfumu nkuwauza kuti: ‘Ayi kupha munthu aliyese, inepano nikauze mpfumu vomwe yalota.’ Atumiki mwawo adamutenga nkuyenda naye kwa mpfumu. Kumuko Danieli adauza mpfumu kuti: ‘Mulungu wakudziwisani vomwe vidzachitike kutsogolo. Vomwe mudalota ni ivi: ‘Mudalota chifano chikulu msolo wake wenze wa golide, chifuwa na manja yake venze vasiliva, mimba na nchafu venze vankuwa, minyendo yake yenze yasimbi ndipo mapazi yake ni yasimbi yosanganiza na dothi. Pamwapo mwala udakunkhuliziwa m’phiri kumenya mapazi ya chifano mwicho. Chifano mwicho chidaphwanyika ndipo chidasanduka mpfumbi yomwe idauluzika na mphepo. Patsogolo pake mwala ule udakula ndipo udasanduka phiri yomwe idadzala padziko yose yapasi.’’

Pamwapo Danieli adalewa kuti: ‘Kutsumbudzulira kwa maloto yanu ni uku, ufumu wanu ndiye msolo wa golide, siliva unkuimira ufumu womwe udzabwere patsogolo panu. Pamwapo padzabwere ufumu unango omwe uli ninge nkuwa womwe udzalamulire padziko yose. Patsogolo pa ufumu muyo, padzabwere ufumu unango wolimba ninge chisimbi, pakumalizira padzabwere ufumu wogawikana. Mbali zinango udzakhale wolimba ninge chisimbi, koma mbali zinango udzakhale wosalimba ninge dothi. Mwala womwe udakula nkukhala phiri, unkuimira Ufumu wa Mulungu, Ufumu muyo udzaphwanye mafumu yose ndipo udzakhalepo mpakana kalekale.’

Nebukadinezara padabva vimwevi, adagwada nkujolima mpakana nkhope yake pasi. Pamwapo adalewa kuti: ‘Mulungu wako ndiye yemwe wakuululira maloto mwaya. Palibe Mulungu munango wolingana naye.’ Nebukadinezara adapasa Danieli udindo wonyang’anira wanthu wose wanzeru ndipo adamuikha pomwe kukhala wonyang’anira chigawo chose cha Babulo. Ko waona momwe Yahova adadawirira pemphero ya Danieli?