Ufumu wolingana na chimuti chitali maninge

Ntsiku inango, Nebukadinezara adalota maloto yogopsa. Manje adachemeresa wanthu wanzeru wa mu ufumu wake kuti amuuze tanthauzo yake. Koma palibe yemwe adakwanisa kutsumbudzulira.

Nebukadinezara adafotokozera Danieli kuti: ‘Nidalota muti womwe udakula maninge nkufika kudzulu. Umbawoneka padziko yose ndipo wenze na masamba yokhuza komasoti vipaso vizinji. Nyama za kuthengo zimbakhala mu n’thunzi wake, komasoti mbalani zimbakonza visa mu nthawi zake. Patsogolo pake mngelo adabwera kuchokera kudzulu nkukuwa kuti: “Gwesani muti muyo ndipo gwatani nthawi zake. Koma musiye chitsiga chake. Ndipo muchikulungire na simbi na nkuwa. Ntima wake uchinjiwe kuti uleke kukhala ninge wa munthu koma wa nyama ndipo papite nthawe 7. Wanthu wose adziwe kuti Mulungu ndiye wolamulira ndipo angakwanise kupereka utongi kwa munthu aliyese yemwe ankufuna.”’

Yahova adathandiza Danieli kuti adziwe vomwe maloto mwaya yambatanthauza. Danieli adachita mantha na matanthauzo ya maloto mwaya. Adauza Nebukadinezara kuti: ‘Mpfumu, maloto mwaya yankunena va imwepo komasoti va wanthu womwe akuzondani. Muti ukulu womwe udagwatiwa ule, unkuimira imwepo. Mudzasiye kukhala mpfumu ndipo mudzayende kuthengo nkumbadya udzu ninge chinyama cha kuthengo. Koma pakuti m’ngelo adanena kuti chitsiga cha muti muyo chidzazuliwelini, imwepo mudzabwererepomwe mu ufumu wanu.’

Paidapita gole, ntsiku inango Nebukadinezara ambafambafamba pa ntsodzi ya nyumba yake nkumbawona vomwe adachita mu ufumu wake. Iye adanena kuti: ‘Koma manje vinthu vinkunifambira bwino. Onani momwe thaundi ya Babulo inkuwonekera yokhuza.’ Koma adakali kuyankhula teno, adabva mawu yochokera kudzulu yakuti: ‘Nebukadinezara! Ufumu wako wachoka m’manja mwako.’

Nthawe mweyi Nebukadinezara adapenga ndipo adakhala ninge chinyama cha kuthengo. Adachoka ku nyumba yake yachifumu nkumbakakhala kuthengo ninge chinyama. Tsitsi yake idatalimpha ninge matengera ya mphungu ndipo ntchala zake zidatalimpha ninge za mbalani.

Payadapita magole 7, Nebukadinezara adapolesewa ndipo Yahova adamuikhapomwe kukhala mpfumu ya Babulo. Patsogolo pake iye adanena kuti: ‘Ninkutamanda Yahova Mpfumu ya kudzulu. Manje nadziwa kuti iye ndiye Wotonga. Achitisa manyazi wanthu wodzikwiza ndipo apereka ufumu kwa aliyese yemwe ankufuna.’