Vomwe vidachitika paphiri ya Karimeli

Ufumu wa madzinza 10 ya Izirayeli wenze na mafumu yazinji yoipa. Koma mpfumu Ahabu ndiye wenze nyanye. Iye adalowola nkazi wa makhalidwe yoipa ndipo dzina yake wenze Yezebeli. Ahabu na Yezebeli ambapha aneneri wa Yahova komasoti adachitisa kuti wanthu azinji waku Izirayeli ambatumikire Baala. Manje ko Yahova adachita tani? Iye adatumiza mneneri Eliya kuti akapereke ntontholo kwa Ahabu.

Eliya adanena kuti ndawa ya voipa vomwe Mpfumu Ahabu imbachita, mu dziko ya Izirayeli mugwerini nvula. Kwa magole yatatu wanthu alibe kukwanisa kulima chakudya ndawa yakuti kwenze kulibe nvula. Patsogolo pake, mu dziko mumo mudabwera njala, koma Yahova adatumiza pomwe Eliya kwa Ahabu. Manje Mpfumu mwiyo idalewa kuti: ‘Iwepo ndiwe wabweresa mabvuto yose mwaya.’ Koma Eliya adadawira kuti: ‘Neye ndinepanolini. Wabweresa chilala mwechi, ndimwepo ndawa yakuti munkutumikira Baala. Sonkhanisani wanthu na aneneri wa Baala padzulu pa phiri ya Karimeli kuti tikaone umboni wa vimwevi.’

Wanthu adasonkhanadi pa phiri mwiyo. Manje Eliya adawauza kuti: ‘Sankhulani Mulungu wakuti mumbamutumikire. Peno Yahova ndiye Mulungu chaiye mutewereni, koma peno Baala ndiye mulungu chaiye tewerani muyo. Atumiki 450 wa Baala, akonze ntsembe ndipo apemphere kwa mulungu wawo kuti anyekese ntsembe mwiyo, inembo nikonzembo ntsembe yangu ndipo nipemphere kwa Yahova kuti ainyekese. Mulungu yemwe akwanise kunyekesa ntsembe mwezi ndiye Mulungu chaiye.’ Wanthu mwawo adabvumadi.

Aneneri wa Baala adakonzadi ntsembe yawo. Adapemphera kwa mulungu wawo ntsiku yose kuti: ‘Imwe Abaala tidawireni.’ Koma Baala alibe kuwadawira, patsogolo pake Eliya adayamba kuwaseka. Adawauza kuti: ‘Muchemereni mokuwa panango wagona ndipo munkufunika kuti mumumuse.’ Aneneri wa Baala adapitiriza kupemphera mpakana usiku, koma Baala wawo muyo alibe kuwadawira.

Patsogolo pake, Eliya adaikha ntsembe yake pa guwa ndipo adathirapo madzi. Manje adapemphera kuti: ‘Yahova ninkukumbirani kuti muchitise wanthu mwawa kudziwa kuti imwepo ndimwe Mulungu chaiye.’ Nthawe mwiyoletu Yahova adachitisa moto kuchokera kudzulu ndipo udanyekesa ntsembe mwiyo. Wanthu padawona vimwevi adayamba kukuwa kuti: ‘Yahova ndiye Mulungu chaiye.’ Eliya adanena kuti: ‘Phatani aneneri wose wa Baala.’ Pantsiku mweyi aneneri wose wa Baala wokwana 450 adawapha.

Patsogolo pake ku nyanja kudawoneka ka ntambo kang’ono, ndipo adauza Ahabu kuti: ‘Kugwe chinvula cha mphanvu. Pakirani ngolo zanu ndipo mumbayende kwanu.’ Mwadzidzidzi kunja kudachita n’dima na mitambo ndipo kudayamba chonzi cha mphanvu ndipo patsogolo pake chinvula chidayamba kugwa. Ndipo chilala chire chidamalira pamwapo. Manje Ahabu adayamba kuthamangisa ngolo yake na cholinga chakuti chinvula chileke kumufungira. Mothandiziwa na Yahova, Eliya adathamanga mpakana kupitirira ngolo ya Ahabu. Manje ko mabvuto ya Eliya yadamalira mwapa? Tiwone vimwevi mu msolo unkubwera.