Ufumu udagawanika

Pomwe Solomo ambatumikira Yahova, ku Izirayeli kwenze ntendere. Koma patsogolo pake, adalowola akazi azinji wamakhaindi yanango ndipo akazi mwawo ambatumikira mafano. Pang’ono na pang’ono Solomo adachinja ndipo nayembo adayamba kutumikira mafano. Yahova adakalipa maninge na vimwevi, manje adauza Solomo kuti: ‘Ufumu wa Izirayeli wachosewa ku banja yako ndipo wagawiwa pawiri. Nidzapereke mbali ikulu ya ufumu moyu kwa ntumiki wako ndipo banja yako idzasale na mbali ing’ono.’

Yahova adachita pomwe vinthu vinango pakuwonesa kuti vimwevi vidzachitikedi. Ntsiku inango ntumiki munango wa Solomo dzina yake Yerobowamu, wenze paulendo ndipo adagumana na mneneri Ahiya. Ahiya adang’amba malaya yake mapitsimapitsi yokwana 12. Padachita vimwevi adauza Yerobowamu kuti: ‘Yahova wachosa ufumu wa Izirayeli ku banja ya Solomo ndipo waugawa pawiri, tenga vipitsi 10 ivi ndawa iwepo udzakhale mpfumu ya madzinza 10.’ Mpfumu Solomo paidabva vimwevi imbafuna kupha Yerobowamu. Patsogolo pake Yerobowamu adathawa nkuyenda ku Iguputo. kuyenda kwa nthawe Solomo adamwalira ndipo mwana wake Rehobowamu adakhala mpfumu, pamwapa Yerobowamu adaona kuti angakwanise kubwerera ku Izirayeli.

Akuluakulu wa ku Izirayeli adauza Rehobowamu kuti: ‘Mukambawalamulira bwino wanthu mwawa akhale wokhulupirika kwa imwepo. Koma alumbwana anzake adamuuza kuti: ‘Wanthu mwawa ayi kumbawalamulira mowanyengerara, mumbawaphatise basa zonetesa kuposha zomwe ababa wanu ambawaphatisa!’ Rehobowamu adabvera malangizo mwaya, patsogolo pake adayamba kulamulira wanthu mwawo mwankhanza ndipo iwo adaleka kumubvera. Wanthu mwawo adasankhula Yerobowamu kuti akhale mpfumu ya madzinza 10, omwe yambadziwika kuti ufumu wa Izirayeli. Madzinza yawiri yokha, ni yomwe yadapitiriza kukhala yokhulupirika kwa Rehobowamu ndipo yambadziwika kuti ufumu wa Yuda. Pamwapa ndipo pomwe yadagawikana madzinza 12 ya Aizirayeli.

Yerobowamu ambafunalini kuti wanthu wake ayende kukatumikira ku Yerusalemu komwe mpfumu yake yenze Rehobowamu. Ko unkudziwa ndawa yake? Yerobowamu ambagopa kuti wanthu mwawo angaleke kumubvera nkuyenda kusaidi ya Rehobowamu. Patsogolo pake, adakonza mafano yawiri ya wana wa ng’ombe nkuwauza wanthu mwawo kuti: ‘Mumbatumikire mukuno ndawa yakuti ku Yerusalemu ni kutali.’ Manje wanthu mwawo adayambadi kutumikira wana wa ng’ombe wale ndipo adayebwa Yahova.