Kachisi wa Yahova

Solomo padakhala mpfumu ya Aizirayeli, Yahova adamubvunza kuti: ‘Ko unkufuna nikupase chani?’ Solomo adadawira kuti: ‘Ndine mwana ndipo ninkudziwalini vinthu vizinji. Nipaseni nzeru kuti nikwanise kulamulira wanthu wanu.’ Yahova adamudawira kuti: ‘Pakuti wakumbira nzeru, nikuchitise kuti ukhale munthu wanzeru kuposha munthu aliyese. Ndipo nikupase pomwe chuma. Ukambanibvera udzakhale na moyo utali.’

Patsogolo pake, Solomo adayamba kumanga kachisi. Adaphatisa basa golide, siliva, miti komasoti minyala ndipo vose vimwevi venze vodula maninge. Penze pomwe amuna na akazi wabuya omwe ambaphata basa yomanga kachisi moyu. Payadapita magole 7, basa yomanga mweyi idamala ndipo yenze nthawe yakuti kachisi moyu amupereke kwa Yahova. Kachisi moyu wenze na guwa yoperekerapo ntsembe. Solomo adagwada patsogolo pa guwa ya ntsembe mwiyo nkupemphera kuti: ‘Yahova kachisi uyu ni wosakhuza komasoti ninkululini wakuti imwepo mungakwanemo, koma tibvumizeni kuti timbakutumikireni mu kachisi moyu ndipo mumbabve mapemphero yathu.’ Ko Yahova adabva tani na vomwe Solomo adanena m’pemphero mweyi? Solomo padandomaliza kupemphera, moto udabwera kuchokera kudzulu nkunyekesa ntsembe zose zomwe zenze pa guwa zire. Vimwevi vidaonesa kuti Yahova adakondwa na kachisi moyu, ndipo Aizirayeli padaona vimwevi adakondwa maninge.

Mpfumu Solomo imbadziwika mu Izirayeli mose komasoti m’madera yakutali kuti wenze na nzeru. Wanthu ambabwera kwa iye kuti adzawathandize pa mabvuto yawo. Nayombo mpfumukazi ya ku Seba idabwera kudzamuyesa pakumubvunza mibvunzo yoshupa. Koma paidabva midawiro ya Solomo idalewa kuti: ‘Nimbakhulupiriralini vomwe wanthu adaniuza va imwepo. Koma manje nawona kuti muna nzerudi zizinji kuposha momwe wanthu mwawo ambaniuzira. Yahova Mulungu wanu wakudalisani maninge.’ Vose vimbafamba bwino ku Izirayeli ndipo wanthu ambakondwa. Koma kuyenda kwa nthawe, vinthu vidachinja.